હું છું ગુજરાતી / ગુજરાતમાં પ્રાણીઓ માટે પ્રથમ વન-સ્ટોપ સોલ્યુશન હોસ્પિટલ, આ અમદાવાદીએ પ્રેમ, પેશન અને પૈસા બધુ જ લગાવી દીધું

અમદાવાદમાં રહેતા શૈવલ દેસાઈ શહેરના જીવરાજ પાર્ક નજીકના શ્રેયસ ક્રોસિંગ વિસ્તારમાં પ્રાણીઓ માટે એક અલાયદી અને અનોખી હોસ્પિટલ ઊભી કરી છે. જેમાં તમામ પ્રકારની અત્યાધુનિક સારવાર માટેની સેવાઓ ઉપલબ્ધ કરાવી છે. વિશ્વાસ નહીં થાય પરંતુ આ ગુજરાતની પ્રથમ એવી પ્રાઈવેટ હોસ્પિટલ છે કે જ્યાં પ્રાણીઓ માટે વેન્ટિલેટર પણ ઉપલબ્ધ હશે. શૈવલની આ સરાહનીય પહેલ પાછળ તેનો પ્રાણીપ્રેમ તો છે જ પરંતુ પોતાના ડોગ સાથે બનેલી દુઃખદ ઘટના અન્ય કોઈ પ્રાણી સાથે ન બને તેવા સંકલ્પથી તેનામાં માનવતાનું પ્રમાણ સામાન્ય માનવી કરતા કંઈક વધારે છે તેની સાબિતી આપે છે.

ગુજરાતની એકમાત્ર આવી પ્રાઈવેટ હોસ્પિટલ

BESTBUDS ગુજરાતની પહેલી એવી પ્રાઈવેટ હોસ્પિટલ છે જ્યાં વેન્ટિલેટર ફોર એનિમલ્સ પણ છે. અહીં પેટસની તમામ પ્રકારની સારવાર થઈ શકે તે માટે અદ્યતન ડાયગ્નોસ્ટિક ફેસિલીટીઝ ઊભી કરવામાં આવી છે. અહીં પેટ્સના X-RAY, અલ્ટ્રા-સાઉન્ડ, હિમેટોલોજીકલ તેમજ પેથોલોજીકલ રિપોર્ટ્સ પણ કરાવી શકાય તેવી સુવિધાઓ છે.

અહીં ટૂંક સમયમાં IPD પણ શરૂ થવાની છે જેથી ઇમર્જન્સી જેવી સ્થિતિમાં કે અડધી રાત્રે પણ પેટ્સને ત્યાં સારવાર અર્થે એડમિટ પણ કરી શકાય.

તેમણે કહ્યું હતું કે હાલ તેઓના બે પેટ્સને સાચવવાનો ખર્ચ આશરે 12 થી 13 હજાર રૂપિયા પ્રતિ મહિના જેટલો છે. પણ તેમના પ્રેમની સામે તો આ રકમ કંઇ જ નથી. અને એ જ વિચાર હોસ્પિટલ ઊભું કરવા પાછળ પણ હતો.

હોસ્પિટલ ઊભું કરવા પાછળ મોટો ખર્ચ હોવાનું જાણતા હોવા છતાં તેમણે જરા પણ પાછીપાની કર્યા વગર પૂરેપૂરો ખર્ચ કર્યો હતો. હોસ્પિટલના સાધનોનો ખર્ચ પણ ઘણો વધારે હતો પરંતુ આખરે તો પેટ્સનો જીવ બચે એ જ તેમનો હેતુ હતો માટે ગમે તેટલો ખર્ચ થાય પણ શક્ય એટલી તમામ સુવિધાઓ ઊભી કરવી એ જ તેઓની નેમ હતી. કારણ કે જીવ માનવનો હોય કે પ્રાણીનો, આખરે તેની કિંમત તો અમૂલ્ય છે.

ચાર્જ કેટલો લાગશે?

અહીં તમામ સુવિધાઓ સાથે વ્યાજબી દરે પેટ્સની ટ્રીટમેન્ટ થઈ શકે તે માટે ખાસ ધ્યાન રખાયું છે. અહીં પેટ્સ માટે OPD ચાર્જ 400 રૂપિયા રાખવામાં આવ્યા છે. બાકીની ફેસીલીટી પણ પ્રાઇઝ ટુ પ્રાઇઝ આપવામાં આવશે.
 આ ઉતમ વિચાર પાછળ જે નેકદિલ માણસનું ભેજું જવાબદાર છે તે માણસ વિષે પણ થોડું જાણીએ. 

કોણ છે Shaival Desai?

ભણતરથી એન્જિનિયર અને વ્યવસાયે ટેકનોક્રેટ, સ્વભાવે દયાળુ અને ક્રેઝી પેટ લવર! આ છે શૈવલ દેસાઇનો પરિચય.

પણ આ સિવાય પણ એક અલગ જ ઓળખ તેમણે ઊભી કરી છે. પોતાના કામથી! માણસનો પરિચય તેમના દેખાવ, અભ્યાસ કે વ્યવસાયથી થતો હોય છે પણ તેની સાચી ઓળખ તો તેના કામથી થાય છે.

શૈવલ દેસાઇનો પ્રાણી પ્રેમ ગજબનો છે. માત્ર તેઓ જ નહીં તેમના પરિવારના બધા જ લોકો એટલા જ મોટા પેટ લવર છે.

