એલર્ટ / બાળકોને સાચવજો! 5 વર્ષ બાદ સુરતમાં આ ચિંતાજનક બિમારીએ દેખા દીધી, રોજના 600 કેસ

• સુરતમાં 6 વર્ષ સુધીના બાળકોમાં ગંભીર બિમારી
• બાળકોના હાથ, પગ અને જીભ પર ચાંદા પડેલા જોવા મળ્યા
• શહેરમાં રોજના 500થી 600 કેસ સામે આવી રહ્યાં છે

સુરતમાં 6 વર્ષ સુધીના બાળકોમાં ગંભીર બિમારી જોવા મળી છે. જેમાં બાળકોના હાથ, પગ અને જીભ પર ચાંદા પડેલા જોવા મળી રહ્યાં છે. ખૂબ જ ઝડપથી બાળકોમાં આ બીમારી ફેલાઇ રહી છે. શહેરમાં રોજના 500થી 600 કેસ સામે આવી રહ્યાં છે.

ડૉક્ટરોએ બીમારીને 'હેન્ડ-ફૂટ એન્ડ માઉથ ડિસીઝ' નામ આપ્યું

ડૉક્ટરોએ આ બીમારીને 'હેન્ડ-ફૂટ એન્ડ માઉથ ડિસીઝ' નામ આપ્યું છે. આ રોગ કોક્સસૈકી એન્ડ ઇકો વાયરસથી થાય છે. એવું કહેવાય છે કે, 5 વર્ષ બાદ ફરીવાર આ બિમારીએ માથું ઉચક્યું છે. 2017માં ઘણા બાળકો આ બીમારીની ઝપેટે ચડ્યા હતા. આ બીમારીમાં ડૉક્ટરો બાળકોને એન્ટિબાયોટિક તેમજ બહારનો ખોરાક ન આપવાની સલાહ આપી રહ્યાં છે.

મહત્વનું છે કે, બાળકોને તુરંત ચેપ લાગતો હોય છે. આથી નર્સરી, ડાન્સ ક્લાસ અને પ્લેગ્રાઉન્ડમાં બાળકોને સાવચેત કરવા જરૂરી છે. આ બીમારીની અંદર બાળકોના મો અને ગળામાં પણ ફોલ્લા જોવા મળતા હોય છે. આ મામલે તબીબોનું કહેવું છે કે, આ રોગ ચેપી છે જેથી તેની સારવાર જરૂરી છે.

જાણો શું છે આ બીમારીના લક્ષણો

સૌ પહેલા તો આ બીમારીમાં તાવ આવે છે.
બાદમાં જીભ અને ગળામાં ચાંદા દેખાવા લાગે છે.
પાછળથી હાથ અને પગમાં ચાંદા પડે છે.
બાળકો પીડાથી રડે છે.
આ રોગ ચેપી છે અને એક બાળકથી બીજામાં ફેલાય છે.

બીમારીથી બચવા શું ધ્યાન રાખવું?

સૌ પહેલાં તો ઘરની તમામ જગ્યાઓને જંતુમુક્ત કરો.
બાળકોના રમકડાંને પણ જંતુમુક્ત કરો.
બાળકોને મોમાં કોઈ પણ વસ્તુ મૂકવા ના દો.
બાળકને ચેપ લાગ્યો હોય તો સ્કૂલે ન મોકલો.
બહારથી આવ્યા બાદ હાથને વ્યવસ્થિત સાફ કરો.
શૌચ કર્યા બાદ પણ સાફ સફાઈ કરો.