ઓસ્ટ્રેલિયા સામેની બીજી T 20માં ભારતના વિજયના હીરો હાર્દિક પંડ્યાએ એક એવી કોમેન્ટ કરી કે હાર્દિક પ્રત્યે સૌનું માન વધી ગયું.
પંડ્યાએ 22 બોલમાં 42 રન ફટકાર્યા હતા અને છેલ્લી ઓવરમાં 14 રન નોંધાવીને ટીમને જીત અપાવી હતી. 195 રનનો પીછો કરતી ટીમ ઇન્ડિયાને માટે છેલ્લી ઓવર સુધી અઘરી બાજી રહી હતી જેને હાર્દિકે આસાન બનાવી હતી અને 6 વિકેટે ભારતનો વિજય થયો હતો.
હાર્દિકે દાખવી ખાનદાની
હાર્દિક પંડ્યા મેન ઓફ ધ મેચ બન્યો હતો. મેચ પછી પંડ્યાએ સૌજન્ય દાખવીને કહ્યું હતું કે મેન ઓફ ધ મેચનો એવોર્ડ ટી નટરાજનને મળવો જોઈએ. નટરાજન બાકી બોલરો કરતા ખૂબ અસરકારક રહ્યો હતો. તેણે 5ની ઇકોનોમીથી 4 ઓવરમાં 20 રન આપીને 2 વિકેટ ઝડપી હતી.
હાર્દિકે આગળ કહ્યું હતું કે હું સ્કોરબોર્ડ જોઈને રમવાનું પસંદ કરું છું જેથી હું જાણી શકું કે કયા બોલરનો કેવી રીતે સામનો કરવો.
કેવી રીતે ટીમ ઇન્ડિયાએ જીત મેળવી?
પ્રથમ બેટિંગ કરવા ઉતરેલી ઓસ્ટ્રેલિયન ટીમે 20 ઓવરમાં 5 વિકેટ ગુમાવીને 194 રન બનાવીને ભારતને 195 રન બનાવવાનો ટાર્ગેટ આપ્યો હતો. જો કે, જવાબમાં ભારતે 19.4 ઓવરમાં માત્ર 4 વિકેટ હુમાવીને 195 રન કરી શ્રેણી વિજય પ્રાપ્ત કર્યો હતો.
ઓસ્ટ્રેલિયા તરફથી મેથ્યુ વેડ (58) અને સ્ટીવ સ્મિથ(46)ના પ્રદર્શનથી ઓસ્ટ્રેલિયાએ ભારતને 195 રનનો ભારેખમ ટાર્ગેટ આપ્યો હતો. જો કે બીજી તરફ શિખર ધવને અને વિરાટ કોહલીએ અનુક્રમે 52 અને 40 રન બનાવીને ભારતને મજબૂત સ્થિતિ આપી હતી અને છેલ્લી ઓવરમાં હાર્દિકે મેચ ભારતના નામે કરી આપી હતી.