નિર્ણય / કેન્દ્રના આદેશને ઘોળીને પી ગઇ આ રાજ્યની ભાજપ સરકાર, 27 જુલાઇથી શરૂ કરશે શાળાઓ

• હરિયાણા સરકારનો મહત્વનો નિર્ણય
• 27 જુલાઇથી રાબેતા મુજબ થશે શાળાઓ
• કેન્દ્ર સરકારના ગાઇડલાઇન વિરૂદ્ધ જઇ લેવાયો નિર્ણય

હરિયાણાના શિક્ષણમંત્રી કંવર પાલે સોશિયલ મીડિયા પર જણાવ્યું હતું કે, રાજ્યની શાળાઓમાં 1 જુલાઇથી 26 જુલાઇ સુધી ગરમીને કારણે રજાઓ જાહેર કરવામાં આવી હતી અને 27 જુલાઇથી ફરીથી રાબેતામુજબ થશે. આ નિયમ શિક્ષકો અને વહીવટી કર્મચારીઓ માટે લાગુ થશે. 

વિદ્યાર્થીઓનો અગાઉના માર્ક્સ પ્રમાણે અપાશે પ્રમોશન

ઉલ્લેખનીય છે કે, હરિયાણા સરકારે તાજેતરમાં જાહેરાત કરી કે રાજ્યમાં આવતા મહિને ઉચ્ચ શિક્ષણ અને તકનીકી શિક્ષણની પરીક્ષાઓ નહીં યોજાય અને વિદ્યાર્થીઓને આંતરિક અને અગાઉની પરીક્ષાઓના આધારે આગામી સેમેસ્ટરમાં પ્રમોશન આપવામાં આવશે. આ માહિતી રાજ્યના શિક્ષણ પ્રધાન કંવર પાલે આપી હતી. આ સાથે શિક્ષણમંત્રીએ નિવેદનમાં કહ્યું હતું કે, જો યુનિવર્સિટી ઇચ્છે અને તૈયારી હોય તથા સાધનો હોય તો તો તેઓ ઓનલાઇન પરીક્ષા લઇ શકે છે, પરંતુ તમામ વિદ્યાર્થીઓ આવી પરીક્ષા આપી શકે તે સુનિશ્ચિત કરવું જોઈએ.

કેન્દ્ર સરકારની માર્ગદર્શિકાનું કર્યું ઉલ્લંઘન

'અનલોક -1' પછી, સરકારે સોમવારે રાત્રે 'અનલોક -2' માટે માર્ગદર્શિકા જાહેર કરી છે. તેમાં કહેવામાં આવ્યું છે કે 31 જુલાઇ સુધી તમામ શૈક્ષણિક સંસ્થાઓ, શાળાઓ અને કોલેજો બંધ રહેશે. જોકે, હરિયાણા સરકારે 27 જુલાઇથી રાજ્યની તમામ શાળાઓ ખોલવાનો નિર્ણય કર્યો છે, પરંતુ રાજ્યની કોલેજો 31 જુલાઈ સુધી બંધ રહેશે.