નિવેદન / AAPનો ચહેરો બનશે? હાર્દિક પટેલે ફેસબુક પોસ્ટ પર કર્યો મોટો ધડાકો

• - આમ આદમી પાર્ટીમાં જોડાવાની વાતો પર હાર્દિક પટેલની સ્પષ્ટતા 
• - ચૂંટણી પહેલા ભાજપ દ્વારા ફેક ન્યૂઝ ફેલાવાઈ : હાર્દિક પટેલ 
• - ગુજરાતના સમાજ, કોંગ્રેસ કાર્યકર્તાઓમાં કન્ફ્યુઝન પેદા કરવા કાવતરું : હાર્દિક પટેલ 
• - ગાંધીપરિવાર મારા જેવા યુવાનોને આપે છે તક, 2022માં અમને મળશે બહુમત : હાર્દિક

ગુજરાતમાં આમ આદમી પાર્ટી આગામી વિધાનસભા ચૂંટણી માટે તડામાર તૈયારી કરી રહી છે. આજે આમ આદમી પાર્ટીના સુપ્રીમો અરવિંદ કેજરીવાલ ગુજરાતના પ્રવાસે હતા ત્યારે તેમને મોટો દાવો કર્યો છે કે આગામી સમયમાં પાર્ટી ગુજરાતમાં મોટો વિકલ્પ બનીને સામે આવશે. એવામાં કેટલાક મીડિયા અહેવાલમાં હાર્દિક પટેલને લઈને મોટા મોટા દાવા કરવામાં આવી રહ્યા હતા જેના પર હાર્દિક પટેલે પોતે સ્પષ્ટતા કરી છે. 

હાર્દિક પટેલે કરી સ્પષ્ટતા 
નોંધનીય છે કે છેલ્લા ઘણા દિવસથી એવા સમાચાર વહેતા થયા હતા કે કોંગ્રેસના ગુજરાત કાર્યકારી અધ્યક્ષ હાર્દિક પટેલ ગમે ત્યારે આમ આદમી પાર્ટીમાં જોડાઈ શકે છે. હાર્દિક પટેલ આમ આદમી પાર્ટીના પાટીદાર ચહેરા તરીકે સામે આવશે તેવો દાવો હતો ત્યારે હાર્દિક પટેલે આ બધા જ દાવાઓને પોકળ ગણાવ્યા છે. હાર્દિક પટેલે ફેસબુક પોસ્ટ દ્વારા સમગ્ર મામલે ખુલાસો કર્યો છે. 

કોંગ્રેસમાં જ રહેશે હાર્દિક પટેલ
હાર્દિક પટેલે કહ્યું કે કોંગ્રેસ કાર્યકર્તાઓમાં મૂંઝવણ પેદા કરવા માટે જુદા જુદા માધ્યમથી ભાજપ દ્વારા આ પ્રકારની ફેક ન્યૂઝ ફેલાવવામાં આવી રહી છે. કોંગ્રેસના 130 વર્ષના ઇતિહાસમાં હું સૌથી યુવાન પ્રદેશ અધ્યક્ષ છું અને વર્ષ 2022માં અમે સોનિયા ગાંધી અને રાહુલ ગાંધીના નેતૃત્વમાં સરકાર બનાવીશું. કોંગ્રેસમાં યુવા ચહેરાઓને તક આપવામાં આવે છે અને હું તેનો ઉદાહરણ છું. 

હાર્દિક પટેલે કહ્યું કે આગામી સમયમાં ચૂંટણીમાં કોંગ્રેસ જ ભાજપનો વિકલ્પ બનશે અને 2022માં પૂર્ણ બહુમત સાથે સરકાર બનાવીશું.