વોટ કરવા જતાં પહેલા પોલિંગ બૂથ, તારીખ અને લોકેશન જેવી તમામ વિગતોની સાથે વોટર સ્લિપને પણ ચૂંટણી પંચની સાઈટ પરથી આ રીતે સરળતાથી ડાઉનલોડ કરો.
ગુજરાત વિધાનસભાની ચૂંટણીના બીજા તબક્કાનું આજે થઈ રહ્યું છે
ગુજરાતની 93 બેઠકો પર આજે મતદાન
આ રીતે ડાઉનલોડ કરો વોટર સ્લીપ
જાણો ઓનલાઈન ડાઉનલોડ કરવાની સ્ટેપ-બાય-સ્ટેપ પ્રોસેસ
ગુજરાત વિધાનસભાની ચૂંટણીના બીજા તબક્કાનું મતદાન 5 ડિસેમ્બર એટલે કે આજે થઈ રહ્યું છે. જો તમારી ઉંમર 18 વર્ષ થઈ ચૂકી છે તો તમારા માટે એ જાણવું ખૂબ જ મહત્વપૂર્ણ છે કે તમારું નામ મતદાર યાદીમાં છે કે નહીં. જો છે તો વોટર સ્લીપ(Voter Slip) કેવી રીતે મેળવી શકાય છે? આ માટે તમારે ક્યાંય જવાની જરૂર નથી. વોટર સ્લીપને ઓનલાઈન ડાઉનલોડ કરવાની સરળ રીત આજે અમે આપને જણાવીશું.
ગુજરાતની 93 બેઠકો પર આજે મતદાન
આજે મધ્ય ગુજરાત અને ઉત્તર ગુજરાતની 93 બેઠકો પર સવારના 8 વાગ્યાથી મતદાન પ્રક્રિયા શરૂ થઈ ગઈ છે. રાજ્યના 14 જિલ્લાના 26 હજાર 409 મતદાન મથકો પર મતદાન શરૂ થયું છે. જેમાં 8,533 શહેરી મતદાન મથકો અને 17 હજાર 876 ગ્રામ્ય વિસ્તારના મતદાન મથકોનો સમાવેશ થાય છે. આજે 14 જિલ્લાના 2 કરોડ 51 લાખ 58 હજાર 730 મતદારો પોતાના મત્તાધિકારનો ઉપયોગ કરશે. બીજા તબક્કાની 93 બેઠકો પર કુલ 833 ઉમેદવારો મેદાનમાં છે. બીજા તબક્કામાં મુખ્યમંત્રી, 8 મંત્રી અને 60 સિટીંગ ધારાસભ્યો સહિત ભાજપ, કોંગ્રેસ-NCP અને આપના 279 ઉમેદવારો સહિત કુલ 833 ઉમેદવારોનું ભાવિ EVMમાં સીલ થશે. આગામી 8મી ડિસેમ્બરના રોજ મતગણતરી હાથ ધરવામાં આવશે.
વોટર સ્લીપ ડાઉનલોડ કરવી એકદમ સરળ
ઇલેક્શન કમિશન ઓફ ઇન્ડિયા (ECI)એ વોટર લિસ્ટમાં નામ સર્ચ કરવા અને વોટર સ્લીપ ડાઉનલોડ કરવાની પ્રોસેસને એકદમ સરળ બનાવી દીધી છે. પોલિંગ બૂથ, તારીખ અને લોકેશન જેવી તમામ વિગતોની સાથે વોટર સ્લીપ હવે ચૂંટણી પંચની સાઈટ પરથી સરળતાથી ડાઉનલોડ કરી શકાશે. અહીં તમારું નામ સર્ચ કરવા અને વોટર સ્લીપ ઓનલાઈન ડાઉનલોડ કરવાની સ્ટેપ-બાય-સ્ટેપ પ્રોસેસ અમે આપને જણાવીશું...
વોટર સ્લીપ ડાઉનલોડ કરવાની પ્રોસેસ
- નેશનલ વોટર સર્વિસ પોર્ટલ (NVSP)ની વેબસાઈટ https://www.nvsp.in પર જાવ.
- સર્ચ ઈન ઇલેક્ટોરલ રોલ ટેબ પર ક્લિક કરો.
- એક નવું વેબપેજ ખુલશે, જ્યાં તમે બે રીતે વોટર લિસ્ટમાં તમારું નામ ચેક કરી શકો છો.
પ્રથમ રીત
- આ વિકલ્પમાં તમારે તમારું નામ, પિતા/પતિનું નામ, ઉંમર/જન્મ તારીખ અને કેટેગરી દાખલ કરવાની રહેશે.
- આ માહિતી દાખલ કર્યા બાદ તમારે તમારા રાજ્યનું નામ, જિલ્લો અને વિધાનસભા ક્ષેત્રને સિલેક્ટ કરવાનું રહેશે.
બીજી રીત (EPIC નંબરથી સર્ચ કરો)
- આ પ્રોસેસમાં તમારે તમારો EPIC નંબર (ચૂંટણી કાર્ડ નંબર) અને રાજ્યનું નામ દાખલ કરવું પડશે.
- તમને તમારા ચૂંટણી કાર્ડમાં ઉપરની તરફ EPIC નંબર જોવા મળશે.
- આ બધી વિગતો દાખલ કર્યા પછી સાઇટ તમને તમારી વિગતોના આધારે મતદારની માહિતી બતાવશે.
- જો તમારું નામ મતદાર યાદીમાં નથી, તો તમને 'નો રેકોર્ડ' એવું જોવા મળશે.
SMS દ્વારા મતદાર યાદીમાં આ રીતે તપાસો તમારું નામ
- મોબાઈલ મેસેજ સેક્શનમાં EPIC ટાઈપ કરો.
- તમારા ચૂંટણી કાર્ડનો નંબર દાખલ કરો.
- આ SMS 9211728082 અથવા 1950 પર મોકલો.
- તમારા મતદાન કેન્દ્રનો નંબર અને નામ તમારા ફોનની સ્ક્રીન પર પ્રદર્શિત થશે.
- જો તમારું નામ મતદાર યાદીમાં નથી, તો તમને 'નો રેકોર્ડ' એવું જોવા મળશે.