ભારત અને ઇંગ્લેન્ડ વચ્ચે રમાયેલી ટી20 મૅચમાં સોફ્ટ સિગ્નલને લઇને ઘણો મોટો વિવાદ થયો હતો. સુર્યકુમાર યાદવને આઉટ આપ્યા બાદ સોશ્યલ મિડીયા પર તે વાતને લઇને મોટી ચર્ચા થઇ હતી.
હાર્દિકની પત્ની નતાશાએ પોતાની ઇન્સ્ટાગ્રામ સ્ટોરી પર સુર્યકુમારની વાઇફ દેવિશા શેટ્ટીને ટ્રોલ કરી હતી. નતાશાએ ઇન્સ્ટાગ્રામ પર એક સ્ટોરી શૅર કરી હતી જેમાં સુર્યકુમારની વાઇફ દૂરબીન લઇને સ્ટેડિયમમાં દેખાઇ રહી હતી. તેમાં નતાશાએ લખ્યુ હતુ કે દેવિશા થર્ડ એમ્પાયરની શોધમાં. સોફ્ટ સિગ્નલ આપવાને કારણે સુર્યકુમાર આઉટ થયો હતો. બાદમાં થર્ડ એમ્પાયરને પણ પૂછવામાં આવ્યુ હતુ પરંતુ નિર્ણય સુર્યકુમારની વિરુદ્ધમાં આવ્યો હતો.
જે બાદ 19મી ઓવરમાં સુંદરને પણ સોફ્ટ સિગ્નલ આપવાને કારણે આઉટ કરી દેવામાં આવ્યો હતો, સુંદરે જે શોટ માર્યો હતો તેને આદિલ રશિદે કેચ કર્યો હતો. ફિલ્ડ પર રહેલા એમ્પાયરે સોફ્ટ સિગ્નલ આપ્યા બાદ થર્ડ એમ્પાયરને પૂછવામાં આવ્યુ હતુ. સોફ્ટ સિગ્નલ બાદ સુંદરને પણ આઉટ આપવામાં આવ્યો હતો. જ્યારે સાફ દેખાઇ રહ્યુ હતુ કે તેનો પગ બાઉન્ડ્રી પર લાગી ગયો હતો.
ભારતીય ટીમના કેપ્ટન વિરાટ કોહલી ગુરુવારે ઇંગ્લેન્ડ વિરુદ્ધ રમાયેલી ચોથી ટી20 મૅચમાં સોફ્ટ સિગ્નલ કોન્ટ્રોવર્સી પર નાખુશ છે.
સોફ્ટ સિગ્નલ હેઠળ ભારતના બે બેટ્સમેન સુર્યકુમાર યાદવ અને વોશિંગટન સુંદરને આઉટ આપવા પર નારાજગી વ્યક્ત કરી છે. તેણે મૅચ બાદ કહ્યું નિયમોને સરળ બનાવવા જોઇએ જેનાથી મૅચના નિર્ણયમાં કોઇને મનદુઃખ ન થાય.
કોહલીએ કહ્યું ટેસ્ટ સિરીઝમાં પણ આવુ જ થયુ હતુ. જ્યારે હું રહાણે પાસે ઉભો હતો ત્યારે તેણે કેચ પકડ્યો હતો પરંતુ તે એ વાતને લઇને અસ્વસ્થ હતો કે નિર્ણય થર્ડ એમ્પાયર પાસે ગયો. જો ફિલ્ડરને કેચને લઇને કોઇ ડાઉટ હોય તો સ્વેર લેગ પાસે ઉભેલા એમ્પાયર તેને કેવી રીતે સાફ જોઇ શકે છે. માટે સોફ્ટ સિગ્નલ ખુબ મહત્વનો થઇ ગયો છે અને આ નિયમમાં બદલાવ આવવો જોઇએ. એમ્પાયર પાસે મને ખબર નથીનો વિકલ્પ કેમ નથી. આ પ્રકારનો નિર્ણય મૅચની કાયાપલટ કરી શકે છે.
ક્યારે થયો વિવાદ
આ વિવાદની શરૂઆત 14મી ઓવરથી થઇ હતી. સુર્યકુમાર યાદવ 57 રન પર હતો અને તેણે ઇંગ્લેન્ડના બોલર સેમ કર્રનની બોલ પર પેડલ સ્વિપ રમી. બોલ ડીપ ફાઇન લેગ પર ઉભેલા ડેવિડ મલાન તરફ ગઇ હતી અને મલાને ડાઇવ કરીને કેચ પકડ્યો હતો. જો કે તેને કેચને લઇને શંકા હતી માટે તેણે થર્ડ એમ્પાયરની મદદ માંગી પરંતુ તે પહેલા આઉટનુ સોફ્ટ સિગ્નલ આપ્યુ હતુ. બાદમાં સુર્યકુમારને પેવેલિયન પરત ફરવુ પડ્યુ હતુ.
વોશિંગ્ટન સુંદર પણ સોફ્ટ સિગ્નલનો શિકાર
સુર્યકુમાર યાદવની જેમ વોશિંગ્ટન સુંદર પણ સોફ્ટ સિગ્નલનો શિકાર થયો હતો. તેણે જોફ્રા આર્ચરના બોલ પર થર્ડમેન તરફ શોટ રમ્યો હતો. ત્યાં ઉભેલા આદિલ રાશિદે બોલ પકડ્યો હતો, તે બાઉન્ડ્રી લાઇનની નજીક હતો તો તેને પણ સોફ્ટ સિગ્ન દ્વારા આઉટ કરી દેવામાં આવ્યો હતો.