આરોગ્ય / વેક્સિન લગાવી, તોય હેલ્થને છે જોખમ? જાણો કોરોના સાથે જોડાયેલા 15 સવાલોના જવાબ

Covid Cases India: કોરોના વાયરસે ફરી એકવાર માથું ઊંચક્યું છે. આખા વિશ્વ પર ફરી એકવાર કોરોના વાયરસનો ખતરો તોળાઈ રહ્યો છે. સિંગાપોર અને થાઇલેન્ડ જેવા દેશોમાં, કોવિડના કેસ ઝડપથી વધી રહ્યા છે અને હોસ્પિટલોમાં દર્દીની ભીડ વધવા લાગી છે, જેના લીધે આરોગ્ય વ્યવસ્થા પર દબાણ સ્પષ્ટપણે દેખાઈ રહ્યું છે. ભારતમાં પણ કોવિડ અંગે ચિંતાની લહેર છે. ત્યારે લોકોના મનમાં આ અંગે હવે ઘણા પ્રશ્નો ઉભા થઈ રહ્યા છે કે શું અહીં પણ પરિસ્થિતિ વધુ ખરાબ થઈ શકે છે? શું આપણા દેશમાં પણ નવો વેરિઅન્ટ આવી ગયો છે? શું બાળકો અને વૃદ્ધોને વાયરસથી જોખમ છે? શું માસ્ક ફરીથી જરૂરી બની ગયું છે? આવા જ કેટલાક મહત્ત્વપૂર્ણ સવાલોના જવાબ સાથે આજે જાણીએ કે ભારતમાં કોરોનાની સ્થિતિ શું છે, સંક્રમણનો કેટલો ખતરો છે, સરકારની શું તૈયારીઓ છે અને સામાન્ય લોકોએ હવે શું સાવચેતી રાખવી જોઈએ.

સિંગાપોર અને થાઇલેન્ડમાં કોવિડના કેસ સાચે જ વધી રહ્યા છે?

હા, સિંગાપોરમાં એક અઠવાડિયામાં કોરોનાના કેસમાં 28%નો વધારો જોવા મળ્યો છે અને થાઇલેન્ડમાં મે મહિનાના મધ્યમાં એક અઠવાડિયામાં લગભગ 50,000 નવા કેસ જોવા મળ્યા છે. બંને દેશોની હોસ્પિટલોના ઇમરજન્સી વોર્ડમાં દર્દીઓની વધતી સંખ્યાને કારણે, બેડ ઉપલબ્ધ નથી અને લોકોને લાંબા સમય સુધી રાહ જોવી પડી રહી છે.

સિંગાપોર-થાઇલેન્ડમાં કોરોના ભારતથી કેવી રીતે અલગ છે?

કોવિડ-19 ના XEC વેરિઅન્ટ (ઓમિક્રોનનો સબ વેરિઅન્ટ) અને JN.1ના સબ વેરિઅન્ટ LF.7 અને NB.1.8 થાઈલેન્ડ અને સિંગાપોરમાં ફેલાઈ રહ્યા છે. આ વેરિઅન્ટ ચેપી છે, પરંતુ ગંભીર રોગનું જોખમ ઓછું છે કારણ કે હાલની વેક્સિન તેમને રોકવામાં અસરકારક છે. થાઇલેન્ડમાં, સોંગક્રાન રજા (13-15 એપ્રિલ) દરમિયાન કેસોમાં વધારો થયો, જ્યારે સિંગાપોરમાં, નબળી રોગપ્રતિકારક શક્તિ તેનું કારણ છે. ભારતમાં JN.1 વેરિઅન્ટના હળવા કેસ જોવા મળ્યા છે, જેમાં મુખ્યત્વે કેરળ, મહારાષ્ટ્ર, તમિલનાડુ અને દિલ્હીમાં દર્દીઓ જોવા મળ્યા છે. પરંતુ આની સંપૂર્ણ પુષ્ટિ થવાની બાકી છે. આ વેરિઅન્ટ પણ ઓછો ખતરનાક છે, કારણ કે વેક્સિન ગંભીર લક્ષણોથી બચાવ કરે છે.

