રાજકોટ / શહેરનું આરોગ્ય અધ્ધરતાલ, કોર્પોરેશનમાં 2 દિવસમાં 2 અધિકારીઓનાં રાજીનામાં

• 2 દિવસમાં 2 આરોગ્ય અધિકારીઓના રાજીનામા મંજૂર
• રોગચાળોની સ્થિતિમાં આરોગ્ય અધિકારીઓના રાજીનામા
• કુલ 5માંથી 2 આરોગ્ય અધિકારીઓના રાજીનામા મંજૂર કરાયા 

વધું  એક આરોગ્ય અધિકારીએ આપ્યું રાજીનામું

રાજકોટ મ્યુનિસિપલ કોર્પોરેશનનાં વધુ 1 નાયબ આરોગ્ય અધિકારી ડો.હિરેન વિસાણીએ બાળરોગ નિષ્ણાંતનાં ઉચ્ચ અભ્યાસ માટે રાજીનામું આપી દીધું છે. આરોગ્ય શાખા હવે માત્ર ડો.રાઠોડ અને ડો.ચુનારાનાં ભરોસે છે. 

કયાં કારણોસર આપ્યું રાજીનામુ

હાલમાં જ મ્યુનિસિપલ કમિશનર ઉદિત અગ્રવાલ દ્વારા આરોગ્ય અધિકારી ડો.વી.પી.પંડયાનું રાજીનામું મંજુર કરવામાં આવ્યું છે.  ડો.હિરેન વી.વિસાણી જાન્યુઆરી-૨૦૧૪થી મહાપાલિકામાં નાયબ આરોગ્ય અધિકારી તરીકે જોડાયા છે. તેઓ કોલેજ ઓફ ફિઝિશીયન એન્ડ સર્જન્સમાં પિડીયાટ્રીક વિભાગમાં બાળરોગ નિષ્ણાંતનાં ઉચ્ચ અભ્યાસ માટે એડમિશન મેળવ્યું છે. જેને પગલે તેણે નાયબ આરોગ્ય અધિકારી તરીકે મહાપાલિકામાંથી રાજીનામું આપ્યું છે. 

અન્ય અધિકારીઓએ આપી શુભેચ્છા

આ પગલે ઈન્ચાર્જ આરોગ્ય અધિકારી ડો.પંકજ રાઠોડ અને ઈન્ચાર્જ નાયબ આરોગ્ય અધિકારી મનિષ ચુનારાએ ઉચ્ચ અભ્યાસ માટેની શુભેચ્છાઓ પાઠવી હતી. સાથો સાથ એવો પણ વિશ્ર્વાસ વ્યકત કર્યો હતો કે, વધુ અભ્યાસ પૂર્ણ કર્યા બાદ રાજકોટનાં નાગરિકોને ડો.હિરેન વિસાણીની સેવાનો લાભ મળશે. 

6 વર્ષનાં કાર્યકાળ બાદ આપ્યું રાજીનામુ

નોંધનીય છે કે, બે વર્ષ પહેલાં આરોગ્ય અધિકારી વી.પી.પંડયાએ આપેલું રાજીનામું ગઈકાલે મ્યુનિ.કમિશનર દ્વારા મંજુર કરવામાં આવ્યું હતું.  આ તકે ડો.વિસાણીએ ૬ વર્ષનાં કાર્યકાળ દરમિયાન સહયોગ આપવા બદલ મહાપાલિકાનાં પદાધિકારીઓ, અધિકારી, આરોગ્ય શાખાનાં અધિકારીઓ તથા કર્મચારીઓનો આભાર માન્યો હતો. તેઓની આરોગ્ય સેવા નોંધપાત્ર રહી હતી.

કાંડને કાણે રાજીનામાં પડી રહ્યાં હોવાની વાત

બીજી તરફ ચર્ચાઈ રહ્યું છે કે આ રાજીનામાં પાછળ આરોગ્ય વિભાગમાં થયેલા કાંડ જવાબદાર છે. જેમાં જલેબીકાંડ, લાઇફ કેરના નકલી ડોક્ટર જેવા કાંડ જવાબદાર હોવાનું મનાઈ રહ્યું છે. તેને કારણે RMCમાં મુખ્ય આરોગ્ય અધિકારીની પોસ્ટ ખાલી પડી છે.