અવસાન / ભરૂચમાં સિવિલ હોસ્પિટલની નર્સિંગ કોલેજના વિદ્યાર્થી હાર્દિક પટેલનો આપઘાત

• નર્સિંગના વિદ્યાર્થીનો આપઘાત
• નર્સિંગના બીજા વર્ષમાં કરતો હતો અભ્યાસ 
• અગમ્ય કારણોસર ખાધો ગળે ફાંસો

ભરૂચ સિવિલ હોસ્પિટલના સંકુલમાં આવેલી નર્સિંગ કોલેજના બીજા વર્ષમાં અભ્યાસ કરતા વિદ્યાર્થીએ કોઈ અગમ્ય કારણોસર આપઘાત કર્યો છે. નવસારીના ચીખલીના પીપલ ગભાણ ગામના યુવકે ગળેફાંસો લગાવી આત્મહત્યા કરી લેતા ચકચાર મચી છે. ઘટનાની જાણ એ-ડિવિઝન પોલીસને કરાતા મૃતદેહ પોસ્ટમોર્ટમ અર્થે મોકલી આગળની તપાસ હાથ ધરી છે.

સમગ્ર ઘટના ભરૂચ સિવિલ હોસ્પિટલના સંકુલમાં આવેલી નર્સિંગ કોલેજમાં બોયઝ હોસ્ટેલના બીજા માળની છે. જ્યાં રૂમ નંબર 107માં નવસારીનો 19 વર્ષીય હાર્દિક પટેલ રહેતો હતો. હાર્દિક નર્સિંગના બીજા વર્ષમાં અભ્યાસ કરી રહ્યો હતો. જોકે હાર્દિક સાથે રહેતા રૂમમેટ કોરોના પોઝિટિવ આવતા તે પોતાના ઘરે ગયો હોય તે પોતાની રૂમમાં એકલો જ હતો.

સોમવારના રોજ બપોરના સમયે હાર્દિકે કોઈ અગમ્ય કારણોસર તેના બેડની ચાદરને કાપીને તેનો ગાળિયો બનાવ્યો હતો. અને રૂમના પંખા સાથે લગાવીને લટકીને આત્માહત્યા કરી લીધી હતી. જોકે હાર્દિકનો બપોરના સમયે ક્લાસ હોવાથી તે નહીં આવતા તેને ફોન કરતા તે ફોન પણ રિસીવ કરતો નહોતો. 2 વિદ્યાર્થીઓને તેના રૂમમાં તપાસ માટે મોકલતા સમગ્ર ઘટના સામે આવી હતી. 

તેનો રૂમ અંદરથી બંધ હોવાના કારણે વિદ્યાર્થીઓએ તેની બારીમાંથી અંદર નજર કરતા તે પંખા સાથે લટકતો જોવા મળતા બંને ચોકી ગયા હતા. બંને વિદ્યાર્થીઓએ ઘટનાની જાણ હોસ્ટેલ ઈન્ચાર્જને કરતા તેમણે એ-ડિવિઝન પોલીસમાં જાણ કરી હતી. 

પોલીસે તેના મૃતદેહને નીચે ઉતારી પોસ્ટમોર્ટમ અર્થે મોકલી પરિવારજનો જાણ કરી હતી. હાર્દિકના લોક મોબાઈલ ફોનને કબજામાં લઈને આગળની તપાસ હાથ ધરી છે. બીજી તરફ ચીખલીથી પરિવાર ભરૂચ આવવા નીકળી ગયો હતો. હાલ તો હાર્દિકના આપઘાત અંગે રહસ્ય અકબંધ છે. જે તેનો લોક મોબાઈલ અનલોક થયા બાદ ખુલી શકે તેવી શક્યતા રહેલી છે.