શું ભારતમાં આવું કોઈ જોખમ છે?

હાલમાં ભારતમાં પરિસ્થિતિ નિયંત્રણમાં છે, પરંતુ નિષ્ણાતો માને છે કે જો સાવધાની રાખવામાં નહીં આવે તો જોખમ વધી શકે છે. એટલા માટે દિલ્હી અને યુપી સહિત તમામ રાજ્ય સરકારોએ અત્યારથી જ તૈયારીઓ શરૂ કરી દીધી છે. દિલ્હીમાં, સરકાર આજે હોસ્પિટલ સંચાલકો સાથે એક ઇમરજન્સી મિટિંગ પણ કરવા જઈ રહી છે.

ભારતમાં હાલમાં કોવિડ કેસોની સંખ્યા કેટલી છે?

વસ્તીની દ્રષ્ટિએ, ભારતમાં હાલમાં કેસોની સંખ્યા ઘણી ઓછી છે, પરંતુ સરકાર સિંગાપોર-થાઇલેન્ડ જેવા દેશોમાં કેસોની પર નજર રાખી રહી છે અને સાવચેતી રાખી રહી છે. દિલ્હીમાં પણ લગભગ 23 કેસ મળી આવ્યા છે, જેની તપાસ ચાલી રહી છે. યુપીના ગાઝિયાબાદમાં પણ દર્દીઓમાં લક્ષણો જોવા મળ્યા છે. એટલા માટે સતર્ક રહેવું ખૂબ જ જરૂરી છે.

શું ભારતમાં નવો વેરિઅન્ટ આવ્યો છે?

અત્યાર સુધી કોઈ નવો વેરિઅન્ટ સામે નથી આવ્યો, પરંતુ દરેક પોઝિટિવ સેમ્પલનું જીનોમ સિક્વન્સિંગ કરવામાં આવી રહ્યું છે. સરકાર આના પર નજીકથી નજર રાખી રહી છે અને આરોગ્ય મંત્રાલય વારંવાર તેની સમીક્ષા કરી રહ્યું છે.

સરકારે એડવાઇઝરી આપી છે?

દિલ્હી જેવા રાજ્યોમાં, હોસ્પિટલોને તૈયાર રહેવા કહેવામાં આવ્યું છે - બેડ, ઓક્સિજન, દવાઓ, વેક્સિનની તપાસ કરવામાં આવી રહી છે. યુપી, પંજાબ, કેરળ, મુંબઈ સહિત લગભગ દરેક રાજ્યની હોસ્પિટલોને સતર્ક રહેવા કહેવામાં આવ્યું છે.

શું શાળાઓ અને ઓફિસો ફરીથી બંધ થશે?

ના, હાલમાં આવા કોઈ સંકેત નથી. પરિસ્થિતિ સામાન્ય છે પણ તકેદારી રાખવી જરૂરી છે. નિષ્ણાતો માને છે કે હાલ જે સંક્રમણ છે, એ એટલો ખતરનાક નથી કે તેના લીધે સમસ્યાઓ થાય, પરંતુ સાવધાની રાખવી જોઇએ.

કોરોનાની જે વેક્સિન લગાવડાવી છે, તે હજુ પણ અસરકારક છે?

હા, બૂસ્ટર ડોઝ લેનારા લોકોમાં સંક્રમણની શક્યતા ઓછી અને હળવા લક્ષણો જોવા મળ્યા છે. તેથી, જો કોવિડ વેક્સિન લીધી હોય, તો વધુ ગભરાવાની જરૂર નથી.

શું વિદેશ પ્રવાસ કરવાથી જોખમ વધી શકે છે?

