રાજકોટમાં સંવિધાન બચાવો રેલીમાં હાર્દિક પટેલે વધુ એક વખત ચૂંટણી લડવા અંગે નિવેદન આપ્યું છે. હાર્દિક પટેલે જણાવ્યું કે 10 ટકા અનામતનો મુદ્દો પૂર્ણ છે.
માટે હવે ચૂંટણી તો લડીશ પણ કઈ પાર્ટીમાંથી અને કઈ જગ્યાએથી તે હજુ સુધી નક્કી નથી કર્યું. 2019માં ચૂંટણી લડીશ કે નહીં તે પણ નક્કી નથી. પણ ચૂંટણી જ્યારે પણ લડીશ ત્યારે ભાજપ વિરુદ્ધ જ લડીશ. હાર્દિક પટેલના આ પ્રકારના નિવેદનથી રાજકારણમાં ગરમાવો ફેલાયો હતો.
લોકસભા ચૂંટણી લડવાના મૂડમાં છે હાર્દિક
પાટીદાર અગ્રણી અને પાસના કન્વીનર હાર્દિક પટેલ આગામી લોકસભાની ચૂંટણી લડી શકે છે. આ જાણકારી નજીકના સૂત્રો પાસેથી પ્રાપ્ત થતાં ગુજરાતના રાજકારણમાં ગરમાવો ફેલાઇ જવા પામ્યો છે. સૂત્રો પાસેથી પ્રાપ્ત થયેલી વધુ વિગતો મુજબ પાસ આંદોલનના પ્રણેતા અને પાટીદાર નેતા હાર્દિક પટેલને ગુજરાતની અમરેલી બેઠક પરથી લોકસભાની ચૂંટણી લડવા અંગેની ઓફર મળી છે.
આપને જણાવી દઇએ કે આ ઓફર હાર્દિક પટેલને કોંગ્રેસ દ્વારા કરવામાં આવી હોવાનું પણ સૂત્રો દ્વારા માહિતી પ્રાપ્ત થઇ છે જો કે આ મામલે પાટીદાર નેતા હાર્દિક પટેલે કોઇ પ્રતિક્રિયા આપેલ નથી. જોકે આ પૂર્વે હાર્દિક પટેલના ચૂંટણી લડવા અંગે બે નિવેદન સામે આવી ચૂક્યા છે અને બન્ને નિવેદનમાં સામ્યતા છે.
વડોદરામાં હાર્દિક પટેલે થોડા મહિના અગાઉ એક નિવેદન આપ્યું હતું. જેમાં કોઈ રાજકીય પક્ષમાં જોડાયા બાદ ચૂંટણી લડવાની વાત કરી હતી. અગાઉ પાસના નેતા હાર્દિક પટેલે વડોદરામાં સુચક નિવેદન કર્યુ હતું અને 2019માં લોકસભાની ચૂંટણી લડવાનાં સંકેત આપ્યા હતાં. હાર્દિકે જણાવ્યું હતું કે ચૂંટણી લડીશ તો કોઇ રાજકીય પક્ષમાંથી લડીશ. ખેડુતો અને યુવાનોની રોજગારી મુદ્દે ચૂંટણી લડવાનાં સંકેત આપ્યા હતાં.
VTV સાથેની ખાસ મુલાકાતમાં ચૂંટણી લડવા અંગે કરી હતી આવી વાત
પાટીદાર અગ્રણી હાર્દિક પટેલે તાજેતરમાં VTV ને આપેલ ખાસ મુલાકાતમાં પણ લોકસભાની ચૂંટણી લડવા અંગે ખુલીને વાત કરતા જણાવેલ કે હું લોકસભાની ચૂંટણી લડવાનો છું પરંતુ ક્યાંથી અને ક્યાં પક્ષમાંથી તે હજુ સુધી સ્પષ્ટ નથી. ત્યારે આજે ફરી એકવાર હાર્દિક પટેલે આજરોજ રાજકોટ ખાતે યોજાયેલ સંવિધાન બચાવો રેલીમાં પણ તે જ વાતને દહોરાવી હતી.