ગાંધીનગર / હાર્દિક પટેલના જન ચેતના સંમેલન કાર્યક્રમમાં દિગ્ગજ નેતાઓ હાજર રહે તેવી શક્યતા

હાર્દિક પટેલના આ કાર્યક્રમને 'જન ચેતના સંમેલન' નામ આપવામાં આવ્યું છે. આમ હાર્દિક પટેલ આજરોજ ગાંધીનગર ખાતે પોતાનું શક્તિ પ્રદર્શન કરશે.  સૂત્રોને મળતી માહિતી મુજબ ગાંધીનગરના આ જન ચેતના બેનર હેઠળના કાર્યક્રમમાં અનેક દિગ્ગજ નેતાઓ પણ જોવા મળે તેવી શક્યતા છે. સૂત્રોને મળેલી જાણકારી મુજબ આ કાર્યક્રમમાં દિગ્ગજ નેતાઓને અગાઉથી જ આમંત્રણ આપવામાં આવી ચૂક્યું છે. રાજ્યભરના દરેક ગામમાંથી પ્રતિનિધિ આવે તેવું આયોજન કરવામાં આવ્યું છે.
 

આમ લોકસભા ચૂંટણીના પરિણામ બાદ રાજ્યમાં જ્યારે કોંગ્રેસ માટે કપરા દિવસો જોવા મળી રહ્યાં છે ત્યારે ફરી સક્રિય થવા હાર્દિક પટેલની આ રણનીતિ હોય તેવું લાગી રહ્યું છે. ઉલ્લેખનીય છે દેશભરના દિગ્ગજ નેતાઓ જો એક મંચ પર જોવા મળે તો રાજ્યના રાજકારણમાં ફરી ગરમાવો આવશે. ગુજરાતના રાજકારણમાં હાર્દિક પટેલ અંદાજે છેલ્લા ચારેક વર્ષથી ચર્ચામાં છે. 

 

નોંધનીય છે કે, 2012 ની આસપાસ સરદાર પટેલ ગ્રુપમાં હાર્દિક પટેલ જોડાયો હતો. ત્યાર બાદમાં પાટીદાર અનામત આંદોલનનો કન્વીનર બન્યો હતો. 2015માં અમદાવાદના જીએમડીસી ગ્રાઉન્ડમાં મોટું સંમેલન બોલાવ્યા બાદ હાર્દિક પટેલ ચર્ચામાં આવ્યો હતો. આંદોલનકારીમાંથી તે કોંગ્રેસના યુવા નેતા બન્યો અને 2019 લોકસભાની ચૂંટણીમાં હેલીકૉપ્ટરમાં ફરી પ્રચાર કાર્ય કર્યું હતું. 

આગામી દિવસોમાં કોંગ્રેસમાં રાષ્ટ્રીય સ્તરે નવી ટીમ બની રહી છે તેમાં હાર્દિક પટેલને મહત્વની જવાબદારી સોંપાશે તેવી ચર્ચા વચ્ચે આજના દિવસે હાર્દિક પટેલ ગાંધીનગરમાં જન ચેતના સંમેલનને સંબોધન કરી પોતાના રાજકીય જીવનને વધુ સાબિત કરવા પ્રયત્ન કરશે.