મોટા માથાઓના નામ સામે આવી તેવી શક્યતા, સાબરકાંઠાથી ફૂટ્યું હતું હેડક્લાર્કનું પેપર
હેડ ક્લાર્ક ભરતી પરીક્ષા પેપર લીક મામલો
આજે SP કચેરી ખાતે પ્રેસ કોન્ફરન્સ યોજાશે
પેપર લીક મુદ્દે થઇ શકે છે મોટો ખુલાસો
હેડ ક્લાર્ક ભરતી પરીક્ષા પેપર લીક મામલે આજે સાબરકાંઠા SP કચેરી ખાતે પ્રેસ કોન્ફરન્સ યોજાશે, જેમાં મોટા માથાઓના નામ સામે આવી તેવી પૂરેપૂરી શક્યતાઓ છે. પેપર કાંડની તપાસમાં અત્યાર સુધી 11 માંથી 8લોકોની ધરપકડ કરવામાં આવી છે. મહેન્દ્ર પટેલ અને જસવંત પટેલની આજે અટકાયત કરી પૂછપરછ માટે હિંમતનગર dysp કચેરી ખાતે આરોપીઓ લઈ જવામાં આવ્યા છે. હજુ અન્ય ૩ આરોપીઓની શોધખોળ ચાલી રહી છે ત્યારે તપાસમાં વધુ નામ સામે આવે તેવી સંભાવના છે.
અસિત વોરા રાજીનામાંની માંગ
હેડ કલાર્ક પેપર લીક કાંડને લઈને ગુજરાત કોંગ્રેસે પ્રેસ કોન્ફરન્સ સંબોધતા કહ્યું કે રાજ્ય સરકારે 72 કલાક બાદ સ્વિકાર્યું છે કે પેપર ફૂટ્યું છે. સરકાર જેમને પાછલા બારણે નથી લઈ શક્તા તેમને પેપર ફોડીને લેવાનો પ્રયત્ન કરી રહ્યાં છે. ભરતી,ભ્રષ્ટાચાર અને ભાજપ સાથે ચાલે છે. ગઈકાલે અસિત વોરાને લઈને જીતુ વાઘાણીએ ક્લિન ચીટ આપી હતી. તે ક્યા આધારે આપી હતી તેનો ખુલાસો કરે. પેપક લીક થયું છતા સરકારે પરિક્ષા રદ કરવાની હજુ સુધી જાહેરાત કરી નથી.પરિક્ષાને તાત્કાલીક અસરથી રદ કરીને નવેસરથી તેની તારીખ બહાર પાડવી જોઈએ. ભાજપ મતના રાજકારણ માટે ચૂંટણીના છેલ્લા વર્ષોમાં ભરતીઓ બહાર પાડે છે. અસિત વોરા રાજીનામુ આપે અથવા સરકાર બરખાસ્ત કરે તેવી માંગ હવે યુવરાજસિંહ બાદ કોંગ્રેસે પણ કરી છે.
સચિવાલય સુધી પહોંચશે પેપર લીકના તાર: સૂત્ર
હેડ ક્લાર્કની પરીક્ષાનો પેપર લીકનો મામલે VTV પાસે મહત્વના સમાચાર આવી રહ્યા છે, ખાસ સૂત્રો દ્વારા મળતી માહિતી મુજબ પેપરલીકના તાર સચિવાલય સુધી પહોંચી શકે છે, હાલ જયેશ પટેલ પોલીસ પકડથી દૂર છે. પણ મુખ્ય આરોપી જયેશ પટેલની ધરપકડ બાદ કોઈ અધિકારી તેમજ નેતાની સમગ્ર કેસમાં સંડોવણી હોય તેવી શક્યતાઓ સેવાઇ રહી છે.
ગૃહરાજ્યમંત્રી હર્ષ સંઘવીએ શું કહ્યું?
હેડક્લાર્કની પરીક્ષાનું પેપર લીક થતા ઘેરા પ્રત્યાઘાત પડી રહ્યા છે, પરીક્ષામાં પેપર લીક થવા મુદ્દે રાજકારણ ગરમાયું છે તો બીજી તરફ એકબાદ એક બેઠકોનો ધમધમાટ શરૂ થઈ ગયો છે. પેપરકાંડમાં અત્યાર સુધીમાં 8 આરોપીઓ ઝડપાયા છે જ્યારે બાકીના આરોપીઓ હજુ પણ પોલીસ પકડથી દૂર છે. રાજ્યના ગૃહમંત્રી હર્ષ સંઘવીએ આજે પત્રકાર પરિષદ યોજી હતી અને કોઈ પણ દોષિતોને છોડવામાં નહીં આવે તેવું જણાવ્યું છે.