ચક દે..ઇન્ડિયાના ગીત સાથે લોકો મેચ જોવા થનગની રહ્યા છે. ગુજરાતવાસીઓ ટીમ ઈન્ડિયાને સપોર્ટ કરવા અવનવા નુસખા અપનાવી રહ્યા છે.
T20 વર્લ્ડ કપમાં આજે ભારતનો મુકાબલો પાકિસ્તાન સામે થશે. આ મેચ દુબઈમાં સાંજે 7:30 થી રમાશે. ટોસ તેના અડધા કલાક પહેલા સાંજે 7 વાગ્યે કરવામાં આવશે. મેચને લઈ ગુજરાતીઓમાં અનેરો ઉત્સાહ જોવા મળી રહ્યો છે. જુઓ કેવી રીતે..
399 થી લઈ 599 રૂપિયા સિનેમા હૉલમાં મેચ જોવાની ટિકિટ
ભારત-પાકિસ્તાનની મેચને લઈ ભારે ઉત્સાહ જોવા મળી રહ્યો છે. થિયેટરોમાં પણ મેચના આયોજન કરવામાં આવ્યા જેમાં અમદાવાદની 3 PVR સિનેમામાં મેચનું લાઈવ પ્રસાર જોઈ શકાશે
PVR દ્વારા આ માટે ખાસ પ્રકારનું આયોજન પણ કરવામાં આવ્યું છે જેમાં દર્શકો માટે કુલ 8 સ્ક્રીન મુકાઈ છે. મેચની ટિકિટના દર 399 થી લઈ 599 રૂપિયા હોવા છતાં પણ ક્રિકેટ રસિકોમાં ભારત પાકિસ્તાન મેચનો એટલો અનેરો ઉત્સાહ છે કે મોટાભાગની ટિકિટો બુક થઈ ગઈ છે, ઓનલાઈન બુકીંગ બંધ કરી દેવામાં આવ્યા છે. તો અમદાવાદના પાનના ગલ્લાઓ પર અત્યારથી માહોલ જામ્યો છે ,પાનના ગલ્લાઓ પર ટીમ ઇન્ડિયાના પોસ્ટરો લગાવી દેવામાં આવ્યા છે.
વડોદરાનો ચારમન્ટ કેફે ધંધાની આવક શહીદ પરિવારને આપશે
ભારત અને પાકિસ્તાન વચ્ચે મહામુકાબલો થવા જઈ રહ્યો છે ત્યારે વડોદરામાં પણ લોકો આજની મેચ જોવા ભારે ઉત્સુક બની ગયા છે. ચારમન્ટ કેફેમાં લાઇવ મેચ જોવાનું આયોજન કરાયું છે. જેમાં સારી બાબત એ છે કે ચારમન્ટ કેફેમાં આજ થનાર ધંધાની આવક દાન કરાશે, શહીદ જવાનોના પરિવારને તમામ રકમ દાન પેટે ચૂકવી દેવામાં આવશે. ગુજરાત સહિત વડોદરાવાસીઓ ભારત વિજેતા થશે તેવી લોકોને આશા રાખીને મેચ જોવા આતુર થયા છે.
સુરતમાં ત્રિરંગાના ટેટૂ
સુરતમાં પણ ક્રિકેટને લઇ લોકોમાં અનેરો ઉત્સાહ જોવા મળી રહ્યો છે, લોકોએ ટીમ ઇન્ડિયાના સપોર્ટમાં ટેટૂ બનાવ્યા છે. અલગ અલગ પ્રકારના ટેટૂ બનાવી ટીમ ભારતને સપોર્ટ કરવા લોકો આવી રીતે અવનવા નુસખા અપનાવી રહ્યા છે. કોઈએ ચહેરા ત્રિરંગાના ટેટૂ પર કરાવ્યા છે તો કોઈએ હાથ પર..
રાજકોટ હવન કરી જીતની પ્રાર્થના
ભારત-પાકિસ્તાન વચ્ચે ક્રિકેટનો મહાજંગ થવા જઈ રહ્યો છે. રાજકોટમાં પણ ક્રિકેટ રસિકોમાં ઉત્સાહ જોવા મળી રહ્યો છે. નાગરબોર્ડિંગ ખાતે લાઇવ સ્ક્રીનિંગ મેચની મજા માણવા 300 ફૂટની વિશાળ સ્ક્રીન લગાવી દેવામાં આવી છે. DJ સાથે લોકો ભારત પાકિસ્તાનીની મેચ નિહાળશે, ભારતની જીત માટે હવનનું પણ આયોજન કરવામાં આવ્યું છે.
ભાવનગરમાં પેઇન્ટિંગની સ્પર્ધા
ભારત-પાકિસ્તાન વચ્ચે હાઇવોલ્ટેજ ટી20 મેચ લઈને ભાવનગરમાં કલાસંઘ સંસ્થા દ્વારા કેપ પેઇન્ટિંગની સ્પર્ધા યોજાઇ હતી. જેમાં ભારતીય ટીમનો જુસ્સો વધારવા સ્પર્ધાનું આયોજન કરવામાં આવ્યું હતું. સ્પર્ધામાં 101થી વધુ વિદ્યાર્થીઓ ઉત્સાહભેર ભાગ લીધો હતો જેમાં 3 ગ્રુપમાં પ્રથમ 5 શ્રેષ્ઠ કેપ પેઇન્ટિંગ સ્પર્ધકને પ્રમાણપત્ર એનાયત કરવામાં આવ્યા હતા