જાહેરાત / હવે આ ખાનગી બૅંકોએ પણ ગ્રાહકોને 3 મહિના EMI ટાળવાની આપી રાહત

• પ્રાઈવેટ બૅંકોએ પણ લૉન EMI ટાળવાની આપી સુવિધા
• કોરોનાને પગલે રિઝર્વ બૅંકે આપી હતી સલાહ
• મંગળવારે સરકારી બૅંકોએ કરી હતી જાહેરાત

દેશમાં કોરોનાના પ્રકોપને જોતા સરકારી બૅંકો બાદ હવે ખાનગી બૅંકોએ પણ પોતાની ટર્મ લોનના ગ્રાહકોને EMI ત્રણ મહિના સુધી ટાળવાની સુવિધા આપી દીધી છે. મંગળવારે તમામ સરકારી બૅંકો બાદ હવે આજે ICICI, HDFC જેવી ખાનગી બૅંકોએ પણ પોતાની વેબસાઈટ પર જાહેરાત મૂકીને આ મુદ્દે ગાઈડલાઈન જાહેર કરી છે. 

મહત્વનું છે કે કોરોનાને કારણે લોન ઈએમઆઈ ત્રણ મહિના સુધી ટાળવાની રિઝર્વ બૅંકની જાહેરાત બાદ આ વાતની રાહ જોઈ રહ્યાં હતાં કે તેમની બૅંક તેમને ક્યારે મેસેજ આપે. મંગળવારે તમામ સરકારી બૅંક અને કેટલીક નાણાંકીય સંસ્થાઓના સંદેશ પણ ગ્રાહકોને મળી ગયાં છે. આ મુદ્દે ખાનગી બૅંકોએ બુધવારે જાહેરાત કરી છે. 

બુધવારે HDFC, ICICI, કોટક મહિન્દ્રા જેવી ખાનગી બૅંકોએ પોતાના ગ્રાહકોને સુવિધા આપવાની જાહેરાત કરી છે. ગ્રાહકોને આ બાબતે મેસેજ પણ આવવા લાગ્યાં છે. આ તમામ બૅંકોએ સવાલ-જવાબના રૂપે ગ્રાહકોને સંપૂર્ણ ગાઈડલાઈન જાહેર કરી છે કે તેનો લાભ કેવી રીતે ઉઠાવી શકે છે. જ્યારે વધુ એક ખાનગી બૅંકે આ મુદ્દે જાહેરાત જલ્દીથી કરશે તેવું કહ્યું છે. 

કઈ સરકારી બૅંકોમાં લાગુ પડશે આ નિયમ?

સ્ટેટ બૅંક ઓફ ઈન્ડિયા, સેન્ટ્રલ બૅંક ઓફ ઈન્ડિયા, બૅંક ઓફ ઈન્ડિયા, બૅંક ઓફ મહારાષ્ટ્ર, યુકો બૅંક, પંજાબ એન્ડ સિંધ બૅંક, ઈન્ડિયન ઓવરસીઝ બૅંક, બૅંક ઓફ બરોડા, પંજાબ નેશનલ બૅંક, કેનરા + સિંડિકેટ બૅંક, IDBI બૅંક અને યુનિયન બૅંક ઓફ ઈન્ડિયા

રાહતનો મતલબ શું?

અગાઉ જો બૅંક લોનના કોઈ હપ્તા ન ભરો તો ડિફોલ્ટર ગણાતા હોય છે તેમ જ ક્રેડિટ સ્કોર ડાઉન થતો હતો. પરંતુ આ નિર્ણય બાદ 3 મહિના સુધી તમે હપ્તો નહીં ભરો તો ચાલશે પરંતુ તે તમારે પાછળથી ભરવાનો રહેશે. આ દરમ્યાન તમે ડિફોલ્ટર નહીં ગણાશો અને તમારો ક્રેડિટ સ્કોર પણ નહીં બગડે.