ખેતર થયું ખાખ / જગતના તાતનો ઉભો પાક સેકન્ડોમાં બળીને ખાખ થઇ ગયો, ખેડાના ખેડૂતની મહેતન પર પાણી ફરી વળ્યું

ખેડૂતનો પાક બળીને ખાક
ઘંઉનો તૈયાર પાક બળીને ખાક
વીજ લાઈનના કારણે નુકસાન

ખેડા જિલ્લામાં ખેડૂતની મહેનત આગના કારણે ખાખ બની ગઈ છે. ઠાસરાના હરિપુર ગામે ખેતરમાં ઘઉંનો તૈયાર પાક બળીને ખાખ થઈ ગયો છે. ખેતર પરથી પસાર થતી વીજ લાઇનમાં શોર્ટ સર્કિટ થઈ હતી. વીજ લાઈનમાં શોર્ટ સર્કિટના તણખા ઘઉંના પાકમાં પડતા આગ લાગી હતી. અને સમગ્ર પાકને નુકસાન થયું છે. ખેડૂતોએ ઈમરજન્સી સેવા 101માં ફોન કરવા છતાં કોઈ જવાબ મળ્યો નહોતો. વીજ લાઈનના કારણે ત્રણ વિઘા ઉપરાંત જમીનમાં ઘઉંનો પાક બળીને ખાખ થઈ ગયો છે. મહામહેનતે ખેડૂતના હાથમાં આવેલો કોળિયો પણ ઝૂંટવાઈ ગયો છે. 

તો આ તરફ સૌરાષ્ટ્રમાં મગફળીના ગોડાઉનમાં આગ લાગી હતી. જો કે, સૌરાષ્ટ્રના ગોડાઉનમાં આગ લાગવી કોઈ નવી વાત નથી. ત્યારે ફરી એક વખત આગનાં એપિસેન્ટર બનેલા ગોંડલમાં મગફળીના ગોડાઉનમાં આગ ભભૂકી ઉઠી છે. ગોંડલ નજીક આવેલ મગફળીના ગોડાઉનમાં આગની ઘટના સામે આવી હતી.

મગફળીના ગોડાઉનમાં અચાનક આગ લાગતાં ભાગદોડ મચી ગઇ હતી. હાલ ગોંડલ ફાયર વિભાગનો કાફલો ઘટનાસ્થળે પહોંચ્યો છે અને આગ પર કાબૂ મેળવવા પ્રયાસો શરૂ છે. જોકે મગફળીના ગોડાઉનમાં આગની ઘટનાથી ફરી એક વખત ચર્ચા જાગી છે. કારણ કે ભૂતકાળમાં ગોંડલ આસપાસ અનેક મગફળીના ગોડાઉનમાં ભ્રષ્ટાચારની આગો ભભૂકી હતી.