કોરોના સંકટ / રાજ્ય સરકાર ખુલાસો કરે કે કોરોના સારવારમાં અમદાવાદની આ અદ્યતન હૉસ્પિટલ્સ પણ કેમ ન લીધી : હાઈકોર્ટ

ગુજરાત હાઇકોર્ટમાં જાહેરહિતની અરજી કરવામાં આવી હતી. જેના પર હાઇકોર્ટે સુનાવણી હાથ કરતા રાજ્ય સરકારને આદેશ મહત્વનો આદેશ કર્યો છે. જેમાં અમદાવાદ શહેર અને તેના હદની બહાર આસપાસના વિસ્તારોની મલ્ટીસ્પેશ્યાલિટી ખાનગી અને કોર્પોરેટ હોસ્પિટલ્સમાં પણ કૉવિડ 19ના દર્દીઓ માટે 50 ટકા બેડ રિઝર્વ કરવા માટે જાહેરનામું બહાર પાડવાનો ગુજરાત સરકારને આદેશ અપાયો છે. 

હાઇકોર્ટે શું કહ્યું?

હાઇકોર્ટે શહેરની અદ્યતન હોસ્પિટલને  કેમ કોરોના સારવારમાં લીધી નથી તે મામલે રાજ્ય સરકાર પાસે ખુલાસો માંગ્યો હતો. શહેરની 8 હોસ્પિટલમાં સારવાર માટે રાજ્ય  સરકાર અદ્યતન સુવિધા ધરાવતી હોસ્પિટલ સાથે MOU કરે તે માટે હાઈકોર્ટે આદેશ આપ્યો હતો. આ 8 હોસ્પિટલોમાં એપોલો હોસ્પિટલ, કે.ડી હોસ્પિટલ, ઝાયડસ, એશિયા કોલમ્બિયા, ગ્લોબલ હોસ્પિટલ, આનંદ સર્જીકલ હોસ્પિટલ, યુ.એન.મહેતા આ તમામ હોસ્પિટલોનો હાઈકોર્ટે ઉલ્લેખ કર્યો હતો. અને એમ પણ જણાવ્યું હતું કે આગામી દિવસોમાં જો આ હોસ્પિટલો તૈયારી નહી દર્શાવે તો ડિઝાસ્ટર એકટ પ્રમાણે હોસ્પિટલ સામે આકરા પગલાં લેવામાં આવશે. 

આ ખાનગી હોસ્પિટલમાં દર્દી પાસે એડવાન્સ  ફી ના વસુલે છે તે સંદર્ભે પર સરકારને હાઇકોર્ટે ટકોર કરી હતી. આ ઉપરાંત દર્દીઓને 24 કલાક એબ્યુલસન્સ અને અન્ય સારવાર મળવી જોઈએ તેવો પણ કોર્ટે આગ્રહ રાખ્યો હતો.  

આજે જાહેર હિતની અરજી ઉપર સુનાવણી દરમિયાન હાઈકોર્ટે એક મહત્વનો આદેશ આપતા રાજ્ય સરકારને હુકમ કર્યો છે કે રાજ્ય સરકાર એક પરિપત્ર જાહેર કરીને અમદાવાદ શહેર અને શહેરની આસપાસના બહારના વિસ્તારોની તમામ મલ્ટી સ્પેશ્યાલીટી પ્રાઇવેટ અને કોર્પોરેટ હોસ્પિટલમાં 50% બેડ અથવા તો રાજ્ય સરકાર કેસની સંખ્યા પ્રમાણે નક્કી કરે એટલા બેડ ફક્ત કોરોનાના દર્દીઓ માટે ફરજીયાત રિઝર્વ રાખવાનો આદેશ આપે. આ માટે રાજ્ય સરકાર દર્દીઓના બેડને કેટલા પ્રકારે વર્ગીકૃત કરવા છે તે મુદ્દે હોસ્પિટલોને ગાઈડલાઇન્સ પાઠવી શકે છે. 

AMC કરી ચુક્યું છે તેની હદમાં આ પ્રકારનો આદેશ

નોંધનીય છે કે 16 તારીખે અમદાવાદ મહાનગર પાલિકાએ એક પરિપત્ર બહાર પાડીને જાણ કરી હતી કે તંત્રએ 42 ખાનગી હોસ્પિટલોને કોવિડ-19 હોસ્પિટલ જાહેર કરી છે. AMCએ 42 ખાનગી હોસ્પિટલોને કોવિડ 19 હોસ્પિટલ જાહેર કરીને તેમના 50 ટકા બેડ સરકારી રહેશે જેનો ખર્ચ સરકાર ભોગવશે, જ્યારે અન્ય 50 ટકા બેડ ખાનગી હોસ્પિટલ સરકારે નક્કી કરેલા ભાવ મુજબ વસૂલી શકશે તેવી જાહેરાત કરી હતી. આ આદેશમાં શહેરની 16 હોસ્પિટલોએ સહયોગ ન આપતા તંત્રએ તેમને નોટિસ પણ ફટકારી હતી. 

ઉલ્લેખનીય છે કે અગાઉ AMCના આ પરિપત્ર પ્રમાણે AMCની હદમાં આવતી 42 હોસ્પિટલોને કોવિડ 19 હોસ્પિટલ જાહેર કરાઈ હતી જયારે હવે જાહેર હિતની અરજીના મુદ્દે હાઇકોર્ટે આપેલા ચુકાદા પ્રમાણે હવે અમદાવાદની આસપાસના વિસ્તારોમાં આવતી તમામ મલ્ટી સ્પેશ્યાલીટી પ્રાઇવેટ અને કોર્પોરેટ હોસ્પિટલોનો આમાં સમાવેશ થઇ જશે.