ગુજરાત / પાણીદાર વિરોધથી આયોજન સુધી.. ક્યાંક સૌની યોજનાના પાણીના વધામણાં થયા તો ક્યાંક માટલાં ફુટ્યા

• પાણીદાર વિરોધથી આયોજન સુધી
•  ક્યાંક પાણી જોઈ હરખાયા ખેડૂતો
• તો ક્યાંક પાણીની એ જ જૂની રાડારાડ

આજે વિશ્વભરમાં વર્લ્ડ વોટર ડેની ઉજવણી થઈ હતી. ત્યારે રાજ્યમાં પાણીની સમસ્યાને લઈને ક્યાંક વિરોધ જોવા મળી રહ્યો છે. તો ક્યાંક પાણીની સમસ્યાનું નિરાકરણ આવતા ખુશીનો માહોલ જોવા મળી રહ્યો છે. આણંદમાં કોંગ્રેસ દ્વારા વિરોધ પ્રદર્શન કરાયું હતું. મેયર કિરીટ પરમારને માટલા આપી કોંગ્રેસે વિરોધ નોંધાવ્યો હતો. 

બોટાદના ખેડૂતો ખુશ
બોટાદની જીવાદોરી સમાન લીંબાળી ડેમમાં સૌની યોજના અંતર્ગત પાણી છોડતા ખેડૂતોમાં ખુશીનો માહોલ જોવા મળ્યો હતો. 20 ગામના લોકોને આ ડેમમાંથી પાણી મળે છે. આથી ખેડૂતોએ શ્રીફળ વધેરીને અબીલ ગુલાલથી નવા નીરના વધામણા કર્યા હતા. સાથે જ ખેડૂતોએ એક બીજાને મિઠાઈ ખવડાવીને નવા નિરના વધામણા કર્યા હતા. અને ખેડૂતોએ સરકાર અને સ્થાનિક ધારાસભ્યોનો આભાર પણ માન્યો હતો. 

રાજકોટમાં પીવાના પાણી માટે એક્શન પ્લાન
તો રાજકોટ જિલ્લામાં પ્રશાસન દ્વારા સિંચાઈ અને પીવાના પાણી માટે એક્શન પ્લાન તૈયાર કરાયો છે. રાજ્ય સરકાર પાસે સૌની યોજના થકી નર્મદાના પાણીની માગ કરવામાં આવી છે. હાલમાં ત્રણ ગામમાં ટેન્કરથી પાણી પહોંચાડવાની વ્યવસ્થા કરાઈ છે. આવતા દિવસોમાં ડેમમાંથી કાપ કાઢવામાં આવશે અને ગોંડલનું વેરી તળાવ ભરવામાં આવશે. 

તાપીમાં મહિલાઓને વિરોધ
બીજી તરફ તાપીના વાલોડ ગ્રામ પંચાયતમાં પાણી મુદ્દે મહિલાઓએ ઉગ્ર રજૂઆત કરી હતી. છેલ્લા 15 દિવસથી પાણી ન મળતા મહિલાઓએ વિરોધ પ્રદર્શન કર્યું હતું. સાથે જ જો આવનાર દિવસોમાં પાણી નહીં મળશે તો ઉગ્ર વિરોધ કરાશે. પંચાયત પર મહિલાઓ દ્વારા માટલા ફોડનો કાર્યક્રમ હાથ ધરાશે તેવી ચીમકી આપવામાં આવી હતી. 

પાણી ચોરીનો આરોપ
વડોદરામાં ભાજપ કોર્પોરેટર આશિષ જોશીએ મોટો આરોપ લગાવ્યો છે. મ્યુનિસિપલ કમિશનરને પત્ર લખી પાણી ચોરીનો આરોપ લગાવ્યો છે. પાણીના જગ વેચતા વિક્રેતા પાણીની ચોરી કરતા હોવાનો આક્ષેપ કર્યો છે. કોર્પોરેશનની લાઇનમાં ગેરકાયદે કનેક્શન જોડી ચોરી કરતા હોવાનો આક્ષેપ કર્યો છે. 

મલાણા ગામે પાણીની અછત
પાલનપુરના મલાણા ગામે પાણીની અછત સર્જાઇ છે. પાણી ન હોવાને કારણે સ્થાનિકો દ્વારા ગામનું તળાવ ભરવા માટે રજૂઆત કરવામાં આવી હતી. પરંતુ તંત્ર દ્વારા તેમની વાતો ધ્યાન ન લેવાતાં ખેડૂતો દ્વારા રેલી યોજવામાં આવી હતી. પરંતુ રેલી બાદ પણ તંત્ર એક્શનમાં ન આવતા આજે ફરી વિરોધના સૂર જોવા મળ્યા હતા. મલાણા ગામે મહિલા ખેડૂતો મોટી સંખ્યામાં ભેગી થઇ તળાવ ભરવાની માંગ કરી રહી હતી