અમદાવાદીઓએ આંતરરાષ્ટ્રીય ખાણીપીણી બજાર 'હેપી સ્ટ્રીટ ફુડ'ની હજી એક વર્ષ રાહ જોવી પડશે. મ્યુનિસિપલ કોર્પોરેશનના સત્તાવાળા દ્વારા શહેરના હાર્દ સમા લોક ગાર્ડન વિસ્તારમાં ખાણીપીણીના શોખીનો માટે અદ્યતન સુવિધા ધરાવતું આંતરરાષ્ટ્રીય ખાણીપીણી બજાર હેપી સ્ટ્રીટ ફૂડ પ્લાઝા નિર્માણાધીન છે. આ હેપી સ્ટ્રીટ ફૂડ પ્લાઝામાં ફૂડ વાન ઊભી રાખવા માટે ચક્રો ગતિમાન કરાયાં છે.
2020માં થશે લોકર્પણ?
લઘુતમ માસિક લાઈસન્સ ફી રૂ. 90,000
ફૂડ પ્લાઝામાં 31 મોટી ફૂડ વાન અને 11 નાની ફૂડ વાન ઊભી રહેશે
તંત્ર દ્વારા આ માટેની જગ્યા લાઈસન્સ ફીથી મેળવવામાં રસ ધરાવતી વ્યક્તિ અને સંસ્થા પાસેથી ઓફર મગાવાઇ છે અને આવેલી ઓફરના આધારે તેની જાહેર હરાજી કરીને ફૂડ વાન ફાળવાશે. દીવાળી પહેલાં ફૂડકોર્ટ ધમધમતી કરવાના તંત્રના આયોજનમાં વિલંબ થયો હોઇ હવે જાન્યુઆરી 2020ના સમયગાળામાં તેનું લોકાર્પણ થાય તેમ લાગે છે.
કેટલી ફૂડવાન ઉભી રહેશે અને કેટલા વસૂલાશે લાઈસન્સ પેટે
તંત્ર દ્વારા આ હેપી સ્ટ્રીટ ફૂડ પ્લાઝામાં 31 મોટી ફૂડ વાન અને 11 નાની ફૂડ વાન ઊભી રાખવાની વ્યવસ્થા કરાઇ છે. મોટી ફૂડ વાનનો એરિયા 37.39 ચો.મી. હોઇ તે માટે લઘુતમ માસિક લાઈસન્સ ફી રૂ. 90,000 નક્કી કરાઇ છે. જ્યારે નાની ફૂડ વાન પૈકી 12.45 ચો.મી.ના એરિયામાં 8 અને 11.97 ચો.મી. તેમજ 8.78 ચો.મી. જગ્યામાં ક્રમશઃ આઠ, એક અને બે નાની ફૂડ વાન ઊભી કરાશે. જોકે અરજદારે મોટી કે નાની ફૂડ વાન કોઇ એક જ ફૂડ વાન માટેની ઓફર કરવાની રહેશે.
સાત કલાક સુધી જ ઉભી રાખી શકશો ફૂડવાન
માસિક લાઈસન્સ ફીની લઘુતમ રકમ કરતાં વધુમાં વધુ ઓફર કરનાર અરજદારને જે તે ફૂડ વાનની જગ્યા ત્રણ વર્ષ માટે અપાશે જેમાં સક્ષમ સત્તાના નિર્ણયથી લાઈસન્સ ફી મુદતને વધુ બે વર્ષ માટે લંબાવી શકાશે. સાંજે છ વાગ્યાથી રાત્રે એક વાગ્યા સુધી સાત કલાક સુધી ફૂડ વાન ઊભી રાખી શકાશે. ત્યારબાદ જો નિયત જગ્યાથી રાતના બે વાગ્યા પછી ફૂડ વાન નહીં ખસેડાય તો પેનલ્ટી વસૂલાશે.
ફૂડવાન પોલિસીની જાહેરાત
લાઈસન્સ મેળવનાર વ્યક્તિએ પાણી, ડસ્ટબિન, આજુબાજુ નિયમિત સફાઇ અને ફાયરસેફટીનાં સાધન સ્વખર્ચે રાખવા પડશે. અગાઉ લો ગાર્ડન ખાણીપીણી બજાર તરીકે ઓળખાતાં આ સ્થળેથી કુલ 39 ધંધાર્થીને ખસેડાયા હતા. જાહેર હરાજી અંગેની આ પ્રક્રિયામાં આ ધંધાર્થીઓને પ્રાધાન્ય અપાશે. આગામી 7 નવેમ્બરે જાહેર હરાજી થનાર હોઇ તંત્ર દ્વારા ફૂડ વાન વિક્રેતા માટે ખાસ ફૂડ વાન પોલિસી જાહેર કરાઇ હોઇ તે માટેની માર્ગદર્શિકા પ્રસિદ્ધ કરાઇ છે.