Fraud / કોઈ QR કોડ સ્કેન કરવાનું કે તો ચેક કરજો! હેકર્સ ડિજિટલ ફ્રોડ કરી શકે છે

• એપ દ્વારા તૈયાર થઈ રહ્યા છે કોડઃ ઓનલાઈન માર્કેટ પર નજર
• ક્યૂઆર કોડથી ડિજિટલ ફ્રોડ કરી રહ્યા છે હેકર્સ 

પટણા નિવાસી સંતોષકુમારે પોતાના એક સહયોગીને ઓનલાઇન માર્કેટ પ્લેસ પર એક જાહેરાત નાખવા કહ્યું. જાહેરાત દ્વારા તે પોતાનો આઇફોન વેચવા ઇચ્છતા હતા. તેમણે પોતાના મોબાઇલ નંબર અને મોબાઇલની કેટલીક તસવીર પણ અપલોડ કરાવી. જાહેરાત નાખ્યાની થોડી જ મિનિટ બાદ તેમના પર એક કોલ આવ્યો. કોલ કરનારે આઇફોન ખરીદવાની ઇચ્છા વ્યક્ત કરી. ઠગે ચુકવણી બે ભાગમાં કરવાનું કહ્યું. તેણે ભરોસો જીતવા માટે તેના ખાતામાં ક્યૂઆર કોડ સ્કેન કરાવીને રૂ.૧૦ નાખ્યા. હેકર્સે ફરી એક ક્યૂઆર કોડ મોકલ્યો અને તેને રૂ.૨૦ હજારનો ગણાવ્યો. સંતોષે ક્યૂઆર કોડ સ્કેન કર્યો અને તરત જ તેના ખાતામાંથી રૂ.૨૦ હજાર કપાઇ ગયા. 

હેકર્સ સૌથી પહેલાં ગ્રાહકનો નંબર મેળવે છે અને એક એપ દ્વારા ક્યૂઆર કોડ બનાવે છે

થોડા સમય બાદ જ્યારે પીડિતે એ નંબર પર ફોન કર્યો ત્યારે નંબર ઓફ આવ્યો અને ત્યારે તેને છેતરપિંડીનો અહેસાસ થયો. આ રીતે હેકર્સ સૌથી પહેલાં ગ્રાહકનો નંબર મેળવે છે અને એક એપ દ્વારા ક્યૂઆર કોડ બનાવે છે. ક્યૂઆર કોડ બનાવ્યા બાદ એસએમએસ કે વોટ્સએપ જેવી સોશિયલ નેટવર્કિંગ સાઇટ દ્વારા તેને સર્ક્યુલેટ કરે છે. ફ્રોડ કરનાર લોટરી કે અન્ય કોઇ લાલચ દ્વારા લોકોને ફસાવવાની કોશિશ કરે છે.  કોઇ યુઝરનો રિસ્પોન્સ મળે તો તેઓ સક્રિય થઇ જાય છે અને પછી તે ઘણા પ્રકારની પ્રક્રિયા કરાવે છે. યુઝર્સ સંપૂર્ણ રીતે છેતરપિંડીની જાળમાં ફસાય છે. છેલ્લે વોટ્સએપ દ્વારા ક્યૂઆર કોડ સ્કેન કરવાનું કહેવાય છે. ક્યૂઆર કોડ સ્કેન થાય અને તરત જ એકાઉન્ટમાંથી રકમ ગાયબ થઇ જાય છે.

આટલી સાવધાની રાખોઃ

• જો કોઇ ક્યૂઆર કોડ મોકલીને ચુકવણી કરવાનું કહે તો તે ન કરો.
• બેન્ક ગ્રાહકને ફોન કરવા મોબાઇલ નંબરનો ઉપયોગ કરતા નથી.
• વેબસાઇટ પર પે લોગ ઇન કરો તો લોગ આઉટ જરૂર કરો.
• સાયબર કાફેમાં ઇન્ટરનેટ બેન્કિંગનો પ્રયોગ ક્યારેય ન કરો.
• ગૂગલ પર હેલ્પલાઇન નંબર સર્ચ ન કરો.
• પાયરેટેડ સોફ્ટવેરથી સાવધાન રહો.
• સોશિયલ મીડિયા પર મિત્રો પાસેથી મળેલી લિંક પર ક્લિક કરતાં પહેલાં વિચારો.