અમદાવાદઃ છેલ્લા લાંબા સમય બાદ મેઘરાજાએ માજા મુકી છે. ત્યારે અમદાવાદના અનેક વિસ્તારોમાં ગાજવીજ અને પવન સાથે ધોધમાર વરસાદ વરસ્યો છે. શહેરના વસ્ત્રાપુર બોડકદેવ ઘાટલોડિયા સોલા વિસ્તાર સેટેલાઇટ ગોતા વૈષ્ણોદેવી વિસ્તાર મણિનગર જશોદાનગર નારોલ વટવા ખોખરા ઉસ્માનપુરા વાડજ નવરંગપુરા મેમ્કો નરોડા કૃષ્ણનગર શાહીબાગ મેઘાણીનગર સહિતના અનેક વિસ્તારોમાં ધોધમાર વરસાદ ખાબક્યો છે.
અમદાવાદ શહેરમાં પવન સાથે વરસાદ ખાબકતા કેટલાક વિસ્તારોમાં વૃક્ષો ધરાશાયી થયા હતા. તો સતત વરસાદ વરસતા ગરનાળા પણ બંધ થાય તેવી શક્યતાઓ છે. બીજી બાજુ રોડ-રસ્તા પર પાણી ફરી વળ્યા છે.
તો વરસાદ વરસતા શહેરીજનો વરસાદની મજા માણી રહ્યા છે. લોકોમાં ખુશીની લહેર વ્યાપી છે. જો કે આજે સાંજથી જ વાદળછાયું વાતાવરણ હતું.
બીજી બાજુ પાટનગર ગાંધીનગરમાં પણ વરસાદી માહોલ સર્જાયો છે. લાંબા સમય બાદ મેઘરાજાનું આગમન થતા શહેરીજનોને ઉકળાટથી રાહત મળી છે. સમગ્ર વિસ્તારમાં ઠંડક પ્રસરી છે.
અંબાજીમાં ભાદરવી પૂનમના મેળાનો માહોલ જામ્યો છે ત્યારે મેળાના માહોલમાં વરસાદથી શ્રદ્ધાળુઓનો આનંદ બેવડાયો છે. અસહ્ય ઉકળાટમાં વરસાદ પડતા શ્રદ્ધાળુઓને રાહત મળી છે. વરસાદથી સમગ્ર વિસ્તારમાં ઠંડક પ્રસરી છે.
ખેડાના ગળતેશ્વરમાં ધોધમાર વરસાદ વરસ્યો હતો. સેવાળિયામાં ભારે પવન સાથે વરસાદ વરસ્યો હતો. વિરામ બાદ વરસાદથી ખેડૂતોમાં આનંદની લાગણી છવાઇ હતી. ભારે ગરમી બાદ વરસાદથી લોકોને રાહત.
અરવલ્લી જિલ્લામાં પણ વરસાદી માહોલ સર્જાયો હતો. મોડાસા શહેરમાં ધોધમાર વરસાદ વરસ્યો હતો. ભિલોડમાં પણ વરસાદનું આગમન થયું હતું. ભિલોડામાં વરસાદના કારણે વીજપુરવઠો ખોરવાયો હતો.
પંચમહાલ જિલ્લામાં મેઘરાજાએ મહેર વર્ષાવી છે. જિલ્લામાં ગાજવીજ સાથે વરસાદ પડતા ધરતી પુત્રોમાં પણ આનંદની લહેર સામે આવી છે. અસહ્ય ઉકળાટ બાદ વાતાવરણમાં ઠંડક પ્રસરી ઉઠતા સ્થાનિકોને પણ ગરમી સામે રાહત મળી છે. તો ખેતરોમાં સુકાઈ ગયેલા પાકોને નવું જીવંતદાન મળતા ખેડૂતોમાં ખુશીની લહેર જોવા મળી છે.