ઈન્સ્યોરન્સ રેગ્યુલેટરી એન્ડ ડેવલપમેન્ટ ઓથોરિટી ઓફ ઇન્ડિયા (ઈરડા) હવે હેલ્થ ઇન્સ્યોરન્સને લઇને એક નવો મુસદ્દો લાવી રહી છે. હવે આ મુસદ્દા હેઠળ પોલિસીધારકોને અનેક પ્રકારના ફાયદા થશે. ઈરડાના નવા મુસદ્દા અનુસાર હેલ્થ ઇન્સ્યોરન્સ લેનારને સાથે વિનામૂલ્યે જિમ મેમ્બરશિપ, યોગા સેન્ટર અને પ્રોટીન સપ્લિમેન્ટ પર ડિસ્કાઉન્ટ વાઉચર જેવી સુવિધાઓ મળશે.
આ ઉપરાંત હેલ્થ ઇન્સ્યોરન્સના પોલિસી હોલ્ડર્સને વિનામૂલ્યે ઓપીડી સલાહ, દવાઓ, હેલ્થ ચેકઅપ, ડાયગ્નોસ્ટિક જેવી સુવિધા મળશે.
ઇરડાના જણાવ્યા અનુસાર આ નવા દિશા નિર્દેશથી હેલ્થ સેવાઓને અગાઉ કરતા વધુ બહેતર બનાવી શકાશે. અત્યારે પણ હેલ્થ ઇન્સ્યોરન્સ આપનાર કેટલીક કંપનીઓ પોતાના કવરેજમાં હેલ્થ ચેકઅપ અને ડાયેગ્નોસ્ટિક આપે છે. ઇરડાએ જણાવ્યું છે કે વીમાની રકમ તેનાથી અલગ હશે અને કોઇ બોનસ સાથે તેને લિંક કરવામાં આવશે નહીં.
નવા પ્રસ્તાવમાં હેલ્થ ઇન્સ્યોરન્સની પોલિસી ધરાવનારને સીધું ઇન્સેન્ટિવ આપવાનો પ્રસ્તાવ છે. ઇરડાના જણાવ્યા અનુસાર વીમા કંપનીઓને એ પણ જણાવવું પડશે કે પોલિસી રિન્યૂ થાય તો તમામ ફાયદા પોલિસીધારકને કેરી ફોરવર્ડ કરવામાં આવશે કે કેમ?
પોલિસી હોલ્ડર્સને વર્ષમાં એક વાર સ્ટેટમેન્ટ મોકલાશે અને હેલ્થ ઇન્સ્યોરન્સ પોલિસીના બેનિફિટ્સ અંગે વિસ્તૃત જાણકારી આપવામાં આવશે. ફેમિલી ફ્લોટર પ્લાન્સમાં આ પ્રકારની સુવિધાઓ આપવામાં આવશે કે કેમ તે અંગે પણ હેલ્થ ઇન્સ્યોરન્સ કંપનીએ સ્પષ્ટતા કરવી પડશે. આમ, હવે ઇરડા હેલ્થ ઇન્સ્યોરન્સની બાબતમાં કેટલીક પોલિસીધારકો માટે ફાયદાકારક જોગવાઇઓ કરવા જઇ રહી છે અને તેથી હેલ્થ ઇન્સ્યોરન્સ કંપનીએ પોલિસીધારકને અનેક લાભ આપવા પડશે.