શહેર સહિત સમગ્ર રાજ્યમાં ફરીથી ગરમીનો પ્રકોપ શરૂ થયો છે. ગઇ કાલે રાજ્યનાં ગાંધીનગર, સુરેન્દ્રનગર, સુરત, અમરેલી, કંડલા એરપોર્ટ સહિતનાં નવ શહેરોમાં ગરમીનો પારો ૪ર ડિગ્રીથી ઉપર નોંધાયો હતો. જ્યારે શહેરમાં ૪૧.૯ ડિગ્રી મહત્તમ તાપમાન નોંધાયું હતું, જોકે અમદાવાદમાં આવતીકાલે ગરમીનો પારો ૪૪ ડિગ્રી સુધી જશે તેવી શકયતા ગૂગલ વેધર દ્વારા દર્શાવાઇ છે. આમ રાજકીય માહોલની સાથે શહેરમાં ગરમીનો માહોલ પણ થશે.
ગઇ કાલે શહેરમાં ૪૧.૯ ડિગ્રી ગરમી નોંધાતાં તેની તીવ્રતામાં વધારો થવાની સંભાવના હોઇ આજે મ્યુનિસિપલ કોર્પોરેશન દ્વારા ‘ઓરેન્જ એલર્ટ’ જાહેર કરાયું છે. અમદાવાદના આજના ‘ઓરેન્જ એલર્ટ’ના પગલે તંત્રના સઘળાં અર્બન હેલ્થ સેન્ટર પર ઓઆરએસ પેકેટની વ્યવસ્થા, બીઆરટીએસ સ્ટેશન પર ઓઆરએસનું વિતરણ, એએમટીએસના ડેપો પર પીવાના પાણીની વ્યવસ્થા વગેરે ગોઠવાઇ છે.
જોકે શહેરની કાળઝાળ ગરમીમાં હજુ વધારો થશે. એક-બે દિવસમાં ગરમીનો પારો ૪૪ ડિગ્રીએ પહોંચે તેવી સંભાવના હવામાનની ખાનગી સંસ્થાએ વ્યક્ત કરતાં લોકોએ મે મહિનાના આકરા તાપમાં શેકાવા માટે તૈયાર રહેવું પડશે. દરમ્યાન આજે શહેરનું લઘુતમ તાપમાન ર૮.ર ડિગ્રી સેલ્સિયસ નોંધાયું હતું કે જે સામાન્ય તાપમાન કરતાં એક ડિગ્રી વધુ હતું.
જ્યારે સ્થાનિક હવામાન વિભાગ દ્વારા શહેરમાં આગામી પાંચ દિવસ સુધી એટલે કે ર૮ મે, ર૦૧૯ સુધી શહેરમાં ૪૧થી ૪ર ડિગ્રી ગરમી રહેવાની આગાહી કરાઇ છે. દરમ્યાન રાજ્યના પોરબંદર, ગીર-સોમનાથ, સુરેન્દ્રનગર, ભાવનગર, કચ્છ, સુરત અને વલસાડ િજલ્લામાં આવતી કાલ સવાર સુધી હીટ વેવ રહેશે તેવી આગાહી પણ હવામાન વિભાગ દ્વારા કરાઇ છે.