હાથરસ ગેંગ રેપકાંડમાં એન્ફોર્સમેન્ટ ડિરેક્ટોરેટ (ED) દ્વારા એક ચોંકાવનારો પર્દાફાશ કરવામાં આવ્યો છે. ઇડીના પ્રારંભિક રિપોર્ટ અનુસાર હાથરસ ગેંગ રેપકાંડની આડમાં જાતિગત રમખાણ ભડકાવવા માટે પોપ્યુલર ફ્રન્ટ ઓફ ઇન્ડિયા (PPF)ને મોરેશિયસથી રૂ.પ૦ કરોડ મળ્યા હતા. ઇડીએ એવો દાવો કર્યો છે કે સંપૂર્ણ ફંડિંગ રૂ.૧૦૦ કરોડથી વધુ રકમનું હતું. ઇડી આ સમગ્ર મામલામાં તપાસ કરી રહ્યું છે.
હાથરસ ગેંગ રેપકાંડના બહાને ઉત્તરપ્રદેશને ભડકે બાળવા માટે વિદેશી નાણાંભંડોળનો મામલો સામે આવ્યા બાદ ઇડી સહિતની તપાસ એજન્સીઓ અને સુરક્ષા એજન્સીઓ સક્રિય થઇ હરકતમાં આવી ગઇ છે. પોલીસે ઉત્તર પ્રદેશ જાતિગત સંઘર્ષની સાિજશને લઇ પોતાની તપાસનો દાયરો વધારી દીધો છે અને હવે તેમાં ઇડી પણ સામેલ થઇ ગઇ છે.
વેબસાઇટ દ્વારા ફંડિંગના મામલામાં ઇડીએ હાથરસમાં દાખલ એક એફઆઇઆરને આધાર બનાવી તપાસ શરૂ કરી દીધી છે. આ કેસમાં હવે ઇડી ટૂંક સમયમાં મની લોન્ડરિંગનો કેસ પણ દાખલ કરવાની તૈયારીમાં છે.
વાસ્તવમાં પ્લેટફોર્મ કાર્ડ ડોટ.કોમ મારફતે વેબસાઇટ બનાવવામાં આવી હતી અને આ વેબસાઇટ દ્વારા હાથ ધરવામાં આવેલી તમામ પ્રવૃત્તિની તપાસ શરૂ કરી દેવામાં આવી હતી. આ વેબસાઇટ દ્વારા સોશિયલ મીડિયા પર ભ્રામક અને વાંધાજનક પોસ્ટ કરવામાં આવી હતી.