ખેડૂત આંદોલન છેલ્લા બે મહિનાથી પણ વધુ સમયથી ચાલી રહ્યું છે ત્યારે હવે હરિયાણાની સરકાર પર ફરીવાર સંકટના વાદળ છવાયા છે.
ખેડૂતો આંદોલનનું એપીસેન્ટર બન્યું ગાજીપુર
હરિયાણામાં ભાજપની સાથે સરકાર ચલાવતી પાર્ટી પર વધી રહ્યું છે દબાણ
દુષ્યંત ચૌટાલાના નાના ભાઈએ ખૂલીને રાકેશ ટીકૈતનું સમર્થન કર્યું
ગઠબંધનમાં ચાલી રહી છે સરકાર
કૃષિ કાયદાનો વિરોધ અને ખેડૂત આંદોલન હવે સરકાર જ નહીં પણ ભાજપ માટે પણ માથાનો દુખાવો સાબિત થઈ રહ્યા છે. હરિયાણામાં શરૂઆતથી જ આંદોલનની સૌથી વધારે અસર દેખાઈ રહી છે. આ રાજ્યમાં ભાજપ ગઠબંધનમાં સરકાર ચલાવી રહી છે. જોકે હજુ સુધી હરિયાણાના સીએમ અને ડેપ્યુટી સીએમ વચ્ચે કોઈ મોટો વિવાદ જોવા મળ્યો નથી પરંતુ હવે ભાજપની સાથે સરકાર ચલાવી રહેલ જજપા પાર્ટી પર દબાણ વધી રહ્યું છે.
ટીકૈતને ગણાવ્યા સાચા દેશભક્ત
એક દિવસ પહેલા જ ડેપ્યુટી સીએમ દુષ્યંત ચૌટાલાનઆ નાના ભાઈ દિગ્વિજય ચૌટાલાએ રાકેશ ટીકૈતનું ખુલ્લુ સમર્થન કર્યું હતું. તેમણે ટીકૈતને સાચા દેશભક્ત ગણાવ્યા અને કહ્યું કે તેમણે હંમેશા ખેડૂતોના હિતમાં વાત કરી છે. જૉ સરકારે કાર્યવાહી કરવી હોય તો ચઢૂની જેવા લોકોને પકડવા જોઈએ જેમણે લોકોને ભડકાવ્યા છે. પણ રાકેશ ટીકૈત ખેડૂત અને સાચા દેશભક્ત છે.
જજપા પર વધ્યું દબાણ
નોંધનીય છે કે ખેડૂત આંદોલન જેમ જેમ વિકરાળ બની રહ્યું છે તેમ હવે જાટોનું સમર્થન કરવા માટે દુષ્યંત ચૌટાલા પર દબાણ વધી રહ્યું છે. રાજ્યની વિપક્ષી પાર્ટીઓ અને ખેડૂતો તરફથી દુષ્યંત પર દબાણ બનાવવામાં આવી રહ્યું છે.
અભય સિંહ ચૌટાલા પણ ગાજીપુર પહોંચ્યા
નોંધનીય છે કે આ પહેલા હરિયાણાના વરિષ્ઠ નેતા અને પાર્ટીના નેતા અભય સિંહ ચૌટાલાએ ટીકૈતનું ખુલ્લુ સમર્થન કર્યું અને આજે ગાજીપુર પર રાકેશ ટીકૈતના સમર્થનમાં પહોંચ્યા હતા. તેમણે કૃષિ કાયદાના વિરોધમાં ધારાસભ્ય પદથી રાજીનામું અપાયું હતું. તેમણે કહ્યું હતું કે મોટી સંખ્યામાં ખેડૂતો ગાજીપુર બોર્ડર પર ભેગા થઈ રહ્યા છે.
નોંધનીય છે કે હરિયાણામાં 90 ધારાસભ્યોમાંથી 50 ખેડૂત પરિવારથી સંબંધ ધરાવે છે. એવામાં આંદોલનના કારણે દરેક પાર્ટીને અસર થાય છે અને ભાજપ પર ખાસ દબાણ વધી રહ્યું છે. કેટલાય અપક્ષ ધારાસભ્યોએ સરકારથી સમર્થન પાછું ખેંચી લીધું છે.