જીવલેણ કોરોના વાઈરસના સતત વધતા જતા ખતરાથી હાલ દુનિયાના ૯૦ દેશમાં લોકડાઉન છે અને લગભગ અડધી વસ્તી લગભગ ૪૫૦ કરોડ લોકો ઘરમાં બંધ છે. સંયુક્ત રાષ્ટ્ર (UN)ના જણાવ્યા મુજબ દુનિયાભરના ૧૮૦ દેશમાં સ્કૂલ-કોલેજ બંધ છે. લગભગ દુનિયાભરના ૮૭ ટકા લોકો પ્રભાવિત છે. દુનિયાભરમાં લોકોને ઘરની બહાર નીકળતા રોકવા માટે ઘણી જગ્યાએ સખત તો ઘણી જગ્યાએ બહુ વિચિત્ર અને અજીબોગરીબ નિયમો બનાવાયા છે.
સાઉદી અરબમાં એક કરોડનો દંડ તો રશિયામાં સાત વર્ષની જેલ
ઈટાલી માં કારણ વગર બહાર નીકળવા પર ૨.૫ લાખ અને લોમ્બાર્ડીમાં ચાર લાખ રૂપિયા દંડ છે. અહીં ૪૦ હજાર લોકો પર દંડ લગાવાયો છે. હોંગકોંગમાં ક્વોરન્ટાઇનનો નિયમ તોડવા પર ૨.૫ લાખનો દંડ અને છ મહિનાની જેલની સજાની જોગવાઇ છે. સાઉદી અરબમાં બીમારી છુપાવવા અને ટ્રાવેલ હિસ્ટ્રી છુપાવવા પર એક કરોડ રૂપિયાના દંડની જોગવાઇ છે. તે દુનિયામાં સૌથી વધુ છે.
ઓસ્ટ્રેલિયા માં કેટલીક જગ્યાએ રૂ. ૨૩ લાખના દંડની જોગવાઇ છે. રશિયાની સંસદે એન્ટિવાઇરસ એક્ટને મંજૂરી આપી છે. ક્વોરન્ટાઇન નિયમ તોડવા પર સાત વર્ષની સજાની જોગવાઇ છે. મેક્સિકોના યુકાટનમાં બીમારી છુપાવવા પર ત્રણ વર્ષની સજા થશે.
ફિલિપાઇન્સ ના રાષ્ટ્રપતિ રોડ્રિગો દુતેર્તેએ ક્વોરન્ટાઇનનું ઉલ્લંઘન કરનાર લોકોને ગોળી મારવાના આદેશ આપ્યા છે. દ. આફ્રિકમાં બહાર નીકળનાર લોકો પર પોલીસ રબરની ગોળી ચલાવી રહી છે. કોલંબિયાના કેટલાક જિલ્લામાં નેશનલ આઇડીના નંબરના આધારે નીકળવાની મંજૂરી છે, જેનો આઇડી નં. ૦, ૪ અને ૭ પર સમાપ્ત થાય છે તે સોમવારે બહાર નીકળી શકે છે. પનામામાં મહિલા અને પુરુષોને એક-એક દિવસ છોડી માત્ર બે કલાક માટે ઘર બહાર નીકળવાની અનુમતિ અપાઇ છે.