વિધાનસભા સત્ર ચાલી રહ્યું છે ત્યારે ગુરૂવારે નાયબ મુખ્યમંત્રી નીતિન પટેલના જવાબથી ગૃહમાં હોબાળો મચ્યો હતો. રાજ્યમાં આરોગ્યની સ્થિતિ અંગે ભાજપ-કોંગ્રેસના ધારાસભ્યો આમને સામને આવી ગયા હતા.
વિધાનસભા ગૃહમાં અધ્યક્ષ અને કોંગ્રેસના સભ્યો વચ્ચે થઇ ચકમક
ભાજપ-કોંગ્રેસના ધારાસભ્યો આમને-સામને આવી ગયા
આજે અમારો સમય છે ક્યારેક અમારો સમય આવશેઃ પરેશ ધાનાણી
વિધાનસભા ગૃહમાં આરોગ્ય, પરિવાર કલ્યાણ અને તબિબિ શિક્ષણ અંગે ચર્ચા થઇ હતી. જેમાં કોંગ્રેસ ધારાસભ્ય અમિત ચાવડાએ ગૃહમાં કટાક્ષ કર્યો હતો. ચાવડાએ કહ્યું કે, ગામડાઓમાં હોસ્પિટલની સ્થિતિ કેવી છે? સરકારની નિયત જ ખોટી છે. સરકાર ખાનગીકરણને પ્રોત્સાહન આપે છે. નાયબ મુખ્યમંત્રી નીતિન પટેલના ઉત્તરથી ગૃહમાં હોબાળો મચી ગયો હતો. ગપ્પા મારી મારી તમારા દાદા બોલતા હતા નીતિન પટેલના એવા વાક્યને લઈને હોબાળો મચ્યો હતો. કોંગ્રેસ અને ભાજપના ધારાસભ્યો વચ્ચે હોબાળો થયો હતો. તો કોંગ્રેસના ધારાસભ્યો અને અધ્યક્ષ વચ્ચે પણ ચકમક થઇ હતી. જાણો વિધાનસભાની કામગીરી દરમિયાન શું થયું...
અમિત ચાવડા - આણંદમાં સરકારી હોસ્પિટલના ખાતમુર્હૂત થયા બાદ હજી કાર્યરત નહીં
અમિત ચાવડાએ ખેડા-આણંદ જિલ્લાનો આપ્યો ચિતાર આપ્યો હતો. અમિત ચાવડાએ કહ્યું કે, બંને જિલ્લામાં 70 ટકાથી વધુ તબીબો હાજર ના થયા. બોન્ડ બાદ પણ તબીબો ગ્રામ્ય વિસ્તારમાં ફરજ પર હાજર ના રહ્યા. આંતરિયાળ જિલ્લામાં શુ સ્થિતિ હશે. આણંદમાં સરકારી હોસ્પિટલનું ખાતમુર્હૂત થયા બાદ હજી કાર્યરત નહીં. નીતિન પટેલ ખાતર્મુહત કરી ગયા પણ હોસ્પિટલ શરૂ ના થઇ.
નીતિન પટેલ - મેં આણંદમાં કોઇ હોસ્પિટલનું ખાતમુર્હૂત નથી કર્યું
નીતિન પટેલે તેમના નામના ઉલ્લેખ સામે વિરોધ વ્યક્ત કર્યો હતો. નીતિન પટેલે કહ્યું કે, મેં આણંદમાં કોઈ હોસ્પિટલનું ખાતર્મુહત નથી કર્યું. અમિત ચાવડા અને તેમના દાદાએ ગપ્પા મારી ગેરમાર્ગે દોર્યા છે. નીતિન પટેલના આ નિવેદન બાદ વિધાનસભા ગૃહમાં હોબાળો સર્જાયો હતો.
પરેશ ધાનાણી - આજે તમારો સમય છે, ક્યારેક અમારો સમય આવશે
નીતિન પટેલના શબ્દો પર વિરોધ દર્શાવતા કોંગ્રેસ નેતા પરેશ ધાનાણીએ કહ્યું કે, નીતિન પટેલે માફી માંગવી જોઇએ. આજે તમારો સમય છે, ક્યારેક અમારો સમય આવશે.
નીતિન પટેલઃ અમિત ચાવડાએ મારી માફી જોઇએ
તો આ હોબાળા બાદ નીતિન પટેલે કહ્યું કે, મેં ખોટું કહ્યું છે તેમ નથી. વ્યક્તિગત કે કોઈની પેઢી વિષે નથી બોલ્યો. કોઇ મહાનુભાવ વિષે ઉલ્લેખ નથી કર્યો. ખોટી રીતે વર્ણન કરવાની જરૂર નથી. અમિત ચાવડાએ મારી માફી જોઇએ. કોઇ સાબિતી વિના કહ્યું કે મેં ખાતમુર્હૂત કર્યું.
અધ્યક્ષ અને કોંગ્રેસના સભ્યો વચ્ચે થઇ ચકમક, અધ્યક્ષે શબ્દો રેકોર્ડ પરથી હટાવવા કહ્યું
ગપ્પા મારી તમારા દાદાએ ચલાવ્યું નાયબ મુખ્યમંત્રીના શબ્દો મુદ્દે વિધાનસભા ગૃહમાં ચકમક થઇ. પૂંજા વંશ અને શૈલેષ પરમારને શબ્દો રેકોર્ડ પર રાખવા અપીલ કરી. બાદમાં અધ્યક્ષે શબ્દો રેકોર્ડ પરથી હટાવવા કહ્યું. અધ્યક્ષ રાજેન્દ્ર ત્રિવેદીએ કહ્યું કે, મારી ફરજમાં આવે એ હું કરીશ. પૂજા વંશે ઉગ્રતાથી કહ્યું કે, તમારી ફરજમાં ઘણું આવે છે.