છેલ્લા થોડાં દિવસોથી શોર્ટ વીડિયો મેકિંગ પ્લેટફોર્મ ટિકટોક અને યૂટ્યૂબની વચ્ચે બબાલ ચાલી રહી છે. આ દરમિયાન ટિકટોક કન્ટેન્ટ ક્રિએટર ફેઝલ સિદ્દીકીનો એસિડ એટેકને સમર્થન આપતો વીડિયો વાયરલ થયા બાદ ઈન્ડિયન નેટીઝન્સ તેના પર પ્રતિબંધ મૂકવાની માંગ કરી રહ્યાં છે. ફૈઝલ સિદ્દીકી મુશ્કેલીઓમાં પડી ગયો છે. તેની વિરુદ્ધ ટ્વિટર પર લોકોનો ગુસ્સોનો વધી રહ્યો છે.
થોડાં દિવસોથી ટિકટોકને લઈને ચાલી રહી છે બબાલ
ટિકટોક પર એસિડ એટેકને પ્રોત્સાહન આપતો વીડિયો વાયરલ થયો
ટિકટોકને બેન કરવાની થઈ રહી છે માંગ
હકીકતમાં ટિકટોક પર શેર કરેલો આ વીડિયો એસિડ એટેકને સમર્થન કરતો જોવા મળી રહ્યો છે. વીડિયો ક્રિએટર ફેઝલ સિદ્દીકીના ટિકટોક પર 13 મિલિયનથી વધુ ફોલોઅર્સ છે. તેણે એવો વીડિયો બનાવ્યો હતો, જે કથિત રીતે એસિડ એટેકનું સમર્થન દર્શાવે છે. આ વીડિયોમાં ફેઝલ લિક્વિડથી ભરેલો એક ગ્લાસ લે છે અને તેને તેની ગર્લફ્રેન્ડ પર નાખી દે છે. વીડિયોના અંતમાં છોકરીના ચહેરા પર નિશાન દેખાડવામાં આવે છે.
રાષ્ટ્રીય મહિલા આયોગ (NCW)એ સોમવારે કહ્યું કે, તેમણે ટિકટોકને એક વીડિયો વિશે લખ્યું છે, જેમાં ટિકટોકના એક યુઝરે કથિત રીતે મહિલાઓ પર એસિડ એટેક અને અપરાધને દર્શાવતા વીડિયો બનાવ્યો છે. તમને જણાવી દઈએ કે, આવા જ કેટલાક વીડિયો ક્લિપ્સ ટ્વિટર પર સામે આવ્યા છે જે મહિલાઓ પર યૌન શોષણને પ્રોત્સાહન આપી રહ્યા છે.
આવા વીડિયો સામે આવ્યા બાદ નેટિઝન્સ #BanTikTokinIndiaની સાથે ટ્વિટ કરવા લાગ્યા અને આ ટ્રેન્ડ કરવા લાગ્યું છે. અહીં ઘણાં એવા ફોટોઝ અને સ્ક્રીનશોટ શેર કરવામાં આવ્યા છે જેમાં લખ્યું છે કે, અમે માત્ર નેગેટિવ રેટિંગ આપવા માટે આ એપને ડાઉનલોડ કરી હતી. એપલ એપ સ્ટોર અને ગૂગલ પ્લે સ્ટોર પર ટિકટોક 1 સ્ટાર રિવ્યૂઝથી છલકાઈ ગયું છે. ટિકટોક એપને 1 સ્ટાર રિવ્યૂઝ મળ્યા બાદ ગૂગલ પ્લે સ્ટોર પર તેનું રેટિંગ સ્ટાર્સથી ઘટીને 2 સ્ટાર પર પહોંચી ગયું છે. આ સિવાય ટિકટોક કન્ટેન્ટ ક્રિએટર્સ અને યૂટ્યૂબ કન્ટેન્ટ ક્રિએટર્સ સામસામે આવી ગયા છે.