ઘણા લોકોને એવી ટેવ હોય કે આપણને એમ થાય, કે હેં, આવુ તે કંઇ હોતું હશે. કોઇને ચોક-સ્લેટપેન ખાવાની ટેવ તો કોઇને ચૂનો ખાવાની. અરે દિવાલ પણ ઘણા લોકોને ખોતરી ખોતરીને ખાઇ જાય. પરંતુ શું તમે કદી એવુ સાંભળ્યુ છે કે વાળ ખાવાની ટેવ હોય ! તો હા, આવુ પણ જોવા મળ્યુ છે દાહોદમાં. દાહોદમાં 15 વર્ષની કિશોરીના પેટમાંથી 2 કિલો 3 ગ્રામ વાળ નીકળ્યા !
15 વર્ષની કિશોરીના પેટમાંથી નીકળી વાળની ગાંઠ
આ ચોંકાવનારો કિસ્સો દાહોદના ફેતપુરા તાલુકાના એક ગામનો છે. જ્યાં બાળકીને સતત પેટમાં દુઃખાવાની ફરિયાદ રહેતી હતી. છેલ્લા ત્રણ માસથી પેટમાં દુખાવો અને ઊલટી થતા તેને દાહોદની કેર હોસ્પિટલમાં નિદાન માટે લઇ જવામાં આવી. જ્યાં તપાસ કરતા સામે આવ્યુ કે બાળકીના પેટમાં ગાંઠ છે. કિશોરીનું ઓપરેશન કરવાનું નક્કી કરવામાં આવ્યુ. ઓપરેશન કરતા કિશોરીના પેટમાંથી 20-12 સેમી આકારની ગાંઠ સ્વરૂપે 2 કિલો 300 ગ્રામ વાળ નીકળ્યા. કિશોરીને વાળ ખાવાની ટેવ હોવાથી જઠરમાં વાળની ગાંઠ બની ગઇ હતી.
કિશોરીને હતી વાળ ખાવાની ટેવ
હોસ્પિટલના ડૉક્ટર્સ દ્વારા ભારે જહેમત બાદ સફળ સર્જરી કરવામાં આવી હતી. હાલ કિશોરી પીડા મુક્ત છે. હોસ્પિટલના ડોક્ટર કમલેશ ગોહિલે જણાવ્યું હતું કે વાળ ખાવાની ટેવ એ માનસિક બીમારી છે. જે કિશોરીઓ તથા મહિલામાં જોવા મળે છે. વાળ ખાવાની ટેવને મેડિકલની ભાષામાં ટ્રાઇકોફેઝિયા કહેવાય છે અને પેટમાં બનેલી વાળની ગાંઠને ટ્રેઇકોબેઝોર કહેવામાં આવે છે.
મહેસાણામાં જોવા મળ્યો આવો કેસ
મહેસાણામાં પણ આવો એક અજીબોગરીબ કિસ્સો સામે આવ્યો હતો. મૂળ ઉત્તરપ્રદેશ અને હાલ મહેસાણામાં પેટીયું રળી રહેલા સૂર્યકાન્તભાઇ યાદવની દિકરી નેન્સીને છેલ્લાં એક વર્ષથી પેટમાં દુખાવાની તકલીફ રહેતી હતી. આ તકલીફ વધુ ગંભીર બનતા તેઓ અમદાવાદની એક ખાનગી હોસ્પિટલમાં સારવાર અર્થે પહોંચ્યા. ત્યાના તબીબોને સમસ્યા વધુ ગંભીર જણાઇ આવતા દિકરીને અમદાવાદ સિવિલ હોસ્પિટલમાં સારવાર અર્થે લઇ જવા જણાવ્યું. પરિવારજનો વિના વિલંબે દિકરીને સારવાર માટે અમદાવાદ સિવિલ હોસ્પિટલ લઇને આવ્યા. અહીં તબીબો દ્વારા સી.ટી.સ્કેન, એક્સ-રે જેવાં જરૂરી રીપોર્ટસ કરાવવામાં આવ્યા. જેમાં બાળકીના પેટમાં ગાંઠ હોવાનું નિદાન થયું હતું. અમદાવાદ સિવિલ હોસ્પિટલના બાળરોગ સર્જરી વિભાગના એસોસિએટ પ્રોફેસર ડૉ. જયશ્રી રામજી , એનેસ્થેસિયા વિભાગના ડૉ. સિધ્ધાર્થ અને તેમની ટીમ દ્વારા સર્જરી હાથ ધરવામાં આવી હતી. સર્જરી દરમિયાન બાળકીના પેટમાં કાંપો મૂકી ખોલીને જોયું ટીમ સ્તબ્ધ થઇ ગઇ. પેટમાં વાળના ગુચ્છ સ્વરૂપે ગાંઠ હતી.