રાજકારણ / 28 વર્ષનો છોકરો કેવી રીતે ધમકાવી શકે', હાર્દિક પટેલે લાખા ભરવાડને આપ્યો સણસણતો જવાબ

• લાખા ભરવાડના આરોપ પર હાર્દિક પટેલની પ્રતિક્રિયા
• "28 વર્ષનો છોકરો કેવી રીતે ધમકાવે"
• "કોંગ્રેસની આદત છે બહાના કાઢવાની"

ગુજરાતની ચૂંટણીમાં કોંગ્રેસના અનેક સિટિંગ ધારાસભ્યોની હાર થઈ છે. આ હાર પર વિરમગામના પૂર્વ ધારાસભ્યએ ભાજપ પર ધાક-ધમકીઓ આપવાનો તથા સરકારી મશિનરીના દૂરપયોગ કર્યાનો આરોપ મુક્યો હતો. આ મામલે હાર્દિક પટેલની પ્રતિક્રિયા સામે આવી છે. જેમાં તેણે કહ્યુ કે, એક 28 વર્ષનો છોકરો કેવી રીતે કોઈને ધમકાવી શકે. હાર બાદ બહાના કાઢવાની કોંગ્રેસની આદત છે. વિરમગામમાં કોંગ્રેસના લાખા ભરવાડને 45 હજાર મત મળ્યા છે જેથી તેઓએ તે મતદારોનો આભાર વ્યક્ત કરવો જોઈએ.

લાખા ભરવાડના આરોપ પર હાર્દિક પટેલની પ્રતિક્રિયા
લાખા ભરવાડના નિવેદન પર હાર્દિક પટેલની પ્રતિક્રિયા સામે આવી છે. તેમણે કહ્યું કે, 28 વર્ષનો છોકરો કેવી રીતે ધમકાવી શકે અને કોંગ્રેસની પદ્ધતી છે કે હાર બાદ બહાના કાઢવા અને બધાને અધિકાર છે બહાના કાઢવાનો. તેમણે જણાવ્યું કે, વિરગામમાં કોંગ્રેસને 45 હજાર મત મળ્યા જેથી જનતાનો આભાર માનવો જોઈએ તેમણે કહ્યું કે, લોકતંત્રમાં આવું કંઈ હોવું ન જોઈએ અને એમાં લોકોથી મોટી કોઈ શક્તિ નથી અને તેમને જનતાનો આભાર માનવો જોઈ કે, તેમને 45 હજાર મત મળ્યા છે.

લાખા ભરવાડના શું હતા આરોપ
હાર્દિક પટેલની જીત થઈ ત્યાર બાદ લાખા ભરવાડે જણાવ્યું હતું કે, ચૂંટણી ટાણે ભાજપે સરકારી તંત્રનો દુરુપયોગ કર્યો છે. પૂર્વ ધારાસભ્ય લાખા ભરવાડે જણાવ્યું હતું કે, હાર્દિકભાઈએ આમ જનતા માટે કોઈ કામ કર્યું હોય એવું મને લાગ્યું નથી. ક્યારેય તેઓ છેલ્લા પાંચ વર્ષમાં સુખ-દુઃખના સાથી બનીને લોકોની વચ્ચે ગયા નથી. વિરમગામના મતદારો માટે અને લોકો માટે ક્યાંય લેખિતમાં રજૂઆત કરી હોય તેવું મારા ધ્યાને આવતું નથી. ભાજપની દબંગકારીનીતિના કારણે હાર્દિકભાઈને લાભ મળ્યો. ચૂંટણીમાં ભાજપે સરકારી તંત્રનો દુરુપયોગ કર્યો છે. હાર્દિક પટેલને લોકોના નહીં ડરના મત મળ્યા છે.

2017માં હારી ગયા હતા તેજશ્રીબેન 
વર્ષ 2017ની વિધાનસભાની ચૂંટણીમાં ભાજપની ટિકિટ પર ડોક્ટર તેજશ્રીબેન દિલીપકુમાર પટેલ મેદાનમાં ઉતર્યા હતા, પરંતુ તેમને કોંગ્રેસના લાખાભાઈ ભીખાભાઈ ભરવાડની સામે હારનો સામનો કરવો પડ્યો હતો. 2017માં કોંગ્રેસ ઉમેદવાર લાખા ભરવાડનો 6,548  મતોથી વિજય મેળવ્યો હતો.