જે દેશોમાં કેસ વધી રહ્યા છે ત્યાંથી આવતા મુસાફરોનું સ્ક્રીનિંગ જરૂરી બની ગયું છે. જો તમે પણ તે દેશોમાં મુસાફરી કરવાનું વિચારી રહ્યા છો, તો શક્ય હોય તો તેને થોડા સમય માટે મુલતવી રાખો. જો ખૂબ જ જરૂરી હોય તો સાવધાની સાથે મુસાફરી કરો.

શું માસ્ક ફરીથી જરૂરી થઈ ગયું છે?

ફરજિયાત નથી, પરંતુ ભીડભાડ અને બંધ જગ્યાઓ પર માસ્ક પહેરવું સમજદારીભર્યું રહેશે. જો કોઈ ભીડવાળી જગ્યાએ જાઓ છો અથવા મેટ્રોમાં મુસાફરી કરો છો તો તમારે સાવધ રહેવું જોઈએ.

શું અત્યારે ટેસ્ટ કરાવવો જોઈએ?

હા, જો તાવ, શરદી, ઉધરસ, ગળામાં દુખાવો અથવા શ્વાસ લેવામાં તકલીફ હોય તો ચોક્કસપણે RT-PCR કરાવો. આનાથી ખબર પડશે કે કોરોનાનું સંક્રમણ છે કે સામાન્ય શરદી છે. તેથી, ચોક્કસપણે ટેસ્ટ કરાવો.

શું બાળકોને કોવિડથી જોખમ છે?

ના, હાલના વેરિઅન્ટ બાળકોમાં ગંભીર બીમારીનું કારણ નથી બની રહ્યા, પરંતુ સાવધાની રાખવી જરૂરી છે. કારણ કે પહેલા જે કોવિડ આવ્યો હતો, તે બાળકોને અસર કરી રહ્યો ન હતો, પરંતુ પછીથી જાણવા મળ્યું કે તે બાળકોને પણ બીમાર કરી રહ્યો હતો.

વૃદ્ધો અને બીમાર લોકોએ શું કરવું જોઈએ?

બૂસ્ટર ડોઝ લો, ભીડમાં જવાનું ટાળો, માસ્ક પહેરો અને નિયમિત ચેકઅપ કરાવો. જો તમને ક્યાંય પણ ચેપના લક્ષણો દેખાય, તો તાત્કાલિક RTPCR ટેસ્ટ કરાવો. હોસ્પિટલમાં જાઓ અને તાત્કાલિક ડૉક્ટરની સલાહ લો અને ત્યાં સારવાર મેળવો.

આ પણ વાંચો: કોરોનાની નવી લહેર! માસ્ક પહેરવાથી લઈને બૂસ્ટર ડોઝ, ડોક્ટર પાસેથી જાણો 7 સવાલના જવાબ

શું ભારતમાં પણ સિંગાપોર-થાઇલેન્ડ જેવી પરિસ્થિતિ થઈ શકે છે?

જો આપણે સાવચેતી રાખવાનું બંધ કરી દઈશું, તો હા, પણ અત્યારે ખતરો બહુ ઓછો છે. આપણે તૈયાર રહેવું પડશે, ડરવાનું નહીં, પણ સાવચેત રહેવું પડશે. હાલમાં, ભારતમાં ફક્ત જૂના વેરિઅન્ટ જ સક્રિય છે અને તેની અસર મર્યાદિત છે. હાલમાં, સિંગાપોરમાં વાયરસ વધુ ખતરનાક લાગે છે, પરંતુ ભારતમાં સતર્કતાને કારણે ભય ઓછો છે.

ભારતમાં ફેલાઈ રહેલા કોરોનાથી કોને વધુ જોખમ છે?

વૃદ્ધો, ડાયાબિટીસ, હૃદય અથવા ફેફસાના રોગ જેવી પહેલાથી જ બીમારીઓ ધરાવતા લોકો અને જેમને રસી નથી લીધી, તેમને ચેપનું જોખમ વધુ છે. નબળી રોગપ્રતિકારક શક્તિવાળા લોકો પણ જોખમમાં છે. બાળકો અને સ્વસ્થ યુવાનોમાં તેની અસરો હળવી જોવા મળી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