કાતિલ પવનનો 'કોલ્ડ અટેક' ઉત્તરભારતની હિમવર્ષાથી ગુજરાત બન્યું ઠંડુગાર

અમદાવાદ: ઉત્તર ભારતના જમ્મૂ-કશ્મીર હિમાચલ પ્રદેશ અને ઉત્તરાખંડમાં ભારે હિમવર્ષા બાદ મેદાની વિસ્તારમાં ઠંડીનું પ્રમાણ વધ્યુ છે. ત્યારે ઠંડીની અસર ગુજરાત સહિતના અન્ય રાજયોમાં પણ અનુભવાઈ છે. ઉત્તર ભારતમાં ભારે હિમવર્ષાના પગલે આગામી ત્રણ દિવસ માટે રાજ્યમાં ઠંડીનો ચમકારો યથાવત રહે તેવી આગાહી પણ કરવામાં આવી છે. 

ઉત્તરભારતમાં હિમવર્ષાના પગલે હજુ ઠંડી વધી શકે છે. અમદાવાદ સહિત રાજ્યમાં લઘુતમ તાપમાનમાં પણ ઘટાડો થશે. ઉત્તરથી ઉત્તરપૂર્વ દિશાના પવનોના કારણે ઠંડીનું પ્રમાણ પણ વધશે.

તો ઠંડીથી રક્ષણ મેળવવા માટે લોકો તાપણાનો સહારો લઈ રહ્યા છે. વહેલી સવારે હેલ્થ કોન્સિયન્સ લોકો શહેરના ગાર્ડનમાં આવીને જોગિંગ વોકિંગ યોગા અને વિવિધ કસરતનો પણ સહારો લઈ રહ્યા છે.

ઠંડીનું જોર વધવાની શક્યતા
ઉલ્લેખનીય છે કે 3 દિવસ સુધી ઠંડીનું જોર યથાવત્ રહી શકે છે. મહત્વનું છે કે અફઘાનિસ્તાન અને પાકિસ્તાનમાં વેસ્ટર્ન ડિસ્ટર્બન્સ સર્જાયું છે.

જેના કારણે ઉત્તર ભારતમાં પહાડી વિસ્તારોમાં ભારે હિમવર્ષા થઈ શકે છે. તો હિમવર્ષાના કારણે મેદાની પ્રદેશોમાં ઠંડા પવનો ફુંકાઈ શકે છે. તો ગુજરાતમાં પણ 10 કિમી ઝડપે ઠંડા પવન ફુંકાઈ શકે છે. જેના કારણે રાજ્યભરમાં ઠંડીનો ચમકારો જોવા મળી શકે છે.