નશાનો નાશ / ડ્રગ પેડલર્સને તગડો ફટકો, ગુજરાત સરહદેથી 1,026 કરોડનું 516 કિલો MD ડ્રગ્સ ઝડપાતા ખળભળાટ

• ગુજરાત સરહદે આવેલા પાલઘરના નાલા સોપારામાંથી ઝડપાયું 516 કિલો MD ડ્રગ્સ
• ઝડપાયેલા ડ્રગ્સની કિંમત 1,026 કરોડ
• મુંબઈ પોલીસે કરી મોટી કાર્યવાહી 

દેશમાંથી હવે જથ્થાબંધ માત્રામાં ડ્રગ્સ ઝડપાઈ રહ્યું છે. ગુજરાત બાદ હવે મહારાષ્ટ્રમાંથી પણ મોટી માત્રામાં ડ્રગ્સનો જથ્થો બીજી વાર ઝડપાયો છે. ડ્રગ પેડલર્સ યુવાનોને અવળા માર્ગે ચડાવી તત્પર છે જોકે સામે પક્ષે તંત્ર પણ સતર્ક છે અને તેથી ડ્રગ્સનો વેપલો કરતા પેડલર્સ સફળ થતા નથી. મુંબઈ પોલીસે ડ્રગ્સનો વેપાર કરતા લોકોને એક તગડો ફટકો આપ્યો છે અને યુવાનોના હાથમાં સફેદ નશો આવતા અટકાવી દીધું છે. 

ગુજરાત સરહદે આવેલા પાલઘરમાંથી ઝડપાયું ડ્રગ્સ 
મુંબઈ પોલીસના એન્ટી નાર્કોટિક્સ સેલ (એએનસી)એ ગુજરાતની સરહદે આવેલા પાલઘર જિલ્લાના નાલા સોપારા શહેરમાંથી રૂ.1,026 કરોડની કિંમતનો ડ્રગ્સનો જંગી જથ્થો ઝડપી પાડ્યો છે. આ પહેલા 3 ઓગસ્ટે પણ મુંબઈ પોલીસે 1,403 કરોડની કિંમતનું 702 કિલો મેફ્રોડન ડ્રગ્સ ઝડપી પાડ્યું હતું. 

30 જુલાઈએ 30 હજાર કિલો ડ્રગ્સનો નાશ કરાયો હતો 
આ પહેલા ડ્રગ વિરોધી અભિયાનને જોતા 30 જુલાઈના રોજ દેશમાં ચાર જગ્યાએ 30 હજારથી વધુ કિલોથી વધુ ડ્રગ્સનો નાશ કરવામાં આવ્યો હતો. આ પ્રસંગે કેન્દ્રીય ગૃહમંત્રી અમિત શાહ પણ હાજર રહ્યા હતા. આ કાર્યવાહીના ભાગરૂપે દિલ્હીમાં 19,320 કિલો, ચેન્નાઇમાં 1,309 કિલો, ગુવાહાટીમાં 6,761 કિલો અને કોલકાતામાં 6,761 કિલો ડ્રગ્સનો નાશ કરવામાં આવ્યો હતો. નાર્કોટિક્સ કંટ્રોલ બ્યુરો (એનસીબી)એ 1 જૂને ડ્રગ બ્લાસ્ટિંગ ઓપરેશન શરૂ કર્યું હતું અને 29 જુલાઈ સુધી 11 રાજ્યોમાં 51,217 કિલોથી વધુ ડ્રગ્સનો નાશ કરવામાં આવ્યો છે.