હવામાન અપડેટ / ગુજરાત પર કમોસમી કમઠાણ! લો પ્રેશરથી આ તારીખોમાં માવઠું પડી શકે, અંબાલાલની આફતવાળી આગાહી

દેશભરમાં ધીરે ધીરે શિયાળાની શરૂઆત થઈ રહી છે, ત્યારે ગુજરાતમાં પણ ઠંડીની રાહ જોવાઈ રહી છે. દિવસે તડકાને લીધે ગરમીનો અહેસાસ થાય છે, પરંતુ રાતે અને વહેલી સવારે વાતાવરણમાં ગુલાબી ઠંડકનો અનુભવ થઈ રહ્યો છે. ત્યારે શિયાળાને લઈને જાણીતા હવામાન શાસ્ત્રી અંબાલાલ પટેલની આગાહી સામે આવી છે.

23 નવેમ્બર પછી આવી શકે છે ઠંડીની લહેર

અંબાલાલ પટેલે જણાવ્યું કે 15 નવેમ્બર બાદ ગરમીથી કંઈક અંશે રાહત મળશે. અંબાલાલ પટેલે શિયાળા અંગે કરેલી આગાહી પ્રમાણે, 17 થી 20 નવેમ્બર પશ્ચિમી વિક્ષેપ આવશે. ઉત્તરીય પર્વતીય પ્રદેશમાં હિમ વર્ષાના કારણે ગુજરાતમાં ગરમી ઘટશે. ઉત્તર ગુજરાતના ભાગોમાં તાપમાનમાં ઘટાડો થશે, ન્યૂનત્તમ તાપમાન 18 ડિગ્રી સેલ્સિયસ થઈ શકે છે. તેમણે જણાવ્યું કે અરબ સાગરમાં 19 થી 22 નવેમ્બર લો પ્રેશર સર્જાશે. લો પ્રેશર સોમાલીયા કે ઓમાન તરફ જશે તો વરસાદ નહીં આવે, પરંતુ જો ગુજરાત તરફ આવશે તો વરસાદ આવવાની સંભાવના છે. અરબ સાગરમાં સાયક્લોનિક સર્ક્યુલેશનના કારણે ચક્રવાત બને તેવી સંભાવના છે.

જો કે અંબાલાલ પટેલે જણાવ્યું કે 23 નવેમ્બર બાદ મજબૂત પશ્ચિમી વિક્ષેપ આવતા ઉત્તર પર્વતીય પ્રદેશોમાં ભારે હિમવર્ષા થશે. ઉત્તર ભારતમાં હિમવર્ષા થવાને કારણે ગુજરાતમાં ઠંડીની લહેર આવી શકે છે. બંગાળ ઉપસાગરમાં 20 થી 25 નવેમ્બર ડિપડિપ્રેશનના કારણે ચક્રવાત બનશે.

સાથે જ તેમણે જણાવ્યું કે હાલ ઘઉંના પાક માટે તાપમાન સાનુકૂળ નથી. હાલની વાવણી થાય તો જીરા, દિવેલામાં ગરમીનાં કારણે ઉત્પાદન ઘટી શકે છે. હાલની ગરમીને જોતા જો ઘઉંની વાવણી કરવામાં આવે છે તો પાકને તેની અસર થવાની શકયતા છે.

આ પણ વાંચો: કપાસનો સંગ્રહ કરવો કે ન કરવો? કૃષિ યુનર્વિસટીના વૈજ્ઞાનિકે આપી સોના જેવી સલાહ

છેલ્લા 30 વર્ષની ઠંડીનો રેકોર્ડ તુટશે

હવામાન નિષ્ણાંત અંબાલાલ પટેલે જણાવ્યું જે ગ્લોબલ વોર્મિંગને કારણે 74 વર્ષ બાદ ઓક્ટોબર માસમાં ગરમી પડી છે. ત્યારે તેમણે આ વર્ષે ગુજરાતમાં રેકોર્ડ બ્રેક ઠંડી અને માવઠાં થવા અંગે પણ આગાહી કરી છે. અંબાલાલ પટેલના જણાવ્યા અનુસાર, આ વર્ષે છેલ્લા 30 વર્ષની ઠંડીનો રેકોર્ડ તુટશે. સાથે જ તેમણે જણાવ્યું કે માર્ચ માસ સુધી હવામાનમાં પલ્ટા આવ્યા કરશે. માર્ચ એપ્રિલ સુધી માવઠા આવી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