હાર્દિક પટેલનો Exclusive ઇન્ટરવ્યૂઃ 'મારી સામે કોંગ્રેસનું કંઇ ન આવે ભાજપ હાલ ભારત વિરૂદ્ધ'

છેલ્લા કેટલાય સમયથી હાર્દિક પટેલને ચૂંટણી લડવા મુદ્દે ચર્ચાઓ ચાલી રહી છે ત્યારે લોકસભાની ચૂંટણી લડવા અંગે હાર્દિક પટેલે વીટીવી સાથેની વાતચિતમાં સ્પષ્ટતા કરી છે. હાર્દિક પટેલે પોતાના ઇન્ટરવ્યૂમાં જણાવ્યું કે હું ચોક્કસથી ચૂંટણી લડીશ. બંધારણે મને ચૂંટણી લડવાનો અધિકાર આપ્યો છે. આ ઉપરાંત હાર્દિકે જણાવ્યું કે ચૂંટણી ક્યાંથી લડવી તે હજુ નક્કી નથી. મારે જે કરવું છે તે ચૂંટણી લડ્યા વિના શક્ય નથી. સમસ્યાના સમાધાન માટે મારે ચૂંટણી લડવી છે. મહત્વનું છે કે છેલ્લા ઘણા સમયથી હાર્દિક પટેલે ચૂંટણી લડવા માટે હાના હાના કર્યા બાદ ચૂંટણી લડવા અંગે સ્પષ્ટતા કરી દીધી છે.

હાર્દિક પટેલનો Vtv પર ઇન્ટરવ્યૂ અનેક મુદ્દાઓને લઇને આપ્યા જવાબ
ખેડૂતોના મુદ્દે હાર્દિક પટેલે કહ્યું કે રાજ્યમાં ખેડૂતોને અન્યાય થઇ રહ્યો છે. ખેડૂતો માટે કોઇ બોલતુ નથી. આજે લોકો તમાશો જોઇ બોલતા જ નથી. ભણેલા લોકો પણ મૌનને પોતાની સમજદારી સમજે છે. દેશમાં અત્યાચાર સામે બોલવું સૌની ફરજ છે. 

ભાજપ પર પ્રહાર કરતા હાર્દિકે કહ્યું કે મારી લડાઇ ભારત સામે નહી ભાજપ સામે છે. ભાજપ હાલમાં ભારત વિરુદ્વ છે. વ્યક્તિગત લડાઇમાં નુકસાન વેઠવું પડે છે. જો કે ફાયદો દેશનાં સમગ્ર લોકોને થાય છે. અનામતની અમારી લડતનો લાભ દેશના 25 કરોડ લોકોને મળ્યો છે. હું માત્ર વર્તમાનનું જ વિચારું છું. ભૂતકાળ અને ભવિષ્યની ચિંતા મને નથી. ભાજપના રાજમાં અત્યાચાર સામે બોલવું એ રાજદ્રોહ છે. ભાજપ લોકોની સીડીઓ પણ બનાવે છે. BJPની સરકાર રિપિટ થશે તો મને સજા થશે. અમારી લડાઇથી લોકોમાં જાગૃતતા આવી છે. લોકો હવે પોતાની જવાબદારી સમજી છે.

વધુમાં તેમણે કહ્યું કે દેશમાં સત્તામાં રહેનાર લોકોને જ સવાલ કરવો જોઇએ. ગુજરાતમાં સામાજિક જાગરૂકતા નથી. એક જ પક્ષ 22 વર્ષથી શાસન કરે છે. ભારતની હરિફાઇ આગળના દેશો સામે છે. પાકિસ્તાન જેવા દેશો સામે ભારતની હરિફાઇ શું કામ થાય છે. ગુજરાતમાં દેવું વધી રહ્યું છે પણ કોઇ બોલતું નથી. ગુજરાતનું દેવું 3 લાખ કરોડ થઇ ગયું. ગુજરાતમાં ગામડાઓમાં વિકાસ નથી. રિવરફ્રન્ટ બનાવી દેવાથી વિકાસ નથી થઇ જતો. ખેડૂત પોતાના માટે નથી લડી શકતો. 

યુવાઓ વિશે હાર્દિકે કહ્યું કે યુવાનોમાં બેરોજગાર બન્યા છે. પેપરલીક મામલે એક પણ યુવાન રસ્તા પર ન ઉતર્યો. યુવાનો પોતાની લડાઇ નથી લડી રહ્યાં. વિદેશમાં જવા માગતા લોકોએ રાજ્ય અને દેશ માટે કામ કરવું જોઇએ. આજે ભણેલો યુવાના ચૂંટણી લડવા માગતો નથી. ધારાસભ્યો પણ આજે ખેડૂતોની વચ્ચે જ નથી જતા. આત્મહત્યા કરનાર ખેડૂતોના ઘરે ધારાસભ્ય નથી જતા. ખેડૂતો ચિંતામાં જ રોજની 22 રૂપિયાની બીડી પીવી છે. અદાણી અને રિલાયન્સના 3 લાખ કરોડથી વધુ રૂપિયા માફ કરાયા.

કોંગ્રેસને લઇને હાર્દિકે કહ્યું કે કોંગ્રેસ ખૂબ નબળી છે. મારી સામે કોંગ્રેસનું કંઇ ન આવે. વધુમાં તેમણે કહ્યું કે MOU કરેલી કંપનીઓ ગાયબ છે. 72 લાખ કરોડના MOU થયા બાદ રોકાણ નથી થયા. પોલીસ વિભાગમાં 50 ટકા જગ્યાઓ ખાલી છે. શિક્ષકોની ભરતી પુરતા પ્રમાણમાં નથી થતી. નવી સરકારી શાળાઓ બનાવાતી નથી. જેની સામે પ્રાઇવેટ શાળાઓને મંજૂરી આપવામાં આવી રહી છે. દેશમાં ખેડૂતો માટેનું કોઇ આયોગ નથી. ઉદ્યોગપતિઓને ધિરાણ બંધ કરવું જોઇએ. રાજ્યમાં 2 લાખ ચેકડેમ બનાવવાની જરૂર છે. લોકોને જે જોઇએ છે તે એમને પૂછવામાં જ નથી આવતું.