સુનાવણી / રખડતા ઢોર મામલે 100 નંબર પર ફરિયાદ કરી શકાશે, CCTVનું નેટવર્ક વધારાશે, ગુજરાત હાઈકોર્ટમાં સરકારનો જવાબ 

• રખડતા ઢોર મામલે HCમાં સુનાવણી
• તંત્રની ઢીલી કામગીરીને લઇ લીધો ઉધડો
• હાઇકોર્ટ સમક્ષ સરકારે જવાબ રજૂ કર્યો

ગુજરાતમાં રખડતાં ઢોરનો પ્રશ્ન દિવસે દિવસે વિકટ બનતો જઈ રહ્યો છે. તંત્ર 1 કે 2 દિવસ પૂરતી કાર્યવાહી કરી સંતોષ માની રહ્યું છે. રખડતાં ઢોર મામલે દરેક સુનાવણી દરમિયાન કોર્ટ સરકારની ઝાટકણી કાઢી રહ્યું છે અને કડક કાર્યવાહીના આદેશ આપી રહી છે. છતાં પણ ન રખડતાં ઢોરને ત્રાસ ખતમ થઈ રહ્યો છે. ન તંત્ર આળસ મરડીને ઊભું થઈ રહ્યું છે. અનેક લોકો અડફેટે ચડતા ઘાયલ થઈ રહ્યા છે તો કેટલાક લોકો જીવ પણ ગુમાવી રહ્યા છે.

100 નંબર પર રખડતા ઢોર મામલે ફરિયાદ કરી શકાશે: સરકાર
રખડતા ઢોર મામલે હાઇકોર્ટમાં આજે થયેલી સુનાવણી દરમિયાન હાઇકોર્ટે ઢીલી કામગીરીને લઇ સરકારનો ઉધડો લીધો છે. જમીની સ્તર પર કામગીરી ન થતા હાઇકોર્ટે  સરકાર અને તંત્રને કામ ફક્ત કાગળ પૂરતું સીમિત ન રહે તે માટે ટકોર પણ કરી છે. હાઇકોર્ટ સમક્ષ સરકારે જવાબ રજૂ કરતાં કહ્યું છે કે 100 નંબર પર રખડતા ઢોર મામલે ફરિયાદ કરી શકાશે. રખડતા ઢોર માટે CCTV લગાવવામાં આવશે. તો બીજી તરફ હાઈકોર્ટે પણ યોગ્ય કામગીરી ન થઇ તો કલેક્ટર જવાબદાર ઠેરવાશે તેવો નિર્દેશ પણ કર્યો છે.

રખડતાં ઢોરને લીધે એક વર્ષમાં 4,860 અકસ્માતના બનાવો
રાજ્યમાં રખડતા ઢોરથી છેલ્લા એક વર્ષમાં અધધ 4,860 અકસ્માતના બનાવો બન્યા છે. જેમાં કેટલાય લોકો ગંભીર રીતે ઇજાગ્રસ્ત થયા હતા તો કેટલાય લોકો  મોતને ભેટયા હતા. ત્યારે VTV ન્યૂઝ પાસે રખડતા ઢોરના ત્રાસની એક્સક્લુઝિવ માહિતી છે. ઓગસ્ટ 2021માં 314 અકસ્માત  રખડતાં ઢોરને કારણે થયા હતા. જ્યારે સપ્ટેમ્બર 2021માં 372, ઓક્ટોબર 2021માં 447, નવેમ્બર 2021માં 438 ડિસેમ્બર 2021માં 375 અકસ્માત થયા હતા. જ્યારે ચાલુ વર્ષે જાન્યુઆરી 2022માં 375, ફેબ્રુઆરીમાં 359 અકસ્માત, માર્ચમાં 392 એપ્રિલમાં 465 અકસ્માત, મે મહિનામાં 444, જૂન મહિનામાં 423  જૂલાઇમાં 457 લોકો ઢોરની અડફેટે ચડયા હતા.

કાર્યવાહી કરવામાં ખલેલ પડી રહી છે..
રાજ્યમાં રખડતા ઢોરના ત્રાસથી જનતા પરેશાન થઇ ઉઠી છે. અવારનવાર રખડતા ઢોરના કારણે અકસ્માતની ઘટના સામે આવે છે.  ત્યારે હાઇકોર્ટની ટકોર બાદ અંતે તંત્ર થોડું જાગ્યું તો છે પણ રખડતા ઢોર પર  જે કાર્યવાહી કરી પડે તેમાંથી ઊણું ઉતર્યું છે. ઢોરપાર્ટી દ્વારા રખડતા ઢોરને પકડવામાં સ્થાનિક મુશ્કેલીઓ પણ નડી રહી છે.