વરસાદ / ગુજરાતમાં સૌરાષ્ટ્રના વિસ્તારોમાં મેઘરાજાની બીજી ઈનિંગ, આગામી દિવસોમાં વરસાદની આગાહી

• રાજ્યમાં ફરી મેઘરાજાનું આગમન 
• લાંબા વિરામ બાદ ફરી મેઘમહેર 
• જગતના તાતામાં ખુશીનો માહોલ 

રાજ્યમાં લાંબા વિરામ બાદ મેઘરાજાએ ફરી એન્ટ્રી કરી છે. રાજકોટ શહેરના પડધરી તાલુકામાં મેઘરાજાએ ધીમી ગતીએ આગમન કર્યું છે. પડધરીના બાધી, નારણકા, તરખડી સહિતના વિસ્તારોમાં વરસાદ જોવા મળ્યો છે. તે સિવાય રાજકોટ-જામનગર હાઈવે પર પણ કેટલાક વિસ્તારોમાં વરસાદી માહોલ જોવા મળ્યો છે.

ગરમીથી કંટાળેલા લોકોએ રાહત અનુભવી 

વરસાદ પડવાને કારણે ખેડૂતોમાં ખુશીનો માહોલ જોવા મળી રહ્યો છે. સુરેન્દ્રનગર જિલ્લાના વાતાવરણમાં પણ પલટો જોવા મળ્યો છે. અહીયા અસહ્ય ઉકળાટ બાદ વરસાદ આવતા ગરમીથી કંટાળેલા લોકોએ રાહત અનુભવી હતી. ચોટીલાના શહેરી વિસ્તારોમાં વરસાદી ઝાપટા પડ્યા જેના કારણે વાતાવરણમાં ઠંડક પ્રસરી જવા પામી છે. 

હવામાન વિભાગની આગાહી સાચી પડી 

અગાઉ હવામાન વિભાગે આગાહી કરી હતી. કે ગુજરાતમાં 10 તારીખથી વરસાદ પડી શકે છે. બંગાળની ખાડીમાં લો પ્રેશરને કારણે વરસાદી વાતાવરણ સર્જાયું છે. જેથી આગામી 5 દિવસ સુધી રાજ્યમાં હળવો હળવો વરસાદ રહેશે. સાથેજ અમદાવાદ તેમજ ગાંધીનગરમાં 11 તારીખે છૂટો છવાયો વરસાદ પડી શકે છે.

રાજકોટના ગ્રામ્ય વિસ્તારોમાં પણ વરસાદ 

રાજકોટના ગ્રામ્ય વિસ્તારોમાં પણ વરસાદી ઝપડા પડ્યા છે. જેમા બપોર બાદ કોટડા સાંગાણી તાલુકામાં વરસાદ પડ્યો હતો. જોકે અહીયા પણ વરસાદ પડતા ગ્રામ્ય વિસ્તારોમાં રહેતા ખેડૂતોમાં હર્ષની લાગણી ફેલાઈ ગઈ.

ખાંભામાં પણ વરસાદી માહોલ 

ઉલ્લેખનીય છે કે અમરેલીના ખાંભા શહેરમાં પણ આજે વરસાદી માહોલ જામ્યો હતો. લાબાં સમય બાદ અહીયા પણ મેઘરાજા એન્ટ્રી કરી જેથી ગરમીથી કંટાળેલા લોકોએ રાહતનો શ્વાસ લીધો હતો. રાજુલા પંથક અને જાફરાબાદના ગ્રામ્ય વિસ્તારોમાં વરસાદ પડ્યો હતો. જેથી અહીયાના ખેડૂતોમાં પણ આનંદ છવાઈ ગયો હતો.