ગુજરાત / કાલે વિધાનસભાની 8 બેઠકોની પેટાચૂંટણીનું પરિણામ, સટ્ટાબજાર પ્રમાણે જાણો ભાજપ-કોંગ્રેસને કેટલી બેઠક

• આવતીકાલે ગુજરાતની 8 બેઠકોની પેટાચૂંટણીનું પરિણામ
• સટ્ટા બજાર મુજબ ભાજપને 6 અને કોંગ્રેસને 2 બેઠકોનો અંદાજ
• ભાજપે કોંગ્રેસમાંથી આવેલા 5 પૂર્વ ધારાસભ્યોને ઉતાર્યા હતા મેદાન

કોરોના કાળ દરમિયાન રાજ્યમાં યોજાયેલી પેટાચૂંટણીની મતગણતરી આવતી કાલે હાથ ધરાશે. કાલે રાજ્યની 8 બેઠકોની પેટાચૂંટણીનું પરિણામ આવશે. જો કે સટ્ટા બજારનું માનીએ તો 8 પેટાચૂંટણીમાં ભાજપને 6 અને કોંગ્રેસને 2 બેઠક મળે તેવો અંદાજ છે.

આ સાથે ભાજપે કોંગ્રેસમાંથી આવેલા 5 પૂર્વ ધારાસભ્યોને મેદાનમાં ઉતાર્યા છે. પેટાચૂંટણીના મતદાન પહેલા યોજાયેલ સભાઓમાં કોંગ્રેસે ચૂંટણીમાં પક્ષપલટાનો મુદ્દો ચગાવ્યો હતો. 

રાજ્યમાં જે 8 બેઠકો પર પેટાચૂંટણી યોજાઇ હતી તેમાં ધારી, લીંબડી, મોરબી, અબડાસા, ગઢડા, કરજણ, ડાંગ, કપરડાનું પરિણામ આવતી કાલે જાહેર થશે. રાજ્યમાં આવતી કાલે સવારે 8 વાગ્યાથી મતગણતરી હાથ ધરવામાં આવશે. આવતી કાલની મતગણતરીને તમામ તૈયારીઓ પૂર્ણ કરી લેવામાં આવી છે. સ્ટ્રોંગ રુમ બહાર ચુસ્ત પોલીસ બંદોબસ્ત ગોઠવવામાં આવ્યો છે. 

ભાજપ-કોંગ્રેસના આમને સામને ઉમેદવારો

અબડાસા બેઠક પર ભાજપના પ્રદ્યુમ્નસિંહ જાડેજા સામે કોંગ્રેસના ડો.શાંતિલાલ સેંઘાણી, મોરબીમાં ભાજપના બ્રિજેશ મેરજા સામે કોંગ્રેસના જયંતીલાલ પટેલ, ધારીમાં ભાજપના જે.વી. કાકડિયા સામે કોંગ્રેસના સુરેશ કોટડિયા, કરજણમાં ભાજપના અક્ષય પટેલ સામે કોંગ્રેસના કિરીટસિંહ જાડેજા, ગઢડામાં ભાજપના આત્મારામ પરમાર સામે કોંગ્રેસના મોહનલાલ સોલંકી, કપરાડામાં ભાજપના જિતુ ચૌધરી સામે કોંગ્રેસના બાબુભાઇ વરઠા,  ડાંગમાં ભાજપના વિજય પટેલ સામે કોંગ્રેસના સૂર્યકાંત ગામિત અને લીંબડીમાં ભાજપના કિરીટસિંહ રાણા અને કોંગ્રેસના ચેતન ખાચર વચ્ચે ખરાખરીનો જંગ જામ્યો છે.

કોરોનાકાળમાં કરાયું મતદાન
​
ભાજપ અને કોંગ્રેસ માટે આ પેટા ચૂંટણીનો જંગ જીતવો પ્રતિષ્ઠાનો વિષય બન્યો છે. ઇતિહાસમાં પ્રથમ વખત માસ્ક, સોશિયલ ડિસ્ટન્સિંગ અને સેનિટાઇઝર સાથે કોરોના મહામારીને ધ્યાનમાં રાખીને મતદાન કરાયું હતું અને મતદારોએ પણ ઉત્સાહપૂર્વક મતદાન કર્યું હતું. ભાજપ, કોંગ્રેસ, બીટીપી સહિતની પાર્ટી અને અપક્ષ મળીને કુલ ૮૦ ઉમેદવાર મેદાનમાં હતા.