ગૌરવ / PM મોદીનું વિઝન થશે સાકાર, ગુજરાતી યુવકે માત્ર 5 લાખમાં શરૂ કરેલા સ્ટાર્ટઅપને મળી મોટી સફળતા

• જામનગરના જુવાનિયાએ આયુર્વેદિક પ્રોડક્ટમાં કાઠુ કાઢ્યું 
• 5 લાખમાં શરૂ કરેલા સ્ટાર્ટઅપને મળ્યું ફંડિગ
• PM મોદીએ ગાંધીનગરમાં સ્ટાર્ટઅપને લઈને આપ્યું હતું નિવેદન

ગુજરાતમાં ત્રિ-દિવસીય ગ્લોબલ આયુષ ઇન્વેસ્ટમેન્ટ એન્ડ ઇનોવેશન સમિટ (GAIIS 2022) માં સ્ટાર્ટઅપ્સ અને વિદ્યાર્થીઓની ઉત્સાહપૂર્વક ભાગીદારી જોવા મળી હતી, જેમાં તેમના ઉત્પાદનો અને વિવિધ પહેલોનું પ્રદર્શન કરવામાં આવ્યું હતું. અહીં આવા જ એક વિદ્યાર્થી આયુર્વેદિક સ્ટાર્ટઅપ, ગ્રીન ફોરેસ્ટ વેલનેસ, જેની સ્થાપના નીલકંઠ મારડિયા દ્વારા કરવામાં આવી છે, તેને એક ખાનગી કંપની તરફથી રૂ. 2.50 કરોડના ભંડોળની દરખાસ્ત મળી છે જે એક મોટી વાત છે.

માત્ર 5 લાખના ખર્ચે શરૂ કર્યું હતું સ્ટાર્ટઅપ 

GIIS 2022માં આયોજિત પ્રદર્શનમાં સ્ટાર્ટઅપ્સની સાથે સાથે ઘણી સ્થાપિત કંપનીઓએ પણ તેમના સ્ટોલ મૂક્યા હતા. દરમિયાન નીલકંઠ મરડિયાને આ ભંડોળની તક મળી છે. જણાવી દઈએ કે, ગુજરાતના જામનગરના રહેવાસી નીલકંઠ મરડિયા, ઈન્સ્ટિટ્યૂટ ઓફ ટીચિંગ એન્ડ રિસર્ચ ઈન આયુર્વેદ (ITRA), ગુજરાતના અંતિમ વર્ષના વિદ્યાર્થી છે. ઑક્ટોબર 2021 માં, માત્ર રૂ. 5 લાખ સાથે, તેણે ગ્રીન ફોરેસ્ટ વેલનેસ, એક આયુર્વેદ આધારિત કોસ્મેટિક કંપની શરૂ કરી, પરંતુ ભંડોળના અભાવને કારણે, તે તેની પહોંચ વધારવા અને વેચાણ વધારવામાં સક્ષમ ન હતા. જો કે, હવે તે કંપનીના ભંડોળનો ઉપયોગ કરીને તેના ઉત્પાદનોના વિસ્તરણ અને માર્કેટિંગમાં સુધારો કરશે.

પ્રધાનમંત્રી મોદીએ પણ આષુય ક્ષેત્રે પ્રતિભાઓને આગળ લાવવાની વ્યક્ત કરી હતી આશા

વડાપ્રધાન નરેન્દ્ર મોદીએ ગુજરાતના ગાંધીનગરમાં ગ્લોબલ આયુષ ઇન્વેસ્ટમેન્ટ એન્ડ ઇનોવેશન સમિટ 2022 નું ઉદ્ઘાટન કરતી વખતે ઉલ્લેખ કર્યો હતો કે અન્ય ક્ષેત્રોની જેમ, તેઓ આગામી વર્ષોમાં આયુષ ક્ષેત્રમાંથી પ્રતિભાઓને આગળ લાવવાની આશા રાખે છે. બીજી તરફ, નીલકંઠ મરડિયાની સફળતા આયુષ ક્ષેત્રના વધુ સ્ટાર્ટઅપ્સને ઉભરી આવવા માટે પ્રોત્સાહન આપશે. આ દરમિયાન ITRA ના ડિરેક્ટર ડૉ. અનૂપ ઠાકરે જણાવ્યું હતું કે નીલકંઠ મરડિયા શરૂઆતથી જ ઝડપી શીખનાર અને મહેનતુ વિદ્યાર્થી છે. તેમને આયુર્વેદના સિદ્ધાંતોના આધારે નવા સૂત્રો શોધવામાં રસ છે. તે તેના ઉદ્યોગસાહસિક સ્વપ્ન વિશે ખૂબ જ ઉત્સાહી છે. ડૉ. અનૂપ ઠાકરે ખુશી વ્યક્ત કરી કે એક ખાનગી કંપનીએ તેમના સ્ટાર્ટઅપમાં રૂ. 2.50 કરોડનું રોકાણ કરવાની ઓફર કરી છે અને તેમને ઉજ્જવળ ભવિષ્યની શુભેચ્છા પાઠવી છે.

નીલકંઠનું સ્ટાર્ટઅપ આયુર્વેદિક ઉત્પાદન બનાવે છે

નીલકંઠ મરડિયાની આયુર્વેદિક સ્ટાર્ટઅપ ગ્રીન ફોરેસ્ટ વેલનેસ કંપની આયુર્વેદ આધારિત કોસ્મેટિક ઉત્પાદનોનું ઉત્પાદન કરે છે. આમાં આયુર્વેદિક એન્ટિ-એજિંગ ક્રીમ, હાઇડ્રેટિંગ મોઇશ્ચરાઇઝિંગ ક્રીમ, ફેશિયલ ક્લીન્સર, નર્સિંગ ફેશિયલ ક્લીન્સર, ઇન્ટેન્સ રિપેર ફેશિયલ ક્લીન્સર, હેર ક્લીન્સર, હેર કન્ડિશનર અને ફેશિયલ સીરમ વગેરેનો સમાવેશ થાય છે. ગ્રીન ફોરેસ્ટ વેલનેસ કંપની ભવિષ્ય માટે કેટલીક મોટી વિસ્તરણ યોજના ધરાવે છે. સ્ટાર્ટઅપ ગ્રીન ફોરેસ્ટનો હેતુ વેલનેસ ક્લિનિકની સ્થાપના કરવાનો છે, જ્યાં દર્દીને કુદરતી રીતે તેમની સમસ્યા અનુસાર આયુર્વેદિક દવા આપી શકાય. તેની અન્ય યોજનામાં ગ્રીન ફોરેસ્ટ વેલનેસ પાર્કની સ્થાપનાનો પણ સમાવેશ થાય છે, જે વ્યસન મુક્તિ તરફ કામ કરશે. તેઓ ગ્રીન ફોરેસ્ટ વેટરનરી સોલ્યુશન સ્થાપવાની પણ યોજના ધરાવે છે, જ્યાં આયુર્વેદિક પદ્ધતિઓ અને સારવાર વિસ્તાર દ્વારા પ્રાણીઓને સ્વસ્થ રાખી શકાય.