ઈજાનાં કારણે લાંબા સમયથી ભારતીય ટીમથી બહાર ચાલી રહેલા હાર્દિક પંડ્યાનું બેટ ડી વાય પાટીલ ટૂર્નામેન્ટમાં તાબડતોડ પ્રદર્શન બાદ શાંત પડતું દેખાઈ રહ્યું છે. તેમની ટીમ ડી વાય પાટીલ ટૂર્નામેન્ટમાં હારી ગઈ. હાર્દિકે ચાર મેચમાં 347 રન ફટકાર્યા પરંતુ ફાઈનલ મેચમાં જ ઝીરો રનમાં આઉટ થઇ ગયા. હાર્દિકનાં નિરાશાજનક પ્રદર્શનનાં લીધે તેમની ટીમ ટૂર્નામેન્ટ જીતી ન શકી.
ગબ્બર શિખર ધવને એક તરફથી બાજી સંભાળી
ચાર મેચમાં શાનદાર પ્રદર્શન બાદ ફાઈનલમાં હાર્દિક શૂન્ય રનમાં જ પવેલિયન ભેગા
ભુવનેશ્વર કુમારે પણ ચાર ઓવરમાં લૂંટાવી દીધા 54 રન
ફાઈનલ મેચમાં રિલાયંસ અને ઈન્ડિયન ઓઈલ વચ્ચે મુકાબલો થયો. ઈન્ડિયન ઓઈલે 20 ઓવરમાં 194 રન બનાવ્યા. જેનો પીછો કરવા ઉતરેલી રિલાયંસની ટીમ 183 રન જ બનાવી શકી અને ફાઈનલમાં 11 રનથી હારી ગઈ. જોકે મેચમાં શિખર ધવને 41 બોલમાં 69 ફટકાર્યા. તેમણે 6 ચોક્કા અને 2 સિક્સ પણ ફટકારી. ક્રિકેટના 'ગબ્બર' કહેવાતા શિખર ધવને એક તરફથી બાજી સંભાળવાનાં પ્રયત્ન કર્યા.
ભુવનેશ્વર કુમાર પણ રિલાયંસ વન તરફથી રમી રહ્યાં હતા પરંતુ આજે તેમણે પણ મેચમાં નિરાશાજનક પ્રદર્શન જ કર્યું. તેમણે ચાર ઓવરમાં 54 રન લુટાવી દીધા. જયારે બીજી તરફ ઈન્ડિયન ઓઈલનાં બોલર સિદ્ધેશ લાડ અને આવેશ ખાને શાનદાર બોલિંગ કરીને વિકેટો ઝડપી.
નોંધનીય છે કે હાર્દિક પંડ્યાએ આખી ટૂર્નામેન્ટમાં તાબડતોડ બેટિંગ કરીને બધાને અચંભામાં મૂકી દીધા હતાં. હાર્દિકે બીજી મેચમાં 37 બોલમાં સેન્ચુરી ફટકારીને ઈતિહાસ પણ રચ્યો. સાથે સેમીફાઈનલ મુકાબલામાં 20 સિક્સર ફટકારી 158 રન ઠોકી નાખ્યા જે કોઈ પણ ભારતીય ખેલાડી દ્વારા કરવામાં આવેલ સર્વોચ્ચ સ્કોર છે.
સાથે જ ઉલ્લેખનીય છે કે ટૂંક સમયમાં ભારત-સાઉથ આફ્રિકા વચ્ચે વન ડે સીરીઝ થવાની છે. હાર્દિકનાં ધુઆંધાર પ્રદર્શન બાદ માનવામા આવી રહ્યું છે કે હાર્દિકે સાબિત કરી દીધું છે કે હવે તે સંપૂર્ણ રીતે સ્વસ્થ છે અને તેમને ભારતીય ટીમમાં સામેલ કરવામાં આવે.