વિક્રમ સંવત વર્ષ 2075 હવે તેના છેલ્લા ગાળામાં પહોંચ્યું છે. દિવાળી નજીક છે અને લોકો વીતેલા વર્ષને ખંખેરીને નવા વર્ષને આવકારવા થનગની રહ્યા છે તો આવો જાણીએ આ વર્ષે કેવી રહી છે દેશમાં આર્થિક અને નાણાકીય હિલચાલ!
આ વર્ષે સેન્સેક્સ 11.6% વધ્યો
સોનું 20% ઉછળ્યું
રૂપિયો 3.5% મજબૂત થયો
સંવત 2075નું વર્ષ દલાલો માટે એક ખુબ મુશ્કેલ વર્ષ તરીકે યાદ રાખવામાં આવશે. આશ્ચર્યજનક રીતે આ વર્ષે સેન્સેક્સ અને નિફટી બંને બે આંકડાની ટકાવારીમાં વધારો નોંધાવીને તેમના ઓલ ટાઈમ હાઈ સુધી પહોંચ્યા હતા. બોમ્બે સ્ટોક એક્સચેન્જના માર્કેટ કેપિટલમાં 8 લાખ કરોડનો ઉછાળો નોંધાયો હતો અને SIP વડે મ્યુચ્યુઅલ ફંડમાં પણ વધારો નોંધાયો હતો.
આ વર્ષે સેન્સેક્સ 11.6% વધ્યો હતો, સોનું 20% ઉછળ્યું હતું અને રૂપિયો 3.5% મજબૂત થયો હતો આમ છતાં રિટેલ ઇન્વેસ્ટરો જેમાં સૌથી વધુ રોકાણ કરે છે તેવા મીડ અને સ્મોલ કેપિટલ માર્કેટમાં મોટું ગાબડું પડ્યું હતું. મીડ કેપિટલ ઇન્ડેક્સ 2.6% અને સ્મોલ કેપિટલ ઇન્ડેક્સ તોતિંગ 8.8% ઘટ્યો હતો.
આ વર્ષે દેશમાં ક્રેડિટની કમી સર્જાતા અને મજબૂત ગણાતી કંપનીઓ અને બેંકોએ નાદારી નોંધાવતા રોકાણકારોનો વિશ્વાસ ડગી ગયો હતો.
ક્રેડિટની કમીના લીધે કોર્પોરેટમાં પેમેન્ટ્સની ચુકવણી સતત પાછી ઠેલાવાના કારણે અને નોન બેન્કિંગ નાણા ધીરનાર સંસ્થાઓ (NBFC)ના પતનના કારણે દેશના GDPનો વૃદ્ધિ દર પહેલા ક્વાર્ટરમાં ગબડીને ઘણા વર્ષોના તળિયે જઈ બેઠો જેની સાથે મેન્યુફેક્ચરિંગ સેક્ટરનો રકાસ વળી ગયો. આ ઉપરાંત રિયલ એસ્ટેટમાં મંદીના પગલે સહકારી બેંકોમાં પણ ઘણી સમસ્યાઓ ઉભી થઇ જેના લીધે રોકાણકારો વધુ નકારાત્મક બન્યા.
જો કે સારા સમાચારમાં લોકસભા 2019ના પરિણામોમાં સરકારને મળેલી પૂર્ણ બહુમતીએ રોકાણકારોમાં સ્થિર સરકાર આવવાથી ઉત્સાહ વધારી દીધો. આ ઉપરાંત કોર્પોરેટ ટેક્સ કટની જાહેરાત કરીને સરકારે પોતાના આર્થિક ઉદારીકરણના પગલાંને આગળ વધાર્યા.
આંતરરાષ્ટ્રીય રીતે USA અને ચીનના ટ્રેડ વોર, બ્રેક્ઝિટ, સાઉદી અરેબિયાના અરામકો ઉપર ડ્રોન હુમલો, હોંગ કોંગ રાજકીય કટોકટી વગેરે વિષયો ભારતીય માર્કેટ ઉપર આખું વર્ષ અસરકારક રહ્યા.
આ વર્ષે ફોરેન પોર્ટફોલિયો ઇન્વેસ્ટર્સ FPIs વડે 1.1 લાખ કરોડ જેટલું જ રોકાણ થયું પરંતુ મ્યુચ્યુઅલ ફંડમાં સ્ટોક્સ અને ડેટનું કુલ 6.3 લાખ કરોડનું રોકાણ નોંધાયું હતું.
ઇન્વેસ્ટમેન્ટ એક્સપર્ટસના મતે વિક્રમ સંવત વર્ષ 2076ની શરૂઆતથી જ 2075ની પરિસ્થિતિ સુધારવા લાગશે તેવી અપેક્ષા રાખે છે. સરકારના કોર્પોરેટ ટેક્સ કટ અને પર્સનલ ઇન્કમ ટેક્સ ઘટવાની અપેક્ષાના પગલે રોકાણકારો નવા વર્ષની સારી શરૂઆત તરફ મીટ માંડીને બેઠા છે.