હાઈકોર્ટે એક અરજી પર સુનાવણી કરતા એક મહિનામાં દેખાવો કે રેલીની મંજૂરીના નિયમો વેબ પોર્ટલ પર મૂકવાનો પોલીસ કમિશનરને આદેશ કર્યો છે.
રેલી મંજૂરીના નિયમો જાહેર કરવા કમિશનરને આદેશ
પોલીસે રેલીની નામંજૂરીનું કારણ ન આપતા થયેલી અરજી પર ટકોર
પોલીસ કમિશનરે ફગાવી દીધી હતી યુવતીની અરજી
વિરોધ પ્રદર્શનની મંજૂરીના નિયમને લઈને ગુજરાત હાઇકોર્ટમાં કરાયેલી એક અરજી પર સુનાવણી યોજાઈ હતી. જેમાં હાઇકોર્ટે કહ્યું હતું કે, દેખાવો કે રેલીની મંજૂરીના નિયમો જાણવાનો નાગરિકોને અધિકાર છે. વિરોધની મંજૂરી કેમ નથી મળતી તે નિયમો જાણવાનો પણ અધિકાર છે. આ સાથે સુનાવણી દરમિયાન હાઈકોર્ટે દેખાવો કે રેલીની મંજૂરીના નિયમો વેબપોર્ટલ પર મુકવાનો નિર્દેશ કર્યો હતો.
શું છે સમગ્ર મામલો?
એક યુવતીએ CAA (સિટીઝન એમેન્ડમેન્ટ એક્ટ)ના કાયદા સામે દેખાવો કરવા પોલીસ પાસે મંજૂરી માગી હતી, પરંતુ પોલીસ કમિશનરે યુવતીની આ અરજી ફગાવી દીધી હતી. જોકે, તેણીની અરજી ક્યા કારણોસર ફગાવવામાં આવી તે અંગે પોલીસે કંઈ જણાવ્યું નહોતું. આથી આ યુવતીએ RTI (Right to Information) કરીને વિગતો માંગી હતી. તેમ છતાં પોલીસે આ અરજી પર જવાબ આપવાનો ઇનકાર કર્યો હતો.
યુવતીએ કમિશનરના નિર્ણય સામે હાઈકોર્ટમાં કરી હતી અરજી
અંતે યુવતી સમગ્ર મામલે ગુજરાત હાઈકોર્ટમાં પહોંચી હતી. તેણીએ આ અંગે હાઈકોર્ટમાં એક અરજી કરી હતી. જેમાં તેણીએ રજૂઆત કરી હતી કે, સામાન્ય નાગરિકોને દેખાવો કે રેલી માટે મંજૂરી લેવાના નિયમો પોલીસે વેબ પોર્ટલ પર મૂકવા જોઈએ.
નિયમો જાણવાનો નાગરિકોને અધિકારઃ હાઈકોર્ટ
જેથી યુવતીની અરજી પર સુનાવણી દરમિયાન હાઈકોર્ટે મહત્વપૂર્ણ ટિપ્પણી કરી હતી. જેમાં કહેવામાં આવ્યું હતું કે, વિરોધ પ્રદર્શન હેઠળના નિયમો જાણવાનો નાગરિકોને અધિકાર છે. વિરોધની કેમ મંજૂરી નથી મળતી તે નિયમો જાણવાનો અધિકાર છે. RTI અંગે કોર્ટે જણાવ્યું હતું કે, માહિતી અધિકારના કાયદાને પોલીસ હાંસિયામાં ધકેલી ન શકે.
પોલીસ કમિશનરને HCનો આદેશ
સાથે હાઈકોર્ટે પોલીસ કમિશનરને આદેશ કર્યો હતો કે, સામાન્ય માણસને કાયદાઓ અને નિયમો અંગે માહિતી મળી રહે તે હેતુથી પોલીસે એક મહિનામાં આ અંગેના નિયમો વેબ પોર્ટલ પર મૂકવાનાં રહેશે.