શેરબજારમાં રોનક પાછી આવી રહી છે. કોરોના સંકટને કારણે માર્ચ મહિનાથી IPOનું બજાર ઠંડુ પડી ગયું હતું. પણ હવે સતત કંપનીઓ IPO લોન્ચ કરવાની યોજના ધરાવે છે. 7 સપ્ટેમ્બરે એક ટેક્નોલોજી કંપની Happiest Minds પોતાનો IPO લોન્ચ કરવા જઈ રહી છે.
Happiest Minds ટેક્નોલોજી IPOમાં રિટેલ ઇન્વેસ્ટર્સને 7 થી 9 સપ્ટેમ્બર સુધી સબ્સ્ક્રાઇબ કરવાનો મોકો મળશે. ગ્રે માર્કેટમાં આ IPOની ખૂબ ચર્ચા થઇ રહી છે.
એક લોટની કિંમત 90 શેર સાથે 14,850 રૂપિયા
Happiest Minds Technologies માટે પ્રાઈઝ બેન્ડ 165-166 રૂપિયા રાખવામાં આવી છે. રોકાણકારોએ ઓછામાં ઓછા 90 શેરના લોટ માટે એપ્લાય કરવું પડશે. એક લોટની કિંમત 90 શેર સાથે 14,850 રૂપિયા થશે. આટલી રકમમાં IPO ખરીદી શકાશે.
702 કરોડ એકત્રિત કરવાનું લક્ષ્યાંક
આ IPO દ્વારા કંપની 702 કરોડ એકત્રિત કરવાનું લક્ષ્યાંક ધરાવે છે. જેમાં 110 કરોડના નવા ઇશ્યુનો પણ સમાવેશ કરવામાં આવશે. આ સિવાય પ્રમોટર દ્વારા વેચાણ માટેની ઓફર હેઠળ 3 કરોડ 56 લાખ 63 હજાર 585 શેર વેચવામાં આવી રહ્યા છે.
એન્કર ઇન્વેસ્ટર્સ દ્વારા 316 કરોડ રૂપિયા એકઠા કર્યા
આઇટી સર્વિસ કંપની Happiest Minds Technologiesએ એન્કર ઇન્વેસ્ટર્સ દ્વારા 316 કરોડ રૂપિયા એકઠા કર્યા છે. એંકર્સ ઇન્વેસ્ટર્સમાં સિંગાપોર સરકાર, ગોલ્ડમેન સેશ, કુવૈત ઇન્વેસ્ટમેન્ટ ઓથોરિટી, નોમુરા ફંડ્સ આયર્લેન્ડ, જ્યુપિટર ઇન્ડિયા અને પેસિફિક હોરાઇઝન ઇન્વેસ્ટમેન્ટ સામેલ છે.
Happiest Minds Technologiesના પ્રમોટર અશોક સુતા મિડકેપ આઇટી કંપની માઇન્ડસ્પેસના સ્થાપક રહ્યા છે. અશોક સુતા 15 વર્ષ સુધી વિપ્રો સાથે સંકળાયેલા હતા. કંપનીની 97 ટકા આવક ડિજિટલ વિંગથી થાય છે. આ ઇન્ફોસીસ, કોગ્નિઝન્ટ, માઇન્ડટ્રી કરતા વધારે છે. આ કંપનીઓનું સરેરાશ યોગદાન આશરે 40-50 ટકા જેટલું છે.