આજથી સોનાના દાગીનાના વેચાણના નિયમમાં ધરખમ ફેરફાર થયો છે. આજથી જ્વેલર્સ હોલમાર્ક થયેલા જ સોનાના દાગીના વેચી શકશે. હોલમાર્ક વગરના દાગીના નહીં વેચી શકે. સોનીઓએ હવે નવું હોલમાર્કિંગ કરાવવું પડશે.
સોનાના ઘરેણામાં છેતરપિંડીની શક્યતા નહીંવત
હોલમાર્કિંગનો નિયમ લાગુ કરવાથી છેતરપિંડીની શક્યતા નહીંવત થઈ જશે. તમામ દાગીનાઓ હવે સર્ટીફાઈડ જ હશે. 1 એપ્રિલ એટલે કે આજથી નવા નિયમો અમલમાં મુકાશે. જે મુજબ હવે ફક્ત હોલમાર્કિંગ થયેલું સોનું એટલે કે હોલમાર્ક યુનિક આઇડી HUID સાથેનું સોનું જ જ્વેલર્સ વેચી શકશે.
શું છે HUID?
HUID એટલે હોલમાર્ક યુનિક આઇડેન્ટિફિકેશન નંબર. 6 અંકનો યુનિક આલ્ફાન્યૂમેરિક કોડ છે જે સંખ્યા અને અક્ષરોનો બનેલો હોય છે. હવે હોલમાર્કિંગનો નિયમ લાગુ કરવાથી દરેક પ્રકારની સોનાની જ્વેલરી પર એક યુનિક હોલમાર્ક નંબર હશે. હોલમાર્કિંગ સમયે દરેક સોનાના દાગીનાને HUID આપવામાં આવશે. યુનિક અંકને હોલમાર્કિંગ સેન્ટરો પર સોનાના દાગીના પર મેન્યુઅલી અંકિત કરવામાં આવે છે.
જ્વેલર્સને મળ્યો વધુ ત્રણ મહિનાનો સમય
જો કે આ નિયમ અંગે એક અપડેટ સામે આવ્યું છે. સોનાના દાગીના માટે છ અંકની 'આલ્ફાન્યુમેરિક HUID' સિસ્ટમ લાગુ કરવાના એક દિવસ પહેલા સરકારે જ્વેલર્સને મોટી રાહત આપી હતી. સરકારે શુક્રવારે લગભગ 16,000 જ્વેલર્સને જૂન સુધી 'ઘોષિત' સોનાની જૂની હોલમાર્કવાળી જ્વેલરી વેચવાની મંજૂરી આપી હતી એટલે કે જ્વેલર્સને વધુ ત્રણ મહિનાનો સમય મળી ગયો છે.