ઘણા સમયથી ભારતીય ટીમથી દૂર હાર્દિક પંડ્યાએ ડી વાય પાટીલ ટી 20 ટૂર્નામેન્ટમાં શાનદાર પ્રદર્શન કરીને બધાને સંદેશ આપી દીધો છે કે તે હવે ટીમમાં વાપસી કરવા તૈયાર છે. ટીમ ઈન્ડિયાનાં ઓલરાઉન્ડર હાર્દિક પંડ્યાએ ડી વાય પાટીલ ટી 20 ટૂર્નામેન્ટમાં પોતાના બેટથી તૂફાન મચાવી દીધો છે.
હાર્દિક પંડ્યાએ 92 રન તો બાઉન્ડ્રીથી જ કર્યા
37 બોલમાં ફટકારી સદી
પહેલી 25 બોલમાં હાફ સેન્ચુરી અને તે બાદ 12 બોલ રમીને સેન્ચુરી પૂરી કરી લીધી
મંગળવારે હાર્દિકે માત્ર 37 બોલમાં સેન્ચ્રુરી ફટકારી. હાર્દિક પંડ્યાએ 10 સિક્સ પણ ફટકારી. રિલાયંસ વન ટીમ તરફથી રમી રહેલા પંડ્યાએ 39 બોલમાં 105 રન બનાવ્યા જેમાં સ્ટ્રાઈક રેટ 269.23 રહ્યો.
રિલાયન્સ વન ટીમ તરફથી ચોથા નંબર પર બેટિંગ કરવા આવેલા હાર્દિક પંડ્યાએ ચોક્કા-છગ્ગાઓનો વરસાદ કરી નાખ્યો. પંડ્યાએ 25 બોલમાં જ હાફ સેન્ચુરી પૂરી કરી લીધી અને બીજી 12 રમીને સદી પૂરી કરી. હાફ સેન્ચુરી બાદ 12 બોલમાં હાર્દિક પંડ્યાએ 51 રન કરી નાખ્યા. પંડ્યાએ 10 સિક્સ અને 8 ચોક્કા માર્યા. હાર્દિક પંડ્યાએ 92 રન તો ચોક્કા-છગ્ગાથી જ કર્યા.
હાફ સેન્ચુરી બાદ તો હાર્દિક પંડ્યા રોકાયા જ નહીં ને લગભગ દર બોલમાં બાઉન્ડ્રી ફટકારી. 15મી ઓવરમાં હાર્દિકે 2 ચોક્કા અને 3 સિક્સ ફટકારી. 17મી ઓવરમાં પણ 3 સિક્સ કરી. પંડ્યાએ પોતાની સદી પણ સિક્સથી જ પૂરી કરી. આ મેચમાં શિખર ધવન પોતાનું ખાતું પણ ખોલી શક્યા નહીં. હાર્દિક સિવાય અનમોલ પ્રીતે 88 રન કર્યા. રિલાયંસ વન ટીમે કુલ મળીને 252 રન કરી નાખ્યા.
નોંધનીય છે કે હાર્દિક પટેલ કમરમાં ઈજાનાં કારણે ભારતીય ક્રિકેટ ટીમથી બહાર ચાલી રહ્યા છે. 5 મહિના બાદ પરત ફરેલા હાર્દિકે ડી વાય પાટીલ ટૂર્નામેન્ટમાં ધમાકેદાર પ્રદર્શન કર્યું છે. પહેલી મેચમાં હાર્દિકે 26 રન આપીને પાંચ વિકેટ ઝડપી હતી. હવે બેટિંગમાં પણ ધુઆંધાર પ્રદર્શનથી બધાને સંદેશ આપી દીધો છે કે તે ટીમ ઈન્ડિયામાં વાપસી કરવા સંપૂર્ણ રીતે તૈયાર છે.