ઉત્તરપ્રદેશના હાપુડમાં 6 વર્ષની બાળકી સાથે હેવાનિયતથી પોલીસ હરકતમાં આવી છે. મેરઠના એડીજીના આદેશ બાદ હાપુડ પોલીસ સતર્ક બની છે, પોલીસે આરોપીને પકડવાની શોધખોળ શરૂ કરી છે. આરોપીના સ્કેચ જાહેર કરાયા છે અને આ માટે 8 ટીમની ગોઠવણ કરવામાં આવી છે.
યૂપીના હાપુડમાં દુષ્કર્મની ઘટના
6 વર્ષની બાળકી સાથે થઈ હેવાનિયત
મેરઠ હોસ્પિટલમાં સારવાર ચાલુ
આરોપીની શોધખોળ કરી રહી છે પોલીસ
ઘટનાની વિગત એવી છે કે શુક્રવારે રાતે બાળકીનું અપહરણ કરાયું હતું. પોલીસને સૂચના મળતાં જ ટીમ બાળકીને શોધવા લાગી હતી. પોલીસે બાળકીને તો શોધી લીધી. તે દેખાવમાં પણ સ્વસ્થ લાગી રહી હતી છતાં તેને મેડિકલ ચેકઅપ માટે રિફર કરાઈ હતી. અહીં બાળકી સાથે દુષ્કર્મ થયું હોવાનું રિપોર્ટમાં સામે આવ્યું છે. અત્યારે બાળકીની સારવાર મેરઠ હોસ્પિટલમાં ચાલી રહી છે અને પોલીસે આરોપીઓને પકડવા માટે 8 ટીમ બનાવી છે.
આ રીતે મળી બાળકી, સારવાર ચાલુ
મળતી માહિતી અનુસાર શુક્રવારે મોટી સાંજે બાળકી ઘરની બહાર રમી રહી હતી. આ સમયે કેટલાક લોકો બાઈક પર આવ્યા અને તેને લઈ ગયા. થોડો સમય થતાં બાળકી આવી નહીં તો પરિવાર અને ગામ લોકોએ શોધ આદરી. પરંતુ તે ક્યાંય ન મળતા પરિવારે પોલીસ સ્ટેશનમાં ફરિયાદ લખાવી. પોલીસે અજ્ઞાત વિરુદ્ધ અપહરણનો કેસ દાખલ કર્યો અને સાથે ઝડપથી તપાસ શરૂ કરી. પરિવારને જાણ થઈ કે એક બાળકી બેહોશ સ્થિતિમાં જંગલમાં પડી છે. સૂચના મળતાં પોલીસ અને પરિવાર પહોંચ્યો. તેઓએ બાળકીને હાપુડની સરકારી હોસ્પિટલમાં એડમીટ કરાવી. અને પછી મેરઠ માટે રિફર કરી. ઘટનાને 36 કલાકથી પણ વધુ સમય થયો છે. પોલીસ હજુ સુધી આરોપીઓને પકડી શક્યા નથી.
દિલ્હીમાં પણ બની હતી આવી જ ઘટના
ઉલ્લેખનીય છે કે 2 દિવસ અગાઉ દિલ્હીમાં પશ્ચિમ વિહાર વેસ્ટના પીરાગઢી વિસ્તારમાં 13 વર્ષની માસૂમ સાથે હેવાનિયતનો મામલો સામે આવ્યો છે. બાળકી ઘરમાં એકલી હતી. આ દરમિયાન તેની સાથે ક્રુરતા થઇ છે. વિરોધ કરવા પર બાળકીના માથા પર અને શરીર પર ઘા કરવામાં આવ્યા હતા.