ટીમ ઇન્ડિયાના સ્ટાર ઑલરાઉન્ડર હાર્દિક પંડ્યાના શોખ નવાબી છે, પછી તે ડાયમંડ હોય, કપડા હોય કે પછી કાર.
હાર્દિક પંડ્યા હંમેશા પોતાની લાઇફસ્ટાઇલને લઇને સતત ચર્ચામાં રહે છે. તાજેતરમાં જ હાર્દિક પંડ્યાના કાર કલેક્શનમાં વધુ એક કારનો ઉમેરો થઇ ગયો છે.
ચર્ચા છે કે, હાર્દિક પંડ્યાએ લેમ્બોર્ગિની હુરાકન EVO ખરીદી છે. આ ઇટાલિયન લક્યૂઝરી કારની કિંમત 3.73 કરોડ રૂપિયાની આસપાસ છે.
સોશ્યલ મીડિયા પર પંડ્યા બ્રધર્સના કેટલાક ફોટોઝ અને વીડિયો વાયરલ થયા છે જેમાં તેઓ નવી કાર સાથે જોવા મળી રહ્યા છે. પંડ્યા બ્રધર્સ પોતાની નવી સ્પોર્ટ્સ કારને લઇને બહાર જતા સમયે પાપારાઝીના કેમેરામાં ક્લિક થયા હતા.
આ ફોટોઝમાં હાર્દિક પંડ્યા પોતાના ભાઇ ક્રૂણાલની સાથે જીમમાંથી બહાર નીકળતી વખતે આ કાર સાથે જોવા મળ્યો હતો. બંને ઈટાલિયન લક્ઝરી સુપરકારમાં બેસીને મુંબઈના રસ્તાઓ પર નીકળ્યા હતા. આ દરમિયાન હાર્દિક ડિઝાઇનર જિમવેરમાં જોવા મળ્યો હતો.
ઉલ્લેખનીય છે કે, હાર્દિક પંડ્યાને ઇજાને કારણે વેસ્ટ ઇન્ડિઝ ટૂરમાંથી આરામ આપવામાં આવ્યો છે. પંડ્યાને વેસ્ટ ઇન્ડિઝ પ્રવાસ દરમિયાન ન તો T-20, ન તો વન ડે ન તો ટેસ્ટ ટીમમાં જગ્યા આપવામાં આવી. તમને જણાવી દઇએ કે, ટીમ ઇન્ડિયાએ વિન્ડિઝ પ્રવાસથી 3 સપ્ટેમ્બરના પરત ફરશે. એટલે કે આગામી 20-25 દિવસ સુધી હાર્દિક વધારે આરામ કરી શકશે.
સપ્ટેમ્બરના ભારતમાં સાઉથ આફ્રિકાના વિરુદ્ઘ T-20 અને ટેસ્ટ સીરિઝ રમાશે. આશા છે કે હાર્દિક પંડ્યાને તે માટે ટીમ ઇન્ડિયામાં પસંદ કરવામાં આવે. તો હાર્દિકનો ભાઇ ક્રૂણાલ પંડ્યા વિન્ડીઝ વિરુદ્ઘ 3 T-20 મેચ રમ્યો હતો જેમાં તેને મેન ઑફ ધ સીરિઝ પસંદ કરવામાં આવ્યો હતો.