ચોમાસું / આજે ગુજરાતનાં 81 તાલુકામાં મેઘમહેર, જુઓ વરસાદથી ક્યાં કેવી સ્થિતિ?

(ફાઇલ ફોટો)​

અમદાવાદમાં વરસાદ (Rain) નાં આગમનથી સરીસૃપ પ્રાણીઓ  દરમાંથી બહાર આવ્યાની ઘટના સામે આવી છે. વહેલી સવારથી શહેરમાં 6 જગ્યાએથી સાપનો રેસ્ક્યુ કરવામાં આવ્યા છે. રખિયાલ, સોલા, નાના ચિલોડા, રાણીપ અને ચાંદલોડિયામાંથી સાપનાં રેસ્ક્યુ કરાયા. ઉપરાંત કોબ્રા, દામણ સહિતની પ્રજાતિના સાપને રેસ્ક્યુ કરી માનવ વસ્તીથી દૂર છોડવામાં આવ્યા છે.

અમદાવાદનાં વસ્ત્રાપુર અને થલતેજ વિસ્તારમાં પવન સાથે વરસાદ થતાં વૃક્ષ ધરાશાયી થયા હતાં. જીવનદીપ સર્કલ પાસે વૃક્ષ ધરાશાયી થતાં 2 કાર વૃક્ષ નીચે દટાઈ હતી. તો ફાયર બ્રિગેડે વૃક્ષને ખસેડવાની કામગીરી હાથ ધરી છે અને એક બાજુનો રોડ બંધ કરી દેવામાં આવ્યો છે. તો આ તરફ લાડ સોસાયટી પાસે પાણી ભરાઈ ગયા હતાં. જેનાં કારણે વાહન ચાલકોને ભારે હાલાંકીનો સામનો કરવાનો વારો આવ્યો હતો.

અલર્ટ રહેવાની સૂચનાઃ

હવામાન વિભાગે (Weather section) આગામી 3 કલાક સતર્ક રહેવા સૂચના આપી છે. આગામી 3 કલાકમાં ભારે પવન ફૂંકાવાની શક્યતા છે. જેને લઇ મામલતદાર, ડીટીઓ અને વીજકંપનીઓને સતર્ક રહેવા આદેશ આપ્યો છે. મહેસાણા, અમદાવાદ, ગાંધીનગર જિલ્લામાં હવામાન વિભાગે સતર્ક રહેવા સૂચના આપી છે. જેને લઇ જિલ્લા ડિઝાસ્ટર વિભાગ દ્વારા તમામ અધિકારીઓને સૂચના આપી દેવાઇ છે.

સૌરાષ્ટ્રઃ

વાયુ વાવાઝોડાનાં કારણે સૌરાષ્ટ્રમાં સારો એવો વરસાદ પડી ગયો છે..તો ધીરે ધીરે ચોમાસું (Monsoon) પણ જામતું જાય છે. આજે રાજ્યનાં 81 તાલુકામાં વરસાદ વરસ્યો છે. જેમાં સૌથી વધુ ઉનામાં સવા 2 ઈંચ વરસાદ થયો છે. તો આ તરફ સૂત્રાપાડા અને ગીર-ગઢડામાં 2-2 ઈંચ વરસાદ નોંધાયો છે. તો કોડીનારમાં સવા ઈંચ અને રાજુલા, ખાંભા તેમજ જાફરાબાદમાં 1-1 ઈંચ વરસાદ પડ્યો છે. જ્યારે માંડવી-બાલાસીનોરમાં પોણો ઈંચ, મહુવા, વંથલી, સાવરકુંડલા, ગારીયાધાર અને મહેસાણામાં અડધો ઈંચ વરસાદ પડ્યો છે. વરસાદની શરૂઆત થતાં ખેડૂતો પણ ખુશખુશાલ થઈ ગયા છે. તો રાજ્યભરમાં લોકોને ગરમીમાં પણ આંશિક રાહત મળી છે.

(ફાઇલ ફોટો)

બીજી બાજુ અમરેલીમાં પણ સતત વરસાદ (Rain) વરસી રહ્યો છે. ભારે વરસાદ આવતા નદીઓમાં નવા નીર આવ્યાં છે. આજે વહેલી સવાકથી ધીમીધારે વરસાદ પડી રહ્યો છે. ઉપરવાસમાં વરસાદનાં કારણે સ્થાનિક નદીમાં પણ નવા નીર આવ્યા છે. નદીમાં નવા નીર આવતા લોકોમાં ખુશીનો માહોલ જોવાં મળ્યો છે.

તો આ તરફ જૂનાગઢમાં વહેલી સવારથી વરસાદી માહોલ છવાયો છે. જિલ્લામાં વહેલી સવારથી ધીમીધારે વરસાદ પડી રહ્યો છે. વરસાદ આવતા લોકોને ગરમીથી રાહત મળી છે. વરસાદ આવતા વાતાવરણમાં પણ ઠંડક પ્રસરી છે.

પોરબંદરમાં પૂર ઝડપે પવન ફૂંકાઈ રહ્યો છે. ભારે પવનનાં કારણે પોરબંદરમાં વીજળીનાં થાંભલા નમી પડ્યાં છે. ખેતરોમાં વીજળીના થાંભલા નમી પડતાં ખેડૂતો પણ મુશ્કેલીમાં મુકાયા છે. જેથી ખેડૂતોનાં જીવ જોખમમાં મુકાયા છે. આ સાથે જ વિજ પુરવઠા વિભાગની કામગીરી પર પણ અનેક સવાલો ઉઠ્યાં છે. તો વિજપોલનાં થાંભલા નમી ગયા હોવા છતાં કોઈ જ  અધિકારીઓ ભાળ લેવા માટે નથી આવ્યા અને વિજ પુરવઠા વિભાગનાં અધિકારીઓ ગાઢ નિંદ્રામાં છે.

ગાંધીનગરઃ

ગુજરાત ભરમા વરસાદની શરૂઆત થયાની સાથે જ રાજ્યનાં તમામ જિલ્લામાં વરસાદની શરૂઆત થઈ ગઈ છે. ત્યારે આજે સવારથી જ ગાંધીનગરમાં વરસાદનું આગમન થયું છે. વરસાદ પડવાની શરૂઆત થયાની સાથે જ વાતાવરણાં ઠંડક પ્રસરી છે. તો બીજી બાજુ  કોબા સહિતના વિસ્તારોમાં ધોધમાર વરસાદ પડતા વાતાવરણમાં ઠંડક પ્રસરી છે. તો હવામાન વિભાગે પણ આગામી બે દિવસ સુધી વરસાદ પડે તેવી આગાહી કરી છે.

દક્ષિણ ગુજરાતઃ

ત્યારે આ તરફ વલસાડમાં પણ વરસાદી માહોલ છવાયો છે. જિલ્લાનાં અનેક વિસ્તારોમાં છૂટો છવાયો વરસાદ પડી રહ્યો છે. વાપી અને તેની આસપાસનાં વિસ્તારોમાં વરસાદ આવતા વાતાવરણમાં ઠંડક પ્રસરી છે.