દેશભરમાં જ્યાં પેટ્રોલ-ડીઝલની કિંમતો જ્યારે ભડકે બળી રહી છે અને લોકો ત્રાહિમામ પોકારી ઉઠયા છે, ત્યારે હવે ભાજપના મુખ્યપ્રધાને એક વિવાદિત નિવેદન આપ્યું છે.
દેશમાં સતત વધી રહ્યા છે પેટ્રોલ-ડીઝલના ભાવ
વિપક્ષ સતત સરકાર પર કરી રહ્યું છે પ્રહાર
દેશના ઘણા શહેરોમાં પેટ્રોલ 100 રૂપિયાની પાર પહોંચી ગયું છે
છેલ્લા કેટલાક સમયથી દેશભરમાં પેટ્રોલ અને ડીઝલની કિંમતો સતત વધી રહી છે. રાજસ્થાનના મધ્યપ્રદેશના ઘણા જિલ્લાઓમાં પેટ્રોલના ભાવ પ્રતિ લીટર 100 રૂપિયાને પાર કરી ગયા છે. વિપક્ષ વધતા જતા ભાવને લઈને સતત સરકાર પર માછલાં ધોઈ રહ્યું છે, ત્યારે હરિયાણાના મુખ્યમંત્રી મનોહર લાલ ખટ્ટર તેને મોટો વધારો માનતા નથી. મુખ્ય પ્રધાન ખટ્ટરે રવિવારે કહ્યું હતું કે છેલ્લા 4 થી5 વર્ષમાં તેલના ભાવમાં લગભગ 10% થી 15% નો વધારો થયો છે. એકંદરે આ વધારો વધુ ન કહેવાય, પરંતુ સરકાર તેને જોઈ રહી છે.
લોકો પર જ સરકારની આવક ખર્ચ કરવામાં આવે છે : ખટ્ટર
હરિયાણાના મુખ્યમંત્રી ખટ્ટરે કહ્યું કે સરકાર દ્વારા જે પણ આવક એકત્રિત કરવામાં આવે છે તે આખરે લોકોના ઉપયોગમાં ખર્ચ કરવામાં આવે છે. હરિયાણામાં અન્ય રાજ્યોની તુલનાએ પેટ્રોલ પરનો વેટ ઘણો ઓછો છે. નોંધનીય છે કે કેન્દ્ર સરકાર ઉપરાંત રાજ્ય સરકારો પણ પેટ્રોલ અને ડીઝલ પર ટેક્સ લાવે છે. આ ટેક્સ સ્લેબ અલગ અલગ રાજ્યોમાં અલગ અલગ હોય છે.
પેટ્રોલ અને ડીઝલની વધતી કિંમતો વચ્ચે વિપક્ષ સતત સરકાર વિરુદ્ધ હુમલો કરી રહ્યો છે. રવિવારે કોંગ્રેસ અધ્યક્ષ સોનિયા ગાંધીએ પણ વડા પ્રધાન નરેન્દ્ર મોદીને પત્ર લખીને ભાવ ઘટાડવાની માંગણી કરી હતી. આ પત્ર દ્વારા તેમણે આરોપ લગાવ્યો છે કે લોકોના દુ:ખ અને વેદનાને દૂર કરવાને બદલે તેઓની વેદના વધારીને સરકાર નફાખોરી કરી રહી છે.
બંગાળ સરકારે કરી મહત્વની જાહેરાત
બીજી તરફ, પશ્ચિમ બંગાળની સરકારે રવિવારે પેટ્રોલ અને ડીઝલ પરના ટેક્સમાં એક રૂપિયાના ઘટાડાની ઘોષણા કરી હતી, જે આજે મધ્યરાત્રિથી લાગુ થશે. રાજ્યના નાણાં પ્રધાન અમિત મિત્રાએ કહ્યું હતું કે આ પગલાથી લોકોને બળતણના ભાવમાં થયેલા વધારાથી થોડી રાહત મળશે.
નોંધનીય છે કે છેલ્લા કેટલાક દિવસોથી પેટ્રોલ અને ડીઝલની કિંમતોમાં આસમાની વધારો થયો છે. જોકે, આજે કિંમતોમાં કોઈ વધારો કરવામાં આવ્યો ન હતો, પરંતુ છેલ્લા ઘણા દિવસોથી સતત કિંમતોમાં વધારો કરવામાં આવ્યો છે. દિલ્હીમાં હાલમાં પેટ્રોલ 90.58 રૂપિયા પ્રતિ લિટર પર વેચાઈ રહ્યું છે, જ્યારે ડીઝલની કિંમત પ્રતિ લિટર 80.97 રૂપિયા છે.