તેઓ પાસે છેલ્લા 13 વર્ષથી એક પેટ છે જેનું નામ છે મેક્સ. બે વર્ષ પહેલા તેમણે એક બીજું પેટ પાળ્યું હતું જેનું નામ રાખ્યું BUDDY!

BUDDY આવતવેંત જ તેમના આખા પરિવારનું લાડકું થઈ ગયેલું. લોકડાઉન દરમિયાન BUDDY ઘરના તમામ સભ્યો સાથે એટલું હળી મળી ગયેલું કે તેઓને લોકડાઉનમાં પણ એકલતા લાગવા ન્હોતી દીધી.

એક કરૂણ ઘટનાથી વિચારનો થયો જન્મ

પણ આ વ્હાલના સંબંધને અચાનક કોઇની નજર લાગી ગઈ. કમનસીબે લોકડાઉન બાદ BUDDYને એક સિરિયસ હેલ્થ ઇશ્યૂ ઊભો થઈ ગયો. આખો પરિવાર ચિંતામાં મુકાઇ ગયો કારણ કે તેનું ડાયગ્નોસિસ જ થઈ શકતું ન્હોતું. ચાર-ચાર વેટરનરી ડોક્ટર્સને બતાવ્યા પછી પણ તેની સમસ્યાનું નિવારણ કરી શકાયું નહીં. આખરે ભયાનક પીડા સહન કર્યા બાદ BUDDY એ દમ તોડી દીધો. શૈવલના પરિવારમાં સોપો પડી ગયો. લોકડાઉન જેવા કપરાકાળમાં પરિવારના સદસ્યની જેમ તેમના પડખે ઊભું રહેનાર BUDDY હવે આ દુનિયામાં નથી એ વિચાર જ ખૂબ દુઃખ આપનારો હતો.

શૈવલભાઈને આ ઘટના બાદ અનેક આઇડીયાઝ આવ્યા જેના થકી તેઓ પોતાના દુઃખને કોઈ પ્રોડક્ટિવ કે કન્સ્ટ્રકટિવ રસ્તે બહાર કાઢી શકે. તેમણે આટલા વર્ષો દરમિયાન નજર સામે જોયું હતું કે પ્રાણીઓના ક્લિનિક કે હોસ્પિટલ્સને લઈને કેવી કેવી મોટી સમસ્યાઓ છે. તેમણે જોયું કે જે ક્યાંક ડોક્ટર્સ પાસે ક્લિનિકલ સ્કિલ છે તો સામે તેમની પાસે સારું સેટઅપ કે ફેસીલીટી નથી. આવામાં કેટલાંક કિસ્સામાં પ્રાણીનો જીવ બચાવવા સર્જરી ફરજિયાત કરવી પડે છે અને તેના માટે કોઈ એવી નક્કર સુવિધાઓ ઉપલબ્ધ ન હતી.

એક ઉત્તમ વિચાર-''BEST BUDS''

બસ આ વાત તેમના હૃદયમાં ખૂંચી અને એટલી અંદર સુધી ખૂંચી કે તેમણે પોતે જ આવી એક અધતન હોસ્પિટલ બનાવવાનું બીડું ઉપાડ્યું. તેમણે 5000 સ્ક્વેર ફીટ એરિયામાં એક વન સ્ટોપ સોલ્યુશન આપતી પ્રાણીઓ માટેની હોસ્પિટલ ખોલી દીધી. અને તેનું નામ રાખ્યું   BEST BUDS. નામ પણ પોતાના વ્હાલા ડોગ BUDDYના નામ પરથી પાડ્યું. જેનો અર્થ થાય છે 'પાક્કો દોસ્ત'!

ગુજરાત જ નહીં પણ દેશની સૌથી સારી હોસ્પિટલ બનાવીશું : શૈવલ દેસાઈ

શૈવલભાઈ કહે છે કે તેઓ હજુ અહીં એટલી સુવિધાઓ ઊભી કરવા ઈચ્છે છે કે તેઓ આ હોસ્પિટલને ગુજરાત જ નહીં પણ દેશભરની સૌથી સારી હોસ્પિટલ બનાવવા માગે છે. હજુ તો અહીં એમ્બ્યુલન્સ, લેપ્રોસ્કોપી મશીન અને ઓપરેટિંગ માયક્રોસ્કોપ પણ વસાવવા માંગે છે જે આ હોસ્પિટલને એક અલગ જ કક્ષામાં મૂકી દેશે.

ગુજરાતી તરીકે આપણને ગર્વ થાય કે આવી હોસ્પિટલ આપણાં ગુજરાતમાં અને ખાસ તો અમદાવાદમાં જ છે. શૈવલભાઇએ જે કામ ઉપાડ્યું છે તેના થકી ભવિષ્યમાં હજારો જીવ બચશે અને બીજા અસંખ્ય લોકોને મદદ મળશે.

હોસ્પિટલનું સરનામું અને સંપર્ક

BestBuds Pet Hospital
: 099798 70133
1, Kailash Mansarovar Flats, New Sharda Mandir Rd, Ahmedabad, Gujarat 380007                                                                                                                            (1, કૈલાશ માનસરોવર ફ્લેટ્સ, ન્યૂ શારદા મંદિર આરડી, અમદાવાદ, ગુજરાત 380007)

વેબસાઇટ: bestbudsvet.com