રાજનીતિ / ગુજરાતી ગાયિકા કિંજલ દવે ભાજપમાં જોડાયા, કમલમ ખાતે કેસરિયો ધારણ કર્યો

ચાર-ચાર બંગડીથી ગુજરાતી ગીતોની દુનિયામાં રંગ જમાવનાર કિંજલ દવે હવે અડિખમ ગુજરાતના અવિરત વિકાસના રાગ સાથે ભાજપના કેસરિયામાં રંગાઈ ગયા છે. કિંજલ દવે ભાજપના સદસ્યતા અભિયાન અંતર્ગત આજે ભાજપના સભ્ય બની ગયા છે. ભાજપ પ્રદેશ પ્રમુખ જીતુ વાઘાણીએ કમલમ ખાતે કિંજલ દવેને કેસરીયો ખેસ  પહેરાવીને ભાજપમાં સ્વાગત કર્યું હતું.

કિંજલ દવેએ ભાજપનો ખેસ પહેલા જ ટ્વિટ પણ કર્યું હતું. તેમણે લખ્યું હતું કે, શ્રી કમલમ ખાતે પ્રદેશ અધ્યક્ષ શ્રી જીતુભાઇ વાઘાણીના હસ્તે કેસરીયો ખેસ પહેરીને ભાજપની સદસ્યતા અભિયાનમાં મારી સદસ્યતા નોંધાવી છે. જો તમે પણ ભાજપની કાર્યશૈલીથી પ્રભાવિત હોય તો તમે પણ આ સદસ્યતા અભિયાનમાં અમારી સાથે જોડાઓ.

શ્રી કમલમ ખાતે પ્રદેશ અધ્યક્ષ શ્રી જીતુભાઈ વાઘાણી ના હસ્તે કેસરીયો ખેસ પહેરી બીજેપીની સદસ્યતા અભિયાન મારી સદસ્યતા નોંધાવી જો તમે પણ બીજેપીની કાર્યશૈલીથી પ્રભાવિત હોય તો તમે પણ આ સદસ્યતા અભિયાન માં અમારી સાથે જોડાઓ @jitu_vaghani @bharatpandyabjp #kinjaldaveinbjp #kinjaldave #BJP pic.twitter.com/b6v0diQR0Z

— Kinjal Dave (@Kinjaldavemusic) July 23, 2019

મહત્વનું છે કે, કિંજલ દવેએ તો કેસરિયો ધારણ કરી લીધો છે. પરંતુ ટૂંક સમયમાં અન્ય એક ગાયક કલાકાર એટલે કે ગીતા રબારી પણ ભાજપનો ખેસ ધારણ કરી શકે છે. હાલમાં ગીતા રબારીએ પ્રધાનમંત્રી મોદી અને મુખ્યમંત્રી સાથે મુલાકાત કરી હતી. તો પ્રધાનમંત્રી માટે એક સુંદર ગીત પણ ગાયું હતું.

કિંજલ દવેએ ફેસબુક પોસ્ટ કરતા લખ્યું કે, 'કેસરીયો, કમળ અને વડાપ્રધાન આદરણીય શ્રી નરેન્દ્રભાઈ મોદી હંમેશાથી જ દેશની 125 કરોડ જનતાના હૃદયમાં છે ત્યારે ભાજપના સદસ્યતા અભિયાન હું કિંજલ દવે આજે શ્રી કમલમ ખાતે ગુજરાતના પ્રદેશ પ્રમુખ શ્રી જીતુભાઈ વાઘાણીના હાથે ભાજપનો ખેસ ધારણ કરી મારૂ સભ્યપદ સદસ્યતા અભિયાનમાં નોંધાયું છે. હું પ્રદેશ પ્રમુખ શ્રી જીતુભાઈ વાઘાણી તેમજ આદરણીય શ્રી ભરતભાઇ પંડ્યાનો આભાર માનું છું. તેમજ ભારતીય જનતા પાર્ટીની કાર્યશૈલીથી પ્રભાવિત તમામ મારા ચાહકો અને મિત્રોને આ સદસ્યતા અભિયાનમાં જોડાવા માટે આગ્રહ કરું છું.' તેમ જણાવ્યું હતું.

એમ કહી શકાય કે, દિલ્હીથી લઇને ગામડાની શેરીઓ અને ઘરઘરમાં હવે ભાજપના ગીત ગવાશે. કિંજલે તો ખિલતા કમળને પકડી લીધું છે. કિંજલ દવેએ ફેસબુક પર ભાજપના સદસ્યતા પદ મેળવ્યાનો પણ ફોટો શેર કર્યો હતો. જેમાં તેમણે લખ્યું હતું કે, સાથે આવો દેશ બનાવીએ.