બોલીવૂડની ફિલ્મ વીર ઝારા કદાચ તમે જોઈ હશે. જેમાં શાહરૂખ ખાન પોતાની પ્રેમિકાને મળવા માટે પાકિસ્તાન પહોચે છે અને બાદમાં જાસૂસીના આરોપમાં પાકિસ્તાની સૈનિકો તેને પકડીને જેલ હવાલે કરે છે.
બસ આવો જ એક વાસ્તવિક કિસ્સો સામે આવ્યો છે. જેમાં હામિદ નામનો યુવક પોતાની પ્રેમિકાને મળવા પાકિસ્તાન પહોંચે અને તેને મળે છે માત્ર જેલ. પાકિસ્તાન જેલમાંથી છૂટ્યા બાદ હામિદ નિહાલ અન્સારી આજે દિલ્લી પહોંચ્યો છે.
હામિદ અન્સારીની એક ઝલક મેળવવા માટે તેના વિસ્તારના લોકો ખૂબ જ આતુર છે. કારણકે આજે અન્સારી પરિવારમાં છ વર્ષ બાદ ઈદની ઉજવણી જેવો માહોલ છે. હામિદ અન્સારી છેલ્લા છ વર્ષથી પાકિસ્તાનની જેલમાં સજા કાપી રહ્યો હતો.
33 વર્ષીય હામિદ અન્સારી પાકિસ્તાનની જેલમાંથી છૂટ્યા બાદ વાઘા-અટારી બોર્ડર પરથી ભારત પહોંચ્યો છે. ભારતની જમીન પર પહોંચતા હામિદ અન્સારીએ પહેલા તો જમીનને ચુંબન કર્યું. જ્યારે વર્સોવામાં તેમના પાડોશીએ આ ખુશીને એક બીજાને ગળે લગાવીને અને મીઠાઈ વહેચીને ઉજવણી કરી.
બોર્ડર પર પહોંચ્યા બાદ અન્સારીએ પોતાના માતા-પિતાને ગળે લગાવ્યા અને ત્યારે તેમના માતા પિતાની આંખોમાંથી ચોધાર આંસુ વહેવા લાગ્યા. હામિદ અન્સારીના ભાઈએ જણાવ્યું કે મારા પરીવારમાં આજે ઈદ છે. છેલ્લા વર્ષથી પરીવારે એક પણ તહેવાર મનાવ્યો નથી.
સમગ્ર ઘટનાની વિગત એવી છે કે હામિદ અન્સારી કથિત રીતે એક યુવતીને મળવા માટે પાકિસ્તાન ગયો હતો. વર્ષ 2012માં તે પોતાની ફેસબુક ફ્રેન્ડને મળવા માટે વગર વીઝાએ અફઘાનિસ્તાનના રસ્તે પાકિસ્તાન પહોંચ્યો હતો. હામિદ અન્સારીને પેશાવરની સેન્ટ્રલ જેલમાં રાખવામાં આવ્યો હતો.
તેની ત્રણ વર્ષની સજા પંદર ડિસેમ્બરના રોજ સમાપ્ત થઈ પરંતુ કાયદાકીય કાર્યવાહી પૂરી ના થતા ભારત આવી શક્યો નહીં. જ્યારે તેના માતા પિતાને ખબર પડી કે પોતાનો દીકરો પાકિસ્તાનની જેલમાં સજા કાપી રહ્યો છે ત્યારે વિદેશ મંત્રી સુષ્મા સ્વરાજને પણ મળ્યા હતા.
ત્યારે તેમને દરેક પ્રકારની મદદ કરવા માટે ભારતીય દૂતાવાસને આદેશ કર્યો હતો. બીજી તરફ ઈન્ડો પાકિસ્તાન ફ્રેન્ડશિપ સંગઠને હામિદને છોડાવવા પ્રયાસ શરૂ કરી દીધા હતા